ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންނަށް ވެވަޑައިގެންނެވި އެންމެހައި ވައުދުތައް 2028 ވަނަ އަހަރުގެ ދެވަނަ ކުއާޓަރު ނިމުމުގެ ކުރިން ފުއްދަވާނެ ކަމުގެ ޔަގީންކަން އެމަނިކުފާނު ދެއްވައިފި އެވެ.

ރައީސް މިހެން ވިދާޅުވީ އއ. އުކުޅަހުގައި ބޭއްވި ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޖަގަހަ ޖަލްސާގައި ވާހަކަފުޅުދައްކަވަމުންނެވެ. ދެވަނަ ކުއާޓާގެ ގޮތުގައި ބަލާނީ އެ އަހަރެއްގެ އޭޕްރިލް މަހުން ފެށިގެން ޖޫންގެ ނިޔަލަށެވެ.

Advertisement

އެ ޖަލްސާގައި ރައީސް ވިދާޅުވީ އިޤުތިޞާދީ އަދި އިޖުތިމާޢީ ދާއިރާތަކާއި އުމްރާނީ ތަރައްޤީގެ ހުރިހާ ރޮނގަކުން ބެލިޔަސް ސަރުކާރުން ރާވާފައިވާ ޕްލޭންތައް ތަންފީޒުކުރުން ހުއްޓުމެއް ނެތި ކުރިއަށް ގެންދަވާ ކަމަށެވެ. މި އަހަރުގެ ބާކީ ދުވަސްތަކާއި އަންނަ އަހަރާ އެކު 2028 ގެ ދެވަނަ ކުއާޓަރާ ހަމައަށް ދާއިރު ހުރިހާ ވައުދެއް ފުރިހަމަކުރައްވާނެ ކަމުގެ ޔަގީންކަން ރައީސް ދެއްވި އެވެ.

އެމަނިކުފާނު ވިދާޅުވީ ޕްލޭނާ އެކީގައި ރައްޔިތުންނަށް ވެފައިވާ ވައުދުތައް ފުއްދުމުގަ ފުރިހަމަ ކާމިޔާބީ އިރާދަކުރެއްވިއްޔާ ހާސިލް ކުރެވޭނެ ކަމުގެ ޔަގީންކަން އެބައޮތް ކަމަށެވެ.

އެ މަނިކުފާނު އިތުރަށް ވިދާޅުވީ ތަފާތު މަޝްރޫޢުތަކުގެ ތަފްސީލް ރައްޔިތުންނާ ގާތުން މަސައްކަތްކުރާ މިނިސްޓްރީތަކާއި ކުންފުނިތައް މެދުވެރިކޮށް ހާމަކުރައްވަމުން ގެންދަވާނެ ކަމަށެވެ.

ރައީސް މި ޔަގީންކަން ދެއްވީ ސަރުކާރުގެ މަޝްރޫޢުތައް ހިންގާނެ ފައިސާ ނެތް ކަމަށް އިދިކޮޅު އެމްޑީޕީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ދާދި ފަހުން ވިދާޅުވެފައި ވަނިކޮށެވެ. އަދި ސަރުކާރުގެ ގިނަ ވައުދުތައް ކުރިޔަށްދާތަން ނުފެންނަކަމަށް ގިނަ ބަޔަކު ބުނަމުން ދަނިކޮށެވެ.