ތައިލެންޑުގެ ޕުކެޓުން އިންޑިއާގެ ވެރިރަށް ނިއުދިއްލީއަށް ދަތުރުކުރި އެއާ އިންޑިއާގެ ބޯޓު ވައިގެ ތެރޭގައި ކުއްލިއަކަށް ތިރިވި ހާދިސާއާ މެދު ސީރިއަސް ސުވާލުތަކެއް އުފައްދަން ފަށައިފި އެވެ.

އެ ހާދިސާގައި ދަތުރުކުރި 17 މީހަކަށް އަނިޔާވިއެވެ. އޭގެ ތެރޭގައި ބޯޓުގެ ކެބިން ކްރޫއިންނާއި ފަސިންޖަރުން ހިމެނެ އެވެ.

Advertisement

މި ހާދިސާ ހިނގީ އެ ބޯޓު އިންޑިއާގެ އޮޑިޝާ މަތިން ދަތުރުކުރަމުން ދިޔަ ވަގުތުގައެވެ. ފުރަތަމަ މި ހާދިސާ މެދުވެރިވީ ވައި ގަދަވެގެން ފްލައިޓު ހެލުމުގެ ސަބަބުން ކަމަށް ބެލެވުނު ނަމަވެސް ފަހުން ލިބެމުންދާ ރިޕޯޓުތަކުގައި ބުނެފައިވާ ގޮތުގައި ހާދިސާގެ މަންޒަރު ތަފާތު ކަމަށްވެ އެވެ.

ރިޕޯޓުތައް ބުނާގޮތުގައި މިހާރު ބެލެވޭ ގޮތުގައި މި ހާދިސާ ހިނގީ ހައިޑްރޯލިކް ނިޒާމުގެ ތިން ބައި އެއްފަހަރާ ފެއިލްވުމުގެ ސަބަބުން ކުއްލިއަކަށް ބޯޓުގެ އުސްމިން ތިރިވެގެންނެވެ.

ސީރިއަސް ޝައްކުތައް އުފެދުނު އެއް ކަމަކީ އިންޑިއާގެ މަދަނީ ވައިގެ ދަތުރުފަތުރާ ބެހޭ ވުޒާރާއިން މި ހާދިސާއާ ގުޅޭ ގޮތުން ނެރުނު ބަޔާނުގައި "ޓާބިއުލެންސް" ނުވަތަ ވައިގެ ހަލަބޮލިކަމުގެ ލަފުޒު ބޭނުންކޮށްފައި ނެތުމުން ކަމަށް ރިޕޯޓުތައް ބުނެ އެވެ.

މީގެ އިތުރުން ހާދިސާ ހިނގުމުން ޕައިލެޓު ބޯޓުގެ ފަހަތު ބައިގައި ހުއްޓައި ފެނުމަކީ ވައިގެ ދަތުރުފަތުރުގެ ގަވާއިދުތަކާ ޚިލާފު ކަމެއް ކަމަށް ރިޕޯޓުތައް ބުނެއެވެ. ވައިގެ ދަތުރުފަތުރުގެ އެންމެ އަސާސީ ގަވާއިދަކީ އެ ފަދަ ހާލަތެއްގައި ބޯޓު ދުއްވުމައިގެން ކުރިއަށް ގެންދިޔުން ކަމަށް ވެއެވެ.

މި ހާދިސާގައި އުފެދޭ އެންމެ ބޮޑު ސުވާލަކީ ފަސެންޖަރުންނަށް އަނިޔާ ލިބިދާނެ ކަން އެނގިހުރެ މޭ ޑޭ ސިގްނަލެއް ފޮނުވަން ޖެހޭ ފެންވަރުގެ ހާލަތެއް މެދުވެރިވެފައިވާ އިރު ޕައިލެޓު ކޮކްޕިޓު ދޫކޮށް ބޯޓުގެ ފަހަތަށް ދާންވީ ކީއްވެތޯ ކުރެވޭ ސުވާލެވެ. ހަމައެހެންމެ އެ ފެންވަރުގެ ޓެކްނިކަލް މައްސަލައެއް ދިމާވުމުން އެންމެ ކައިރީގައި އޮތް އެއާޕޯޓަކަށް ބޯޓު ނުޖައްސައި ދިއްލީއަށް ދަތުރު ކުރިއަށް ގެންދިޔައީ ކީއްވެތޯ ވެސް ސުވާލު އުފެދޭ ކަމަށް ރިޕޯޓުތައް ބުނެއެވެ.

މި ހާދިސާ ތަޙުޤީޤުކުރެވެމުންދާ އިރު ފެންމަތިވެފައިވާ ސުވާލުތަކަށް އެއާ އިންޑިއާ އަދި އިންޑިއާގެ ވައިގެ ދަތުރުފަތުރާ ބެހޭ އިދާރާތަކުން ޖަވާބެއް ދީފައެއް ނުވެއެވެ.