އީރާނުގެ ރައީސް މަސްޢޫދު ޕެޒެޝްކިއާން އެ ޤައުމުގެ ރޫޙީ ލީޑަރު އާޔަތުﷲ މުޖުތަބާ ޚާމަނައީއާ ބައްދަލުކުރެއްވި ކަމަށް ޚާމަނައީގެ އޮފީހުން ރަސްމީކޮށް ހާމަކޮށްފިއެވެ.

މެދުއިރުމަތީގެ ހަނގުރާމަ ފެށުނު ފަހުން ޚާމަނައީ ރައްޔިތުންގެ ކުރިމައްޗަށް ނުކުމެވަޑައިގެންފައެއް ނުވެއެވެ. ރޫޙީ ލީޑަރުގެ އޮފީހުން ބުނީ ޕެޒެޝްކިއާން ރައީސްކަމުގެ ތިންވަނަ އަހަރު ފެށުމާ ދިމާކޮށް އެ ބައްދަލުވުން ބޭއްވި ކަމަށެވެ.

Advertisement

ނަމަވެސް ބައްދަލުވުން ބޭއްވި ސީދާ ތާރީޚެއް ހާމަކޮށްފައެއް ނުވެއެވެ.

މި ބައްދަލުވުން ބޭއްވިކަން ހާމަކޮށްފައި މިވަނީ އެ ދެބޭފުޅުންގެ ދެމެދުގައި ގުޅުން ގޯސްވެ، ރައީސް ކަމުން ޕެރެޝްކިއާން އިސްތިތިއުފާ ދެއްވަން ބޭނުންވާ ކަމަށް އިޒްރޭލުގެ ނޫހަކުން ރިޕޯޓުކޮށްފައި ވަނިކޮށެވެ. އެ ނޫހުން ބުނެފައިވާ ގޮތުގައި މިހާތަނަށް އޭނާ ދެ ފަހަރު އިސްތިއުފާ ހުށަހަޅާފައި ވީނަމަވެސް ގަބޫލު ނުކުރާ ކަމަށާއި ތިން ވަނަ ފަހަރު އިސްތިއުފާ ހުށަހަޅައިފި ނަމަ ގަބޫލު ކުރާނެ ކަމަށް ހާމަނާއީ ވިދާޅުވެފައިވާ ކަމަށެވެ.

2024 ވަނަ އަހަރުގެ ޖުލައިގައި މަޤާމާ ހަވާލުވެވަޑައިގެންނެވި ޕެޒެޝްކިއާން މެއި މަހުގެ ކުރީކޮޅު ވެސް ޚާމަނައީއާ ބައްދަލުކުރެއްވި ކަމަށް އެ އޮފީހުން ހާމަކޮށްފައިވެ އެވެ. އެ ފަހަރު ވެސް ތާރީޚެއް ހާމަނުކުރެ އެވެ. އަދި ރޫޙީ ލީޑަރުގެ އޮފީހުން އެ ބައްދަލުވުމާ ގުޅޭ ބަޔާނެއް ނެރެފައެއް ނުވެއެވެ.

ޚާމަނައީގެ އޮފީހުން ބުނީ އެ ބައްދަލުވުމުގައި ދެ ބޭފުޅުން ޤައުމުގެ މައްސަލަތަކާއި ގޮންޖެހުންތައް ތަފްޞީލީ ގޮތެއްގައި މަޝްވަރާ ކުރެއްވި ކަމަށާއި މިހާރުގެ ޢަސްކަރީ ޙާލަތާއި ކުރިމަގުގެ ފުރުޞަތުތައް ވެސް މަޝްވަރާގައި ހިމެނުނު ކަމަށެވެ.

އީރާނުގެ ތަސްނީމް ނޫސް އެޖެންސީން ރިޕޯޓުކޮށްފައިވާ ގޮތުގައި ރެވޮލިއުޝަނަރީ ގާޑުގެ ޖެނެރަލަކު ބުނީ ޚާމަނައީ ރައްޔިތުންނާ އެކު އަދި ބައްދަލުވުންތަކުގައި އުޅުއްވާ ފޮޓޯތައް ކުރިއަށް އޮތް ތަނުގައި ޢާންމު ކުރެވޭނެ ކަމަށެވެ. އެ ފޮޓޯތައް ޢާންމު ކުރާނެ ވަކި ދުވަހެއް ބުނެފައެއް ނުވެއެވެ.

މި ބައްދަލުވުން ބޭއްވިކަން ހާމަކުރެއްވި އިރު ރައީސް ޕެޒެޝްކިއާން ބުދަ ދުވަހު ވިދާޅުވީ ޚާމަނައީއާ މުޢާމަލާތް ކުރެއްވުމަކީ "މި ވަގުތު ވަރަށް އުނދަގޫ" ކަމެއް ކަމަށެވެ. ޚާމަނައީގެ ބައްޕާފުޅު ނިޔާވި ހަމަލާތަކުގައި ރޫޙީ ލީޑަރަށް ވެސް ޒަޚަމްތަކެއް ލިބިވަޑައިގެންނެވި ކަމަށް ރިޕޯޓުތައް ބުނާއިރު އެ ކަމާ ގުޅިގެން ޚާމަނައީގެ ޞިއްޙީ ޙާލުކޮޅާ މެދު ވަނީ ސުވާލު އުފެދިފައެވެ.