އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގައި ބޭނުންކުރާ ހަތިޔާރު ހުސްވަމުންދާ ކަމުގެ މަޢުލޫމާތު ރަނގަޅަށް ނުލިބޭ ކަމަށް ބުނެ ދިފާޢީ ވަޒީރު ޕީޓް ހެގްސެތާ ދެމެދު ހޫނު ބަހުސެއް ހިނގާފައިވާ ކަމަށް ވޮޝިންޓަން ޕޯސްޓުން ރިޕޯޓުކޮށްފިއެވެ.

މި ކަންތައް ހިނގީ މިދިޔަ ހަފުތާގައި ކެމްޕް ޑޭވިޑުގައި ބޭއްވި ކެބިނެޓް ބައްދަލުވުމެއްގެ ހަވާސާގައެވެ. މި ބައްދަލުވުމުގެ ތެރޭގައި ހަތިޔާރުގެ ދަތިކަން ހައްލުވެފައިވާ ކަމަށް ކުރިން ޤަބޫލުކުރެވިފައި އޮތް ކަމަށާއި ނަމަވެސް އެކަން އެހެން ނުވާ ކަމަށް ޓްރަމްޕް ބުނި ކަމަށް އެ ނޫހުން ބުންޏެވެ. ދުރު ރާސްތާ ގައިޑެޑް މިސައިލާއި ވައިގެ ދިފާޢީ ނިޒާމުތަކުގެ ދަތިކަމަކީ ފަހަކަށް އައިސް އީރާނަށް ބޮޑެތި ހަމަލާތައް ދިނުން މަޑުޖައްސައިލި ސަބަބެއް ކަމަށް ވެސް އެ ރިޕޯޓުގައި ފާހަގަކޮށްފައިވެއެވެ.

Advertisement

ވޮޝިންޓަން ޕޯސްޓުން ރިޕޯޓުކޮށްފައިވާ ގޮތުގައި ހަނގުރާމައިގެ ފުރަތަމަ މަހުގެ ތެރޭގައި 850 އަށް ވުރެ ގިނަ ޓޮމެހޯކް ކްރޫޒް މިސައިލާއި 1,000 އަށް ވުރެ ގިނަ ޕެޓްރިއޮޓް އަދި ތާޑް ސިސްޓަމް ބޭނުންކޮށްފައިވެއެވެ. އޭގެ އިތުރުން ފުރަތަމަ ހަފުތާތަކުގެ ތެރޭގައި 1,300 އަށް ވުރެ ގިނަ އެޓެކަމްސް ބެލިސްޓިކް މިސައިލް ވެސް ބޭނުންކޮށްފައިވާ ކަމަށާއި ޔޫކްރެއިނުން ވެސް ޑިމާންޑް ބޮޑު އެ މިސައިލްގެ ސްޓޮކް ގާތްގަނޑަކަށް ހުސްވެފައިވާ ކަމަށް ރިޕޯޓުގައި ބުނެފައިވެއެވެ.

ޓްރަމްޕް މައްސަލަ ނެގުމުން ހެގްސެތް ދިފާޢީ ވާހަކަ ދައްކައި ދަތިކަމުގެ ޒިންމާ އޭނާގެ ނައިބު ސްޓީފެން ފައިންބާގްގެ ބޮލުގައި އެޅުވި ކަމަށް އެ ރިޕޯޓުގައި ބުނެފައިވެއެވެ. ނަމަވެސް ވައިޓް ހައުސްގެ ތަރުޖަމާން ކެރޮލީން ލެވިޓް ވަނީ މި ވާހަކަތައް ދޮގުކޮށްފައެވެ.

"މިއީ ސައްތައިން ސައްތަ ފޭކް ނިއުސް. ހަމަ ދުވަހަކު ވެސް ހިނގައިފައި ނުވާ ކަމެއް. ސެކްރެޓަރީ ހެގްސެތާ މެދު ރައީސް ޓްރަމްޕް ފުރިހަމައަށް އިތުބާރު ކުރައްވާ" ކެރޮލީން ލެވިޓް ބުންޏެވެ. ޕެންޓެގަންގެ ތަރުޖަމާން ޝޯން ޕާނެލް ވެސް ވަނީ ހަތިޔާރު ހުސްވާ ކަމާއި އެތެރޭގެ ޚިޔާލު ތަފާތުވުންތައް ހުރި ކަމުގެ ވާހަކަތަކަކީ ޚިޔާލީ ވާހަކަތަކެއް ކަމަށް ބުނެފައެވެ.

ޓްރަމްޕް ބުރާސްފަތި ދުވަހު ޓްރުތް ސޯޝަލްގައި ލިޔެފައި ވަނީ ވަކި ބާވަތްތަކެއްގެ ބޮޑެތި ޢަދަދުގެ ހަތިޔާރު އެމެރިކާގައި ހުރި ކަމަށާއި ބޮޑެތި ޢަދަދުތައް މިހާރު ވެސް އުފައްދައި ފޮނުވަމުންދާ ކަމަށެވެ. އެ ޕޯސްޓުގައި ސިއްރު މަޢުލޫމާތު ލީކުކުރާ ފަރާތްތައް ހޯދަމުންދާ ކަމަށާއި އެ ފަރާތްތަކަށް ދިގު މުއްދަތުގެ ޖަލު ހުކުމް ހޯދާނެ ކަމަށް ވެސް ބުނެފައިވެއެވެ.

މި ރިޕޯޓު ފެންމަތިވެފައި ވަނީ އީރާނާ ދެމެދު އުފެދިފައިވާ ނުތަނަވަސްކަމުގެ ތެރޭގައި ބޮޑު ހަމަލާއެއް ދިނުން ހުއްޓައިލީ ކަމަށް ޓްރަމްޕް މި ހަފުތާ ކުރީކޮޅު ބުނެފައި ވަނިކޮށެވެ.