ސްރީ ލަންކާގެ މެދުތެރޭ ފަރުބަދަމަތީ ހިސާބުތަކަށް ބޯކޮށް ވާރޭ ވެހި ބިންގަނޑު ކެނޑުމާއި ފެންބޮޑުވުމުގެ ހާދިސާތަކެއް ހިނގައި މަދުވެގެން ހަތް މީހުން މަރުވެ އެ ސަރަހައްދުގެ ސްކޫލްތައް ބަންދުކޮށްފިއެވެ.

މި ކާރިސާ ކުރިމަތިވީ ސައި ހައްދާ ފަރުބަދަމަތީ ސަރަހައްދަށެވެ. މިއީ މިދިޔަ ނޮވެމްބަރު މަހު އެރި ސައިކްލޯން ޑިޓްވާގެ ގެއްލުންތަކުން އަރައިގަތުމުގެ މަސައްކަތް އަދިވެސް ހިނގަމުންދާ ހިސާބެކެވެ.

Advertisement

އެ ތޫފާނުގައި ގާތްގަނޑަކަށް 640 މީހުން މަރުވެ 4.1 ބިލިއަން ޑޮލަރުގެ ގެއްލުން ލިބުނެވެ.

ލަންކާ ސަރުކާރުގެ ޑިޒާސްޓާ މެނެޖްމެންޓް ސެންޓަރުގެ ތަރުޖަމާނު ޕްރަދީޕް ކޮޑިއްޕިލީ ވިދާޅުވީ މެދުތެރޭ ހިސާބުގެ ދެ ގެއެއް ބިންގަނޑު ކެނޑި ވެއްޓިގެން ފަސް މީހުން މަރުވި ކަމަށެވެ. އަދި ފެންބޮޑުވުމުގެ ސަބަބުން އިތުރު ދެ މީހުން މި ދުނިޔެ ދޫކުރި ކަމަށެވެ.

އެ ހާދިސާތަކުގައި 129 ގެއަކަށް ގެއްލުން ލިބި 3,500 އެއްހާ މީހުން ރައްކާތެރި ތަންތަނަށް ބަދަލުކޮށްފައިވާ ކަމަށް ވެސް އޭނާ ވިދާޅުވިއެވެ.

ފެނުގެ އަޑީގައި ތާށިވެފައި ތިބި ރައްޔިތުންނާ ހަމައަށް ފޯރުމަށް ކަނޑުގެ ސިފައިންނާއި އެއްގަމު ސިފައިންގެ ޔުނިޓުތައް ފޮނުވައިފައިވެއެވެ. ލަންކާގެ ހީރު ޓީވީން ދައްކާ ގޮތުގައި ސިފައިން ވަނީ ފެންބޮޑުވެފައިވާ މަގުތަކުގެ ތެރެއިން ހިނގާފައި ގޮސް ޢާއިލާތައް ސަލާމަތްކޮށްފައެވެ.

ނުވާރާ އެލިޔާ އާއި ބަދުއްލާ ފަދަ ޑިސްޓްރިކްޓްތައް ހިމެނޭ ސްރީ ލަންކާގެ މެދުތެރޭ ސަރަހައްދަކީ އުސް ފަރުބަދަމަތީ ބިމެއް އޮތް މޫސުމީ ވިއްސާރައިގައި ބިންގަނޑު ކެނޑުމުގެ ނުރައްކާ ބޮޑު ހިސާބެކެވެ. 2025 ވަނަ އަހަރުގެ ފަހުކޮޅު ސައިކްލޯން ޑިޓްވާއާ ގުޅިގެން ހަމަ މި ސައި ހައްދާ ސަރަހައްދުގައި ބިންގަނޑު ކެނޑި ފެންބޮޑުވެ އެތައް ބަޔަކު މަރުވެ އެ ފަހަރުވެސް މުޅި ޤައުމުގެ ސްކޫލްތަކާއި އޮފީސްތައް ބަންދުކުރިއެވެ. ސްކޫލްތައް އަލުން ހުޅުވާނެ ތާރީޚެއް ކަމާ ބެހޭ ފަރާތްތަކުން އަދި ހާމަކޮށްފައެއް ނުވެއެވެ. އެ ނިންމުން ބިނާވާނީ ކުރިއަށް އޮތް ދުވަސްތަކުގައި މޫސުން ބަދަލުވާ ގޮތެއްގެ މައްޗަށް ކަމަށް އޮފިޝަލުން ބުނެފައިވެއެވެ.