އިންޑިއާގެ ޓެމިލް ނާޑޫގެ ޗީފް މިނިސްޓަރު އަދި ތަމަޅަ ފިލްމީ ތަރި ޖޯސެފް ވިޖޭ ޗަންދްރަސޭރަކްގެ އަންހެނުން ސަންގީތާ ސޯނަލިންގަމް ކޯޓަށް ހުށަހެޅި ވަރީގެ މައްސަލަ އަނބުރާ ގެންގޮސްފިއެވެ.

ވިޖޭ އާއި ސަންގީތާ ކައިވެނި ކުރީ 1999 ވަނަ އަހަރުއެވެ. ދެ މީހުންގެ ކައިވެންޏަށް ދެ ދަރިން ތިބި އިރު ވިޖޭ ކައިރިން ވަރިވާން ކޯޓަށް މައްސަލަ ހުށަހެޅީ މިއަހަރު ފެބްރުއަރީ މަހު އެވެ.

Advertisement

ރިޕޯޓުތައް ބުނާގޮތުގައި މި މައްސަލައިގަ އިއްޔެ ބޭއްވި އަޑު އެހުމުގައި ވީޑިއޯ ކޮންފެރެންސް މެދުވެރިކޮށް ބައިވެރިވެ ސަންގީތާ ވަނީ މި އަހަރު ކުރީކޮޅު ފެށި ވަރީގެ މައްސަލައިގެ ޝަރީޢަތް ކުރިއަށް ގެންދަން ބޭނުން ނުވާ ކަމަށް ބުނެފައި އެވެ. ވިޖޭ ފަރާތުން ވަކީލަށް ނޯޓިސް ފޮނުވުމުން އެ ފަރާތުން ވެސް މައްސަލަ އަނބުރާ ގެންދިއުމާ ދެކޮޅު ނޫން ކަމަށް ބުނެފައިވެއެވެ.

ވިޖޭ ކައިރިން ވަރިވާން ސަންގީތާ ހުށަހެޅި މައްސަލައިގަ ބުނެފައިވަނީ ކައިވެނީގެ ބޭރުން ވިޖޭ އެހެން އަންހެނަކާއި ގުޅުން ބާއްވާ ކަމަށެވެ. އެކަން އޭނާއަށް ފަޅާ އެރީ 2021 ވަނަ އަހަރު ކަމަށް މައްސަލައިގަ ބުނެފައިވެ އެވެ.

ގުޅުން ކަނޑައިލާނެ ކަމުގެ ޔަގީންކަން ދިން ނަމަވެސް ނުކެނޑި ކުރިއަށް ދިޔަ ކަމަށާއި ޖަޒުބާތީ ގޮތުން ބާކީކޮށް ބަހުން ކުޑައިމީސްކޮށް "ކޮންސްޓްރަކްޓިވް ޑެޒާޝަން" ގެ ގޮތުގައި ސިފަކުރެވޭ ޢަމަލުތައް ތަޖުރިބާ ކުރި ކަމަށް ވެސް ބުނެފައިވެއެވެ. ޓެމިލް ނާޑޫގެ މަޖިލީސް އިންތިޚާބާ ދިމާކޮށް ބޮޑު ސަމާލުކަމެއް ލިބުނު މި މައްސަލަ ފެންމަތިވީ ވިޖޭ އެ އިންތިޚާބު ކާމިޔާބުކޮށް ޗީފް މިނިސްޓަރު ކަމާ ހަވާލުވި ދުވަސްވަރާ ގާތުގައެވެ.

ރިޕޯޓުތައް ބުނާގޮތުގައި ވިޖޭ ލޯބީގެ ގުޅުން ބާއްވާ ކަމަށް ވަނީ ތަމަޅަ ފިލްމީ ތަރި ޓްރިޝާ ކްރިޝްނަން އާއި އެވެ. ވިޖޭ ޗީފް މިނިސްޓަރުކަމުގެ ހުވާކުރުމުގެ ރަސްމިއްޔާތުގައިވެސް އަންހެނުންނާއި ދެ ދަރިން ބައިވެފައިނުވާއިރު ޓްރިޝާ އެ ރަސްމިއްޔާތުގައި ބައިވެރި ދިން ސަޕޯޓުން ގިނަ ބައެއްގެ ސަމާލުކަން އެކަމަށް ހުއްޓުނު ކަމަށް ރިޕޯޓުތައް ބުނެ އެވެ.

ވިޖޭ މީގެ ކުރިން ބުނެފައިވާ ގޮތުގައި އެ ކައިވެންޏަކީ ލޯބިން ކުރި ކައިވެންޏެއް ނޫނެވެ. ދެމީހުން ކައިވެނި ކުރީ މައިންބަފައިން ބޭނުންވެގެން ކަމަށާއި މައިންބަފައިން ދައްކާ ބައިވެރިއަކު އިހްތިޔާރު ކުރުމުން ދިރިއުޅުން ރީތި ވާނެ ކަމަށް ވިޖޭ ދިން އިންޓަވިއުއެއްގައި ބުނެފައިވެ އެވެ.

މި މައްސަލަ ވަގުތީ ގޮތުން ނިމުމަކަށް އައި ނަމަވެސް ކޯޓުން ވަނީ ބޭނުންވެއްޖެ ހާލަތެއްގައި އަލުން ދައުވާ ހުށަހެޅުމުގެ ހައްގު ސަންގީތާއަށް އޮތް ކަމަށް އަންގާފައި އެވެ.