އިންޑިއާގެ ބޮޑުވަޒީރު ނަރެންދުރަ މޯދީގެ ވީޑިއޯ ޕޯސްޓެއް ފޭސްބުކުން ވަގުތީ ގޮތުން ނެގި މައްސަލައިގައި މެޓާގެ ވެރިޔާ މާކް ޒަކަބާގަށް މާފަށް އެދެން ތިން ދުވަހުގެ މުހުލަތެއް އިންޑިއާގެ ޕާލަމެންޓުގެ ކޮމިއުނިކޭޝަންސް އެންޑް އިންފޮމޭޝަން ޓެކްނޮލޮޖީ ކޮމިޓީން ދީފިއެވެ.

ބީޖޭޕީގެ މެމްބަރު ނިޝީކާންތް ދުބޭ އިސްކޮށް ހުންނެވި އެ ކޮމިޓީން ސިފަކޮށްފައިވާ ގޮތުގައި 1.4 ބިލިއަން ރައްޔިތުންގެ މަންދޫބެއް ކަމުގައިވާ މޯދީގެ ވީޑިއޯ ޑިލީޓް ކުރުމަކީ ޑިމޮކްރެސީއަށް ދިން ހަމަލާއެކެވެ. ކޮމިޓީން އިންޒާރު ދީފައިވާ ގޮތުގައި މި މައްސަލައިގައި ޒިންމާވާ ފަރާތްތަކާ ދެކޮޅަށް ފިޔަވަޅު ނާޅައިފި ނަމަ ސޯޝަލް މީޑިއާ ޕްލެޓްފޯމްތަކަށް ޤާނޫނީ ރައްކާތެރިކަން ކަށަވަރުކޮށްދޭ "ސޭފް ހާބާ" މާއްދާ ބާޠިލުކޮށް ޒަކަބާގާ ދެކޮޅަށް ދައުވާ ކުރެވިދާނެ ކަމަށެވެ.

Advertisement

ޖުލައި 23 ގައި މޯދީ ޝެއާ ކުރެއްވި ވީޑިއޯ އެންމެ ފުރަތަމަ އިންސްޓަގްރާމްގައި ޕޯސްޓް ކުރެއްވުމަށް ފަހު ފޭސްބުކަށް ވެސް ލެއްވިއެވެ. އެ ވީޑިއޯއަކީ ޒުވާން ޖީލަށް އަމާޒުކޮށް ކަރުދާސް ލީކުވުމާ ދެކޮޅަށް ހަރުކަށި ފިޔަވަޅު އަޅުއްވާނެ ކަމުގެ ޔަޤީންކަން ދެއްވި ސެލްފީ ވީޑިއޯއެކެވެ. ފޭސްބުކް ވާޝަން މެޓާއިން ވަގުތީ ގޮތުން ރެސްޓްރިކްޓް ކުރި ނަމަވެސް ފާޑުކިޔުންތައް ބޮޑުވެ އެ ކުންފުނިން ވަނީ ވީޑިއޯ އަލުން ރީސްޓޯ ކޮށްފައެވެ.

މެޓާއިން ވީޑިއޯ ނެގުނީ "ޓެކްނިކަލް މައްސަލައެއް" ގެ ސަބަބުން ކަމަށް ބުނެ މާފަށް އެދުނު ނަމަވެސް އިންޑިއާގެ އައިޓީ މިނިސްޓްރީން ބުނީ އެ އުޒުރަކީ "އެކަށީގެންވާ" އުޒުރެއް ނޫން ކަމަށެވެ. ޓެކްނޮލޮޖީ ކުންފުންޏެއްގެ ހައިސިއްޔަތުން އަމިއްލަ ސިސްޓަމް ރަނގަޅުކުރަން އަވަސް ކުރަން ޖެހޭނެ ކަމަށް ވެސް އެ މިނިސްޓްރީން ބުނެފައިވެއެވެ.

މިކަމާއި ގުޅޭގޮތުން މެޓާއިން އަދި އެއްވެސް އެއްޗެއް ހާމައެއް ނުކުރެ އެވެ.

ކުޑަކުދިންގެ ޖިންސީ ކޮންޓެންޓާ ގުޅޭ ގޮތުން ވެސް ޕާލަމެންޓްގެ އެ ކޮމިޓީން ވަނީ ހުރިހާ ސޯޝަލް މީޑިއާ ޕްލެޓްފޯމްތަކަށް އިންޒާރު ދީފައެވެ. ގޫގުލް ޔޫޓިއުބް އެކްސް ފޭސްބުކް ވަޓްސްއެޕް އިންސްޓަގްރާމް އަދި ސްނެޕްޗެޓް ހިމެނޭ ގޮތަށް އެ ޕްލެޓްފޯމްތަކުން ކުޑަކުދިންގެ ޖިންސީ އެބިއުޒް މެޓީރިއަލް (ސީއެސްއޭއެމް) ގެ ޤަވާއިދުތަކަށް ތަބާ ނުވެއްޖެ ނަމަ ދައުވާ ކުރާނެ ކަމަށް ކޮމިޓީން ބުނެފައިވެއެވެ.

މެޓާއާ ދެކޮޅަށް އިންޑިއާ ސަރުކާރުން ދަނީ ގިނަ މައްސަލަތަކެއްގައި ޕްރެޝަރު ބޮޑުކުރަމުންނެވެ.