އީރާނުގެ ރައީސް މަސްޢޫދް ޕެޒެޝްކިޔާންއަށް ދެން އިސްތިޢުފާ ހުށަހަޅައިފި ނަމަ އެ އިސްތިޢުފާ ޤަބޫލުކުރާނެ ކަމުގެ "ފަހުގެ އިންޒާރު" އެ ގައުމުގެ ސުޕްރީމް ލީޑަރު މުޖްތަބާ ޚާމަނައީ ދެއްވާފައިވާ ކަމަށް އިސްރާއީލުގެ މީޑިއާއަކުން ރިޕޯޓުކޮށްފިއެވެ.

އިސްތިއުމާރީ އިސްރާއީލުގެ ޗެނެލް 14 އިން ތެހެރާނުގެ ޙާލަތު ދެނެގަންނަ މަސްދަރުތަކާ ހަވާލާދީ ބުނީ ޕެޒެޝްކިޔާން ކުރިން ވެސް ސިޔާސީ ޚިލާފުތަކުގެ ތެރޭގައި ތަކުރާރުކޮށް އިސްތިޢުފާ ދޭނެ ކަމުގެ އިންޒާރު ދީފައިވާ ކަމަށެވެ. މެއި މަހުގައި އެ މަނިކުފާނު ރަސްމީކޮށް އިސްތިޢުފާ ހުށަހެޅީ ޤައުމީ ސަލާމަތާއި ޚާރިޖީ ސިޔާސަތުގެ ބޮޑެތި ނިންމުންތަކުން ސަރުކާރު "މުޅިން އެކަހެރިކޮށްލާފައިވާ" ކަމަށް ބުނެ ކަމަށް އެ ރިޕޯޓުގައިވެއެވެ.

Advertisement

ނަމަވެސް އީރާނުގެ ރަސްމީ ފަރާތްތަކުން ވަނީ މި ރިޕޯޓު ދޮގުކޮށްފައެވެ.

ޗެނެލް 14 އިން އިތުރަށް ރިޕޯޓުކުރި ގޮތުގައި އެމެރިކާއާއި ސަރަޙައްދީ ހަމަނުޖެހުންތަކާ ގުޅޭ މައި ނިންމުންތަކުގައި ޚާމަނައީ ތާއީދުކުރައްވަނީ އީރާނުގެ ރެވޮލިއުޝަނަރީ ގާޑުގެ ކޮމާންޑަރު އަޙްމަދް ވަޙީދީއަށް ކަމަށެވެ. މަދަނީ ލީޑާޝިޕާއި އެ ގާޑާ ދެމެދު ހުރި ޚިޔާލު ތަފާތުވުންތައް މިހާރު ބޮޑުބައިން ނެތިގެން ގޮސް ވޮޝިންޓަނާ މެދު ތެހެރާނުން ގެންގުޅޭ ސިޔާސަތު ބައްޓަންކުރަނީ ވަޙީދީގެ ހަރުކަށި ވިސްނުމުން ކަމަށް ވެސް އެ ރިޕޯޓުގައި ބުނެފައިވެއެވެ.

އެމެރިކާއާ ގުޅޭ ބޮޑެތި ނިންމުންތަކުގެ އެންމެ ފަހު ބަސް ބުނުމުގެ ބާރު ވެސް އެ ކޮމާންޑަރަށް ދީފައިވާ ކަމަށް ޗެނެލް 14 އިން ރިޕޯޓުކޮށްފައިވެއެވެ.

ހަމައެއާ އެކު އީރާނުގެ ވެރިން ޤަބޫލުކުރަނީ ނޮވެމްބަރު މަހުގެ މިޑްޓާމް އިންތިޚާބުގެ ކުރިން ޓްރަމްޕް ސިޔާސަތަށް ބޮޑު ބަދަލެއް ނުގެންނާނެ ކަމަށެވެ. އެހެންކަމުން ތެހެރާނުން ޕްރެޝަރު ދެމެހެއްޓައި ސްޓްރެޓެޖިކް އަދި އިޤުތިޞާދީ ބާރުވެރިކަން އިތުރުކުރަން މަސައްކަތްކުރާނެ ކަމަށް ބެލެވެއެވެ.

މި ވަގުތު ތެހެރާނާއި ވޮޝިންޓަނާ ދެމެދު ރަސްމީ މަޝްވަރާތަކެއް ނުހިނގި ނަމަވެސް އީރާނުގެ ޚާރިޖީ ވަޒީރު ޢައްބާސް ޢަރާޣްޗީ އާއި އެމެރިކާގެ ޚާއްޞަ މަންދޫބުން ކަމުގައިވާ ސްޓީވް ވިޓްކޮފް އާއި ޖެރެޑް ކުޝްނާ މެދުވެރިކޮށް ނުސީދާ މުވާޞަލާތު ކުރިއަށްދާ ކަމަށް އެ ރިޕޯޓުގައި ބުނެފައިވެއެވެ. މި މުވާޞަލާތުގައި ޤަޠަރާއި ޕާކިސްތާނު މެދުވެރިންގެ ދައުރު އަދާކުރެއެވެ.