ތައިލެންޑުގެ ނޮންތަބޫރީ ޕްރޮވިންސްގެ ބާންކްރުއައި ޑިސްޓްރިކްޓުގައި ހުންނަ ސްކޫލެއްގެ ދަރިވަރަކު ބަޑިން ހަމަލާ ދީ ޓީޗަރަކު މަރާލުމަށް ފަހު އަމިއްލައަށް މަރުވެއްޖެއެވެ.

މިއަދު ހިނގި އެ ހާދިސާގައި ޓީޗަރެއްގެ އިތުރުން ތިން ދަރިވަރަކަށް އެކި ވަރުގެ ޒަޚަމްތައް ލިބިފައިވާ ކަމަށް ތައިލެންޑު ފުލުހުން ބުނެފައިވެ އެވެ. ހަމަލާ ދިން ދަރިވަރު ވަނީ އެ ހަމަލާތައް ދިނުމަށް ފަހު އަމިއްލަ ގަޔަށް ބަޑިޖަހައި މަރުވެފައި ކަމަށް ފުލުހުން ބުންޏެވެ.

Advertisement

ބެންކޮކުގެ ހުޅަނގު އުތުރު ސަރަހައްދުގައި ހުންނަ ޑެބްސިރިން ނޮންތަބޫރީ ސްކޫލުގައި ހިނގި މި ހާދިސާއާ ގުޅިގެން ނޫސްތަކަށް މައުލޫމާތު ދިން ބައެއް ދަރިވަރުން ބުނެފައިވާގޮތުގައި ފުރަތަމަ ހީކުރީ ފަޓާސް ނޫނީ އެއްޗެއް ޖެހި އަޑު އިވުނީ ކަމަށެވެ. އެ ކުދިން ބުނީ ފުރަތަމަ ޖެހި ޖެހިގެން ބަޑި ޖަހަމުން ދިޔަ އަޑު އިވުމަށް ފަހު  މެދުކެނޑުމަށް ފަހު އަނެއްކާވެސް ދެތިން ފަހަރު ބަޑީގެ އަޑު އިވުނު ކަމަށެވެ.

މި ހަމަލާދިން ދަރިވަރަކީ އެ ސްކޫލްގެ ކޮން ގްރޭޑެއްގައި ކިޔަވާ އަދި ސިއްހީ މައްސަލައެއް ހުންނަ ދަރިވަރެއް ކަމެއް އަދި ސްކޫލުން ހާމައެއް ނުކުރެ އެވެ. އެ ސްކޫލަކީ 3،000 އަށްވުރެ ގިނަ ދަރިވަރުން ތައުލީމް ހާސިލް ކުރާ ސްކޫލެކެވެ.

މި އަހަރުގެ ފެބްރުއަރީ މަހު އެ ޤައުމުގެ ދެކުނުގައި ހުރި ސްކޫލެއްގައި ފުރާވަރު އުމުރުގެ ކުއްޖަކު ބަޑި ޖެހި ހާދިސާގައި ޕްރިންސިޕަލް މަރުވެ، ދެ ދަރިވަރަކު ޒަޚަމްވެފައިވެއެވެ. އަދި 2022 ވަނަ އަހަރު ކުރީގެ ފުލުހެއް ބަޑިއާއި ވަޅިއެއް ހިފައިގެން ނާސަރީއަކަށް ވަދެ 24 ކުޑަކުދިންނާއި 12 ބޮޑެތި މީހުން މަރާލި ހާދިސާއަކީ ތައިލެންޑުގެ ތާރީޚުގައި ހިނގި އެންމެ ބޮޑު ގަތުލުޢާންމުތަކުގެ ތެރޭގައި ހިމެނޭ ހާދިސާއެކެވެ.

ތައިލެންޑަކީ ސަރަހައްދީ ގޮތުން ބަޑި ގެންގުޅުމުގެ ނިސްބަތް އެންމެ މަތީ ޤައުމުތަކުގެ ތެރޭގައި ހިމެނޭ ޤައުމެކެވެ. އެ ޤައުމުގައި ގާތްގަނޑަކަށް 10 މިލިއަން ބަޑި ދައުރުވަމުންދާ ކަމަށް ލަފާކުރެވެއެވެ. މިއީ ކޮންމެ ހަތް މީހަކަށް ބަޑިއެއް ކަމަށް ތަފާސް ހިސާބުން ދައްކައެވެ.