އެމެރިކާގެ ރައީސް ޑޮނަލްޑް ޓްރަމްޕް ޣައްޒާއާ ގުޅޭ ގޮތުން ހުށަހެޅި 15 ނުކުތާގެ ޕްލޭން ބަލައިނުގަންނަ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފި އެވެ.

ނަތަންޔާހޫ ބުނީ ޙަމާސް "ޙަޤީޤީ" މާނައެއްގައި ހަތިޔާރު ބެހެއްޓުމުން ނޫނީ އިސްރާއީލު ސިފައިން ޣައްޒާއިން ފައިބައިގެން ނުދާނެ ކަމަށެވެ. ހަތިޔާރު ބެހެއްޓުމުގެ މަސައްކަތަކީ "ޚިޔާލީ" ކަމަކަށް ވެގެން ނުވާނެ ކަމަށް އޭނާ ބުންޏެވެ.

Advertisement

ނަތަންޔާހޫ ބުނީ މި ކަންކަމާ ގުޅޭ ގޮތުން މިހާރު އެމެރިކާގެ އޮފިޝަލުންނާ މަޝްވަރާ ކުރަމުންދާ ކަމަށެވެ. އޭނާ ބުނީ އެ ޕްލޭންގައި އެއްބަސްވެވޭ ހިޔާލުތަކެއް އަދި އެއްބަސްވެވެން ނެތް ކަންކަން އެބަހުރި ކަމަށާއި ބަލައި ނުގަނެވޭނެ ކަންކަމުގައި އިޒްރޭލް ދެމިތިބޭނީ ސާބިތު ކަންމަތީގައި ކަމަށެވެ.

ޓްރަމްޕުގެ ބޯޑު އޮފް ޕީސްއިން މިދިޔަ މަހު ބުނެފައިވާ ގޮތުން ޙަމާސް އާއި ޣައްޒާގައި ހަރަކާތްތެރިވާ އެހެން ހަތިޔާރު އެޅި ޖަމާޢަތްތައް "އެއްކޮށް" ހަތިޔާރު ބެހެއްޓުމާ ގުޅޭ ގޮތުން އެއްބަސްވުމަކާ ހަމައަށް އާދެވިފައިވާ ކަމަށެވެ.

އެހެންނަމަވެސް ޙަމާސް ބުނީ ބަރު ހަތިޔާރު ދޫކޮށްލުން ބިނާވެފައި އޮތީ އިސްރާއީލުގެ "ހުރިހާ ބާވަތެއްގެ ޢުދުވާނެއް" ހުއްޓައިލައި ޣައްޒާއިން ސިފައިން ފޭބުމުގެ މައްޗަށް ކަމަށެވެ. މިދިޔަ އޮކްޓޫބަރުގައި ޣައްޒާގައި ފުރަތަމަ ހަމަލާ ބަދަލުކުރުން ހުއްޓައިލުމުގެ އެއްބަސްވުމެއް ޤާއިމުކުރެވުނު ނަމަވެސް އޭގެ ފަހުން ވެސް އިސްރާއީލުން ޣައްޒާއަށް ހަމަލާތައް ދެމުން ގެންގޮސްފައިވެއެވެ.

ޓްރަމްޕުގެ ޣައްޒާ ޞުލްޙައިގެ ޕްލޭނަކީ މިދިޔަ ސެޕްޓެމްބަރުގައި އިޢުލާނުކުރި ޕްލޭނެކެވެ. އެ ޕްލޭންގައި ބޯޑު އޮފް ޕީސް އުފެއްދުމާއި ޙަމާސް ހަތިޔާރު ބެހެއްޓުމާއި އިސްރާއީލު ސިފައިން ފޭބުމާއި ޣައްޒާ އަލުން ބިނާކުރުން ހިމެނެއެވެ.

އިސްރާއީލުގެ އިންތިޚާބު ބޯ މައްޗަށް ޖެހިފައި އޮތް މި ދަނޑިވަޅުގައި ނަތަންޔާހޫގެ ކެބިނެޓުގެ ހަރުކަށި ފިކުރުގެ ބައިވެރީން ވެސް ވަނީ މި ޕްލޭނާ ދެކޮޅު ހަދައިފައެވެ. އެ ގޮތުން ޤައުމީ ސަލާމަތާ ބެހޭ ވަޒީރު އިތަމާރް ބެން ގެވީރް ވެސް އެ ޕްލޭން "ބަލައިނުގަނެވޭ" ކަމަށް ބުނެ ޕްލޭނާ ދެކޮޅަށް ކެބިނެޓުގައި އައު ވޯޓެއް ނެގުމަށް ގޮވައިލައިފައިވެއެވެ.