ނުކުޅެދުންތެރިކަން ހުންނަ މީހުންގެ ގޮތުގައި ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގައި މިދިޔަ އޭޕްރިލް މަހުގެ ނިޔަލަށް އެންމެ ގިނައިން ރަޖިސްޓްރީކޮށްފައިވަނީ ފިރިހެނުން ކަމަށް ތަފާސް ހިސާބުން ދައްކައިފި އެވެ.

އެންސްޕާގެ ތަފާސް ހިސާބު ދައްކާގޮތުން އޭޕްރިލް މަހުގެ ނިޔަލަށް އެ އިދާރާގައި 8،915 ފިރިހެނުން ނުކުޅެދުންތެރިކަން ހުންނަ މީހުންގެ ގޮތުގައި ރަޖިސްޓްރީކޮށްފައިވެ އެވެ. އޭގެ ތެރެއިން 18 އަހަރުން ދަށުގެ 3،636 ކުދިން ހިމެނޭއިރު 18 އަހަރާއި 64 އަހަރާ ދެމެދުގެ 3،989 މީހުން އަދި 65 އަހަރުން މަތީގެ 1290 މީހުން ހިމެނެ އެވެ.

Advertisement

އެންސްޕާއިން ބުނީ އެންސްޕާއިން ބުނީ އަންހެނުން ތެރެއިން ނުކުޅެދުންތެރިކަން ހުންނަ މީހުންގެ ގޮތުގައި އެ ތިން އުމުރުފުރާއިން ރަޖިސްޓްރީކޮށްފައިވަނީ 6،488 މީހުން ކަމަށެވެ. މުޅީ ޖުމްލަ ރަޖިސްޓްރީ ކޮށްފައިވަނީ 15،403 މީހުން ކަމަށް ތަފާސް ހިސާބުން ދައްކަ އެވެ.

އެ އިދާރާއިން ބުނީ ރަޖިސްޓްރީކޮށްފައިވާ މީހުންގެ ތެރޭގައި އެންމެ ގިނައީ ޖިންމާނީ ނުކުޅެދުންތެރިކަން ހުރި މީހުންނެވެ. އެގޮތުން ހިނގާބިނގާވެ އުޅުމަށް ނުކުޅެދި މަސައްކަތް ކުރުމަށް ނުކުޅެދިފައިވާ 4،287 މީހަކު ވަނީ އެ ކެޓަގަރީގައި ރަޖިސްޓްރީކޮށްފައި އެވެ.

ރަޖިސްޓްރީ ކޮށްފައިވާ މީހުންގެ ތެރެއިން އެންސްޕާއިން މާލީ އެހީ ދީފައިވަނީ 15،146 މީހަކަށެވެ. އެއީ 55،920،000 ރުފިޔާ އެވެ.

އަދި ނުކުޅެދުންތެރިކަން ހުންނަ މީހުންގެ ތެރެއިން ތެރަޕިއުޓިކް ފަރުވާ ހޯދަން މާލީ އެހީތެރިކަން ދެނީ 253 މީހަކަށެވެ. އެ ފަރުވާއަށް ދައުލަތުން 7،072،834 ރުފިޔާ ހަރަދުކޮށްފައިވެ އެވެ.

މީގެ އިތުރުން 80 ފަރާތަކަށް ރާއްޖެއިން ބޭރުންވެސް ފަރުވާ ހޯދާފައިވެ އެވެ.