ހދ. ހިރިމަރަދޫ ފަޅުރަށެއް ކަމަށް ކަނޑައެޅުމުން، އެ ރަށުގެ ރައްޔިތުންނަށް ހިދުމަތްތައް ނުލިބި "ވާނުވާ"ގައި ތިބި ކަމަށް ބުނެ، އިދިކޮޅު އެމްޑީޕީން އެ މައްސަލަ ހިއުމަން ރައިޓްސްް ކޮމިޝަން އޮފް ދަ މޯލްޑިވްސް (އެޗްެއާރްސީއެމް) އަށް މިއަދު ހުށަހަޅައިފި އެވެ.

ހިރިމަރަދޫގެ އާބާދީ ކުޑަކަމުން އެހެން ރަށަކަށް ބަދަލުކޮށްދޭން އެދުމުން ސަރުކާރުން ނިންމާފައިވަނީ ހދ. ހަނިމާދޫއަށް ބަދަލު ކުރުމަށެވެ. މި ދައުރު ނިމުމުގެ ކުރިން އެ މަސައްކަތް ނިންމައި އެ ރަށު މީހުން ހަނިމާދޫއަށް ބަދަލު ކުރަން ނިންމާފައިވާތީ ކައުންސިލް އިންތިހާބުގައި ހިރިމަރަދޫ ކައުންސިލް ނުހޮވައި އެ ރަށުގައި މިހާރު ހުންނަނީ ހަނިމާދޫ ކައުންސިލްގެ އަވަށޫ އޮފީހެކެވެ.

މި މައްސަލައިގަ އެމްޑީޕީން ހުށަހެޅި މައްސަލައިގަ ބުނެފައިވަނީ ހިރިމަރަދޫގައި މިހާރު އޮތް އާބާދީގެ ކަންތައްތައް ބަލަހައްޓާނީ ހަނިމާދޫ ކައުންސިލުން ކަމަށް ވިޔަސް އެކަން އެގޮތަށް ނުހިނގާ ކަމަށެވެ. އެ ޕާޓީން އެދިފައިވަނީ އެއީ ސީރިއަސް މައްސަލައެއްގެ ގޮތުގައި ބަލައިދޭށެވެ.

އެ މައްސަލަ ހުށަހެޅުއްވުމަށް ފަހު ނޫސްވެރިންނާ ވާހަކަ ދައްކަވަމުން، އެ ޕާޓީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒު ވިދާޅުވީ 300 އަށް ވުރެ ގިނަ ރައްޔިތުން މިހާރު އެ ރަށުގައި ދިރިއުޅެމުންދާ ކަމަށެވެ. ނަމަވެސް އެ ޕާޓީން ހޯދި ހޯދުންތަކުން ހަނިމާދޫ ކައުންސިލުގެ ބެލެނިވެރިކަމުގެ ދަށުން އެ ރަށުގެ އިދާރީ ކަންކަން އުސޫލުގެ ތެރެއިން ހިނގަމުން ނުދާކަން އެނގިފައިވާ ކަމަށެވެ. 

ނިޔާޒް ވިދާޅުވި ގޮތުގައި އެމްޑީޕީން އެދެނީ، ހިރިމަަރަދޫ މީހުންނަށް ހަނިމާދޫގައި ގެ އަޅައިދީ އެ ރަށަށް ބަދަލުކުރަން ސަރުކާރުން ބޭނުން ނުވާ ނަމަ، އެއީ ފަޅުރަށެއް ކަމަށް ރައީސް ކަނޑައެޅި ގަރާރު ބާތިލުކުރާށެވެ. އެ ގަރާރު ބާތިލުކޮށް ހިރިމަރަދޫގައި އަލުން ކައުންސިލެއް ހަދައި އިންތިހާބު ބާއްވަން އެމްޑީޕީން އެދޭ ކަމަށް ވެސް އޭނާ ވިދާޅުވި އެވެ.

އެހެން ނޫންނަމަ ރައީސް ވައުދުވެވަޑައިގެން ގޮތަށް 18 މަސް ދުވަސް ތެރޭގައި ހިރިމަރަދޫ މީހުންނަށް ބޭނުންވާ 180 އަށްވުރެ ގިނަ ހައުސިން ޔުނިޓު ހަނިމާދޫގައި އަޅައިދިނުމަށް ވީހާވެސް އަވަހަކަށް ބަދަލު ކުރުމަށް ގޮވާލާ ކަމަށެވެ. ގަރާރުގައި އެހެން އޮތް ނަމަވެސް 18 މަސްދުވަހުގެ ތެރޭގައި ހައުސިން ޔުނިޓްތައް އެޅުމަކީ ނުވާނެ ކަމެއްކަން މިހާރު ޔަގީންވެފައިވާ ކަމަށާއި އެކަމަށް ކަނޑައެޅި ބިން އަދި ސާފުކޮށް ނުނިމޭ ކަމަށް ވެސް އޭނާ ވިދާޅުވި އެވެ.

ހަނިމާދޫގައި ހިރިމަރަދޫ މީހުންނަށް ހައުސިން ޔުނިޓު އަޅަން ހަވާޅުކޮށްފައިވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއެވެ. ހިރިމަރަދުއަކީ ފަޅުރަށެއް ކަމަށް ކަނޑައެޅުއްވީ މިދިޔަ ޑިސެމްބަރުމަހު ރައިސް ނެރުއްވި ގަރާރަކުންނެވެ.

މި ގެތައް ލަސްވާ ސަބަބާ ގުޅޭ ގޮތުން ހައުސިން މިނިސްޓަރު ޑރ. އަބްދުﷲ މުއްތަލިބު ރައްޔިތުންގެ މަޖިލީހުގައި ވިދާޅުވެފައި ވަނީ ހިރިމަރަދޫ ރައްޔިތުން ބަދަލުކުރަން ހަނިމާދޫގައި ހިންގަން ސަރުކާރުން މަސައްކަތް ކުރާ ހައުސިން މަޝްރޫއުއަށް ހަނިމާދޫ ކައުންސިލުން އެއްބާރުލުން ނުދީ، ދަތިތަކާ ކުރިމަތިކުރަމުންދާ ކަމަށެވެ. 

ހަނިމާދޫ ކައުންސިލްގެ ހުއްދަ ނެތި އެ ރަށުން ހިރިމަރަދޫ ރައްޔިތުންނަށް ބިން ދޭން އުޅޭ ކަމަށް ބުނެ ކައުންސިލުން ވަނީ އެ މައްސަލަ ޕޮލިހަށް ވެސް ހުށަހަޅައިފަ އެވެ. އަދި އެކަން ހުއްޓުވަން މުޒާހަރާ ވެސް ކުރި އެވެ.

ހިރިމަރަދުއަކީ ހދ. އަތޮޅުގެ 13 ރަށުގެ ތެެރެއިން އެންމެ އާބާދީ ކުޑަ ރަށެވެ. އެންމެ ފަހުން ހެދި ބޯހިމެނުމުން އެނގޭ ގޮތުގައި ރަށުގެ ދިރިއުޅޭ އާބާދީއަކީ 293 އެވެ. އެއީ 157 ފިރިހެނުންނާއި 136 އަންހެނުންނެވެ.