ތައިލެންޑުގެ ޕުކެޓުން އިންޑިއާގެ ނިއުދިއްލީއަށް ދަތުރުކުރި އެއާ އިންޑިއާގެ ފްލައިޓް އޭއައި2379 އަށް މިއަދު ދިމާވި ވައިގެ ކުއްލި ހާލަތުގެ ސަބަބުން ބޯޓުގެ އުސްމިން ކުއްލިއަކަށް ތިރިވެ ނުރައްކާތެރި ހާދިސާއެއް ހިނގައިފި އެވެ.

އިންޑިއާގެ ކަމާ ބެހޭ ފަރާތްތަކާއި ހަވާލާދީ ރިޕޯޓުތައް ބުނާގޮތުގައި މި ހާދިސާގައި އެ ފްލައިޓުން ދަތުރު ކުރި 14 މީހަކަށް އަނިޔާވެފައިވެ އެވެ. އޭގެ ތެރޭގައި ހިމެނެނީ 10 ފަސިންޖަރަކާއި ހަތަރު ކްރޫއިންނެވެ.

Advertisement

އެ ފަރާތްތައް ވަނީ ދިއްލީގެ ގުރުގާމްގައި ހުންނަ މެޑާންޓާ ހޮސްޕިޓަލާއި ވާސަންތް ކުންޖުގައި ހުންނަ އިންޑިއާ ސްޕައިނަލް އިންޖަރީ ސެންޓަރަށް ފަރުވާ ދިނުމަށް ބަދަލުކޮށްފައެވެ.

އޭގެ ތެރެއިން އެންމެ ބޮޑަށް އަނިޔާ ލިބިފައިވަނީ ކެބިން ކުރޫއަކަށެވެ. އެހެން މީހުންނަށް ލިބިފައިވަނީ ކުދިކުދި އަނިޔާ އެވެ.

ފްލައިޓުން ދަތުރު ކުރި ބައެއް މީހުން މީޑިއާގައި ބުނެފައިވަނީ އެ ހާލަތުގައި އެމީހުން ދުނިޔެ ދޫކުރުމުގެ އިހުސާސް ކުރެވުނު ކަމަށެވެ.

އިންޑިއާގެ ވައިގެ ދަތުރުފަތުރާ ބެހޭ ރެގިއުލޭޓަރީ އިދާރާ ޑައިރެކްޓޮރޭޓް ޖެނެރަލް އޮފް ސިވިލް އެވިއޭޝަން (ޑީޖީސީއޭ) ގެ އޮފިޝަލަކު ބުނީ ގާތްގަނޑަކަށް 300 ފޫޓު ކުއްލިއަކަށް ތިރިވި ކަމަށް ޕައިލެޓް ރިޕޯޓުކޮށްފައިވާ ކަމަށެވެ. އަދި ފްލައިޓު ކުއްލިއަކަށް ތިރިވީ ވަރަށް ބޮޑަށް ތެޅިގަނެފައި ކަމަށް ރިޕޯޓު ކުރި ކަމަށެވެ.

ބޯޓު ޖެއްސުމާ އެކު ފަސިންޖަރުންނަށް ފަރުވާ ދިނުމަށް މެޑިކަލް ޓީމުތައް ތައްޔާރުކޮށްފައި އޮތް ކަމަށް މަސްދަރުތަކާ ހަވާލާދީ ރިޕޯޓުތައް ބުނެއެވެ. ބޯޓު ރައްކާތެރިކަމާ އެކު ޖައްސައި ހުރިހާ ފަސިންޖަރުންނާއި ކުރޫ މެންބަރުން ބޯޓުން ފޭބި ކަމަށެވެ.

ފްލައިޓް ރޭޑާ24 ގެ ޑޭޓާ ދައްކާ ގޮތުން އެ ބޯޓު ޕޫކެޓުން ފުރީ ހެނދުނު 8:25 ގައެވެ. އަދި ދިއްލީގެ އިންދިރާ ގާންދީ އިންޓަނޭޝަނަލް އެއާޕޯޓަށް ޖައްސާފައިވަނީ ހެނދުނު 11:00 ގައެވެ.