އުމުރުން 40 އަހަރުން މަތިވީމާ ހަށިގަނޑަށް އަންނަ ބަދަލުތަކާ އެކު ލޭ މަދުވުމުގެ ނުރައްކާ ކުޑަކުރުމަށް ކެއުމުގައި ދަގަނޑު ފޮލޭޓް އަދި ވިޓަމިން ބީ12 ހިމެނުން ވަރަށް މުހިންމެވެ.

އޮލިމްޕިކް ސްޕޯޓްސް ނިއުޓްރިޝަނިސްޓެއް ސޯޝަލް މީޑިއާގައި އާންމު ކުރި ވީޑިއޯއެއްގައި ފާހަގަކުރި ގޮތުގައި ގިނަ ފަހަރު ވަރުބަލިވެ ކަށިތަކުގައި ރިއްސައި ބޯ އެނބުރޭ ގޮތް ވުމަކީ ހަމައެކަނި ބުރަ ދިރިއުޅުމުގެ ނިޝާނެއް ނޫން ކަމަށެވެ. އެއީ ހަށިގަނޑުން ބޭނުންވާ މުހިންމު މާއްދާތައް މަދުވާ ކަމުގެ ޢަލާމާތެއް ކަމަށެވެ.

Advertisement

ދަގަނޑާއި ފޮލޭޓާއި ވިޓަމިން ބީ12 އެކުގައި ޓީމެއްގެ ގޮތުގައި މަސައްކަތް ކުރާ ކަމަށާއި އެއިން އެއް މާއްދާ ދަށްވިޔަސް ދެން ހުރި މާއްދާތައް ރަނގަޅަށް މަސައްކަތް ނުކުރާ ކަމަށް އޭނާ ބުނެފައިވެއެވެ. 

ދަގަނޑަށް ބަލާ އިރު އިނގިރޭސިވިލާތުގެ ނެޝަނަލް ހެލްތު ސާވިސް (އެންއެޗްއެސް) ބުނާ ގޮތުގައި ހަށިގަނޑުގައި ރަތް ލޭގެ ސެލް އުފެއްދުމަށް ދަގަނޑު ކޮންމެހެން ބޭނުންވެއެވެ. ދަގަނޑު މަދުވެއްޖެ ނަމަ ވަރުބަލިކަމާއި ބޯ އެނބުރުމާއި ނިކަމެތިކަން އިޙުސާސް ވެދާނެއެވެ.

ދުވާލެއްގެ މައްޗަށް 18 މިލިގްރާމް ދަގަނޑު ބޭނުންވާ ކަމަށާއި ގުރުދާ ފަދަ އެތެރެ ގުނަވަންތަކުގެ މަހާއި ފެހިފަތާއި ބަދަނުން އެ މިންވަރު ހަމަކުރެވޭނެ ކަމަށެވެ. ދެވަނައަށް ފޮލޭޓާ ނުލައި ހަށިގަނޑަށް ރަނގަޅު ރަތް ލޭގެ ސެލް އުފެއްދުމާއި ދަގަނޑު ރަނގަޅަށް ދަމައިގަތުމަށް ހުރަސް އެޅެއެވެ.

ދުވާލެއްގެ މައްޗަށް 400 މިލިގްރާމް ފޮލޭޓް ބޭނުންވާ އިރު އެއް ބީޓްރޫޓް ނުވަތަ އެއް އޮރެންޖް ނުވަތަ ޖޯޑެއްގެ ކައްކާފައި ހުރި ބްރޮކޮލީ ކެއުމުން އެ މިންވަރު ފުދޭ ކަމަށް ނިއުޓްރިޝަނިސްޓް ބުނެފައިވެއެވެ. ތިންވަނައަށް ހާވާޑް ހެލްތުން ފާހަގަކުރާ ގޮތުގައި ވިޓަމިން ބީ12 އަކީ ސިކުނޑިއާއި ނާރުތައް ދުޅަހެޔޮކޮށް ބެހެއްޓުމަށާއި ޑީއެންއޭ އާއި ރަތް ލޭގެ ސެލް އުފެއްދުމަށް ކޮންމެހެން ބޭނުންވާ މާއްދާއެކެވެ.

ހަމައެހެންމެ ޑިމެންޝިއާ އާއި ހިތުގެ ބައްޔާއި ސްޓްރޯކާއި ކައްޓާ ފީވުމާ ގުޅުން ހުރި ހޯމޯސިސްޓީން ނަމަކަށް ކިޔާ އެމީނޯ އެސިޑެއް ދަށް ކުރުމަށް ވެސް ބީ12 އެހީވެއެވެ. ފޮލޭޓް ހަށިގަނޑަށް ބޭނުންކުރެވޭ ގޮތް ހެދުމަށް ވެސް ބީ12 ބޭނުންވާ ކަމަށާއި ކިރާއި މަހާއި ފޯޓިފައިޑް ކެއުމުގެ ބާވަތްތަކުން 2.6 މައިކްރޯގްރާމް ބީ12 ލިބޭ ކަމަށް ރަޔަން ބުނެފައިވެއެވެ.

ފޮލޭޓާއި ބީ12 ދެ މާއްދާ ވެސް ހިމެނޭ ބޯނަސް ޓިޕެއްގެ ގޮތުގައި ރަޔަން ބިހުގެ ފައިދާ ފާހަގަކޮށްފައިވެއެވެ. "ދުވާލެއްގެ މައްޗަށް ދެ ބިސް ކެއުމުން ވެސް ބޮޑު ތަފާތެއް ފެނިދާނެ" ކަމަށް ވެއެވެ.

މި ތިން މާއްދާ ހަށިގަނޑުގައި ހުރި މިންވަރު ދެނެގަތުމަށް ޓެސްޓު ހައްދައި ކެއުމުގެ ވައްޓަފާޅިއަށް ބަދަލެއް ގެންނަ ނަމަ ޑޮކްޓަރެއް ނުވަތަ ނިއުޓްރިޝަނިސްޓެއްގެ ލަފާ ހޯދުން މުހިންމެވެ.