ޔޫރަޕިއަން ޔޫނިއަން (އީޔޫ) އާއި ބެލްޖިއަމަށް ރާއްޖެއިން ކަނޑައަޅާ ސަފީރުގެ މަގާމަށް ކުރީގެ ބަންޑާރަ ނައިބު ފާތިމަތު ދިޔާނާ ސައީދު އައްޔަންކުރައްވައި މިއަދު ހެނދުނު ރައީސް އޮފީހުގައި ބޭއްވި ރަސްމިއްޔާތެއްގައި ރައީސް ޑރ. މުޙައްމަދު މުޢިއްޒު އެ ކަމަނާއަށް ފަތްކޮޅު އަރުވައިފިއެވެ.

މި މަގާމަށް ދިޔާނާ ހަމަޖެއްސެވުމާ ގުޅޭ ގޮތުން ރައީސް މުޢިއްޒު ރައްޔިތުންގެ މަޖިލީހަށް ހުށަހެޅުއްވީ މިދިޔަ މަހުގެ ހަތް ވަނަ ދުވަހުއެވެ. ހާރިޖީ ގުޅުންތަކާ ބެހޭ ކޮމިޓީން އެ ހުށަހެޅުން ދިރާސާކުރުމަށް ފަހު ޖަލްސާގައި ބައިވެރިވެވަޑައިގެންނެވި 52 މެންބަރުންގެ އިއްތިފާގުން ރުހުން ދެއްވިއެވެ.

Advertisement

ދިޔާނާއަކީ ފޮރިން ސާވިސްގައި ޚިދުމަތް ކުރައްވާ ބޭފުޅަކަށް ނުވާތީ ސަފީރުކަމަށް ހަމަޖެއްސެވުމުގެ ކުރީން ފުރިހަމަކުރައްވަން ޖެހޭ މަރުޙަލާގެ ދަށުން މިދިޔަ އެޕްރީލް މަހު އެމްބެސެޑާ އެޓް ލާޖްގެ މަގާމަށް އެ ކަމަނާ ވަނީ ޢައްޔަންކުރައްވައިފައެވެ.

ތަޢުލީމީ ގޮތުން ބަލާއިރު ދިޔާނާ ވަނީ އޮސްޓްރޭލިއާގެ ޔުނިވާސިޓީ އޮފް ޓެޒްމޭނިއާއިން ބެޗެލާ އޮފް ލޯސް ޙާޞިލްކުރައްވައި ޖަޕާނުގެ ޔުނިވާސިޓީ އޮފް އޮސާކާއިން މާސްޓާ އޮފް ލޯރސް އަދި އިނގިރޭސި ވިލާތުގެ ލެސްޓާ ޔުނިވާސިޓީން މާސްޓާ އޮފް ލޯސް ނަންގަވައިފައެވެ.

ރައީސް މުޙައްމަދު ނަޝީދުގެ ސަރުކާރުގައި ބަންޑާރަ ނައިބުގެ ގޮތުގައި ޚިދުމަތްކުރެއްވުމަށް ފަހު ދިޔާނާ އިސްތިއުފާ ދެއްވިއެވެ. އެއަށް ފަހު ރައީސް ޑރ. މުޙައްމަދު ވަޙީދުގެ ދައުރުގައި ޖެންޑާ މިނިސްޓަރުގެ މަގާމު އަދާކުރެއްވިއެވެ. މީގެ އިތުރުން ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން (ސާކު) ގެ ސެކްރެޓަރީ ޖެނެރަލްކަމާއި ރައްޔިތުންގެ މަޖިލީހާއި ޚާއްޞަ މަޖިލީހުގެ މެންބަރުކަން ވެސް ދިޔާނާ ފުރުއްވައިފައިވެއެވެ.