ބޭންކް އޮފް މޯލްޑިވްސް (ބީއެމްއެލް) ގެ ހިންގުމުގެ އޮނިގަނޑު މުރާޖަޢާކޮށް އެގްޒެކެޓިވް ޓީމުގެ ހަތަރު ބޭފުޅެއްގެ މަގާމާއި ދައުރަށް ބަދަލުތަކެއް ގެނެސްފިއެވެ.

އެ ބޭންކުން ހާމަކުރި ގޮތުގައި މި ބަދަލު އަމާޒުކޮށްފައި ވަނީ ޒިންމާދާރުކަން ހަރުދަނާކުރުމާއި ކަސްޓަމަރުންނަށް ދެމުންދާ ޚިދުމަތް އަވަސްކޮށް ފެންވަރު ރަނގަޅުކުރުމަށެވެ. ދުރުރާސްތާގެ ލަނޑުދަނޑިތަކާ އެއްގޮތަށް ބޭންކުގެ މަސައްކަތްތައް ތަރުތީބުކުރުމުގެ ގޮތުން އެޅި ފިޔަވަޅެއް ކަމަށް ވެސް ބީއެމްއެލުން ބުނެފައިވެއެވެ.

Advertisement

ކުރިއަށް އޮތް ހަ މަސް ދުވަހަށް ގެނެވުނު ބަދަލުތަކުގެ ތެރޭގައި ކުރިން ޗީފް މާކެޓިން އޮފިސަރުގެ ގޮތުގައި ހުންނެވި އައިޝަތު ޒަމްރާ ޒާހިރު ޗީފް ކޮމާޝަލް އޮފިސަރަށް ބަދަލުކުރުމާއި ޗީފް ބިޒްނަސް އޮފިސަރުގެ މަގާމުގައި ހުންނެވި މޫސާ ނިމާލް ޗީފް މާކެޓިން އޮފިސަރަށް ބަދަލުކުރުން ހިމެނެއެވެ. އޭގެ އިތުރުން ޗީފް ކްރެޑިޓް އޮފިސަރުގެ މަގާމުގައި ހުންނެވި ރަޝްފާ ޖައުފަރު ޗީފް ރިސްކް އޮފިސަރަށް އަދި އެ މަގާމުގައި ކުރިން ހުންނެވި ގެރީ ލޯޓަން ޗީފް ކްރެޑިޓް އޮފިސަރަށް ވަނީ ބަދަލުކޮށްފައެވެ.

ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު މުހައްމަދު ޝަރީފް ވިދާޅުވީ ބޭންކް މިހާރު އޮތީ ވަރުގަދަ މާލީ ބިންގަލެއްގެ މަތީގައި ކަމަށާއި ކަސްޓަމަރުންގެ ޚިދުމަތް ފުރިހަމަކޮށް ކުރިއެރުން ހަލުވިކުރުމަކީ މި ބަދަލުގެ މައިގަނޑު މަގުސަދު ކަމަށެވެ.

އޭނާ ވިދާޅުވީ ވަގުތީ ގޮތުން މި ގެނެވޭ ބަދަލަކީ ލީޑަޝިޕް ވަރުގަދަކުރުމަށްޓަކައި ކުރެވޭ އިންވެސްޓްމަންޓެއް ކަމަށެވެ. ތަޖުރިބާކާރު ވެރިންނަށް އެ ބޭފުޅުންގެ ދާއިރާއާ ގުޅުންހުރި އެހެން ދާއިރާތަކުގެ ތަޖުރިބާ ހޯދައިދިނުމަކީ އެ ބޭފުޅުންގެ ހުނަރު އިތުރުވުމުގެ އިތުރުން މުޅި މުއައްސަސާއަށް ލިބޭނެ ވަރަށް ބޮޑު ކުރިއެރުމެއް ކަމަށް ޝަރީފު ވިދާޅުވި އެވެ.

މިއީ މި ޓީމަށް އެބޭފުޅުންގެ އޮތް އިތުބާރާއި ހުރިހާ ފަންތިއެއްގައި ދިވެހި ހުނަރުވެރި ވެރިން ބިނާކުރުމަށް ބޭންކުން ދޭ އަހުމިއްޔަތު ހާމަކޮށްދޭ ކަމެއް ކަމަށް ވިދާޅުވި އެވެ.

މި ބަދަލުތަކަކީ ބޭންކުގެ އެތެރޭގެ ހިންގުމާ ގުޅޭ ބަދަލުތަކެއް ކަމުން ކަސްޓަމަރުންނަށް ފޯރުކޮށްދެމުންދާ އުފެއްދުންތަކާއި ޚިދުމަތްތަކަށް އަދި މިހާރު ޢަމަލުކުރެވެމުންދާ އުސޫލުތަކަށް އެއްވެސް ބަދަލެއް ނާންނާނެ ކަމަށް ބީއެމްއެލުން ބުނެފައިވެއެވެ.