ބޭންކް އޮފް މޯލްޑިވްސް (ބީއެމްއެލް) އިން ތަޢާރަފުކޮށްފައިވާ "އިންވެސްޓްމެންޓްސް" ޕޯޓަލް މެދުވެރިކޮށް ޑޮލަރު އިންވެސްޓްކުރާ ފަރާތްތަކަށް ފައިދާގެ ގޮތުގައި ޖެހޭ ޢަދަދު ޑޮލަރުން ދޫކުރާ ގޮތަށް ބަދަލުކޮށްފިއެވެ.

އެ ބޭންކުން މިއަދު ހާމަކުރި ގޮތުގައި މި ބަދަލާ އެކު އިންވެސްޓްކުރާ ދުވަހު ޖުމުލަ ޢަދަދާއި ފައިދާ ވެސް ޑޮލަރުން ކަސްޓަމަރުގެ އެކައުންޓަށް ޖަމާކުރެވޭނެއެވެ. ނަމަވެސް ޖެހިގެން އަންނަ ދުވަހު އިންވެސްޓްކުރި ޢަދަދު ރުފިޔާ އިން ބޭންކަށް މާރުކުރަން ޖެހެއެވެ.

Advertisement

ބީއެމްއެލް އިން ބުނީ އެ ޢަމަލު ހިންގާނީ ބޭންކާއި އިންވެސްޓް ކުރާ ފަރާތާ ދެމެދު ޤާއިމުކުރެވޭ އެއްބަސްވުމެއްގެ ދަށުން ކަމަށެވެ.

މި ޚިދުމަތް ބޭނުންކޮށްގެން 25 އިންސައްތައާ ހަމައަށް ފައިދާ ލިބުމުގެ ފުރުޞަތު އޮވެއެވެ. މިސާލަކަށް 1000 ޑޮލަރު އިންވެސްޓް ކޮށްފިނަމަ ހަމަ އެ ދުވަހު 1260 ޑޮލަރު ކަސްޓަމަރުގެ އެކައުންޓަށް ވަންނާނެއެވެ. އޭގެ ތެރެއިން އިންވެސްޓްކުރި 1000 ޑޮލަރު ޖެހިގެން އަންނަ ދުވަހު ރުފިޔާ އިން ބޭންކަށް ދައްކަން ޖެހޭ އިރު ބާކީ 260 ޑޮލަރު ފައިދާގެ ގޮތުގައި ކަސްޓަމަރަށް ލިބޭނެއެވެ.

ރާއްޖޭގެ އެންމެ ބޮޑު ބޭންކުން މި ޕޯޓަލް ފުރަތަމަ ހުޅުވައިލީ މިދިޔަ ޖޫން މަހުގެ 30 ވަނަ ދުވަހުއެވެ. އިންޓަނެޓް ބޭންކިންގެ އިތުރުން ބީއެމްއެލް މޮބައިލް އެޕް މެދުވެރިކޮށް ވެސް މި ޕޯޓަލަށް އިންވެސްޓް ކުރެވެއެވެ.

ބޭންކަށް ލިބޭ ބޭރު ފައިސާ އިތުރުކުރުމުގެ ބޭނުމުގައި ތަޢާރަފުކުރި މި ޕްލެޓްފޯމް މެދުވެރިކޮށް ޑޮލަރު ލިބޭ މިންވަރު އިތުރުވެގެން ދިއުމުން ކާޑުތަކުގެ ޑެއިލީ ލިމިޓްތަކަށް ލުއިތަކެއް ދެވޭނެ ކަމަށް ވެސް ބީއެމްއެލް އިން ބުނެފައިވެއެވެ.