މާލެއާއި ހުޅުމާލެ ހިމެނޭ ގޮތަށް އެއްގަމު އުޅަނދުތަކުގެ އަހަރީ ފީގެ ގޮތުގައި މާލޭ ސިޓީ ކައުންސިލަށް ލިބޭ ގާތްގަނޑަކަށް 150 މިލިއަން ރުފިޔާ އެ ކައުންސިލްގެ ބަޖެޓުން ކަނޑައި ސަރުކާރުގެ ބަޖެޓަށް ބަދަލުކޮށްދެއްވުމަށް ހައުސިން ވުޒާރާގެ ވަޒީރު ޑރ. ޢަބްދުﷲ މުއްތޮލިބު މިއަދު އެދިވަޑައިގެންފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މައްޗަންގޮޅި ދާއިރާގެ ޕީއެންސީ މެންބަރު އަހްމަދު ޒަމީރު ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ އެ ފައިސާ ލިބޭ އިރު ވެސް މަގުތައް މަރާމާތުކުރުމަށް ކައުންސިލުން އެއްވެސް ކަމެއް ނުކުރާ ކަމަށެވެ.

Advertisement

ކައުންސިލްގެ ކުރީގެ މެންބަރެއްގެ ގޮތުގައި ވެސް ހުންނެވި ޒަމީރު ފާހަގަކުރެއްވީ ކައުންސިލްގެ ބަޖެޓުގެ ތަފާސް ހިސާބުތައް ދައްކާ ގޮތުން 130 އާއި 140 މިލިއަން ރުފިޔާއާ ދެމެދުގެ ޢަދަދެއް ވެހިކަލް ފީގެ ގޮތުގައި ލިބޭ ކަމަށާއި ނަމަވެސް މަގުތައް ރަނގަޅު ފެންވަރަކަށް ތަރައްޤީކުރުމުގެ ވިސްނުމެއް ކައުންސިލުގައި ނެތް ކަމަށެވެ.

ވަޒީރު ވިދާޅުވީ މަގުތައް ބެލެހެއްޓުމަކީ ކައުންސިލާ ހަވާލުކޮށްފައި އޮތް ޒިންމާއެއް ކަމަށެވެ. ނަމަވެސް ސަރުކާރުން ތާރު އަޅައިގެން ހަދާފައި ހުންނަ މަގުތައް ކައުންސިލްގެ ހުއްދައިގެ ދަށުން ކެނޑުމަށް ފަހު އެ ތަންތަން ކުރީގެ ޙާލަތަށް ގެނައުމުގެ ޤާބިލުކަން ވެސް ކައުންސިލުގައި ނެތް ކަމަށް ވިދާޅުވިއެވެ.

މިނިސްޓަރު ވިދާޅުވީ 150 މިލިއަން ރުފިޔާއަށް މަގު މަރަމާތުކުރުމަށް ތާރު ކައްކާފައި އެޅޭނެވަރުގެ ކެޕޭސިޓީއެއް ބިލްޑްނުކުރުމަކީ އަޅުގަނޑަށް ހީވަނީ ކައުންސިލްގެ ޒިންމާ އަދާ ނުކުރުމުގެ ގޮތުން ކުރާ ކަމެއްހެން. އެ ފައިސާ ދަނީ ކޮންތާކަށްތޯ ބަލަން އެބަޖެހޭ" މުއްތޮލިބު ވިދާޅުވިއެވެ.

މަގު ކެނޑުމާއި މަރާމާތުކުރުމުގައި ޢަމަލުކުރަން ޖެހޭ ގޮތް ބަޔާންކުރާ ގައިޑްލައިނެއް ވުޒާރާއިން އެކުލަވައިލައި ކައުންސިލަށް ފޮނުވާފައިވާ ކަމަށް ވެސް ވަޒީރު ވިދާޅުވިއެވެ. އެހެންނަމަވެސް މަގުތައް ހަލާކުވެ ރައްޔިތުންނަށް ދަތިވާ ކޮންމެ ފަހަރަކު ޕްރޮޖެކްޓެއް ހަދައިގެން އެ މަސައްކަތް ކުރަން ޖެހެނީ ވުޒާރާއަށް ކަމަށާއި ވުޒާރާއަކީ މަރާމާތުކުރުމަށް އޮންނަ ތަނެއް ނޫން ކަމަށް ވެސް ވިދާޅުވިއެވެ.

"އެހެންވީމަ އެ 150 މިލިއަން ރުފިޔާ ސިޓީ ކައުންސިލަށް ލިބެން ޖެހޭނެ ކަމަށް އަޅުގަނޑު ގަބޫލެއްނުކުރަން. އަޅުގަނޑު އެދެނީ އެ ބައި [ކައުންސިލް ބަޖެޓުން] އުނިކޮށްފައި ސަރުކާރުގެ ބަޖެޓަށް ލިބޭނެ ގޮތެއް ހައްދަވައިދެއްވުން" ވަޒީރު ވިދާޅުވިއެވެ.

ވަޒީރު ފާހަގަކުރެއްވި ގޮތުގައި ދާދި ފަހުން ތަރައްޤީކުރި އަމީނީ މަގުގެ އެކި ސަރަޙައްދުތައް ވެސް ކައުންސިލުން ހުއްދަ ދީގެން ކަނޑާފައިވާ އިރު ބައެއް ތަންތަނުގައި ހަމައެކަނި ގައު އަޅާފައި ހުރި ނަމަވެސް ތާރު ނާޅައި ހުރި ކަމަށެވެ. އެ ފައިސާ ސަރުކާރަށް ލިބޭ ގޮތަށް ހަމަޖެހިއްޖެ ނަމަ މާލޭގެ މަގުތައް ރަނގަޅު ފެންވަރެއްގައި ހެދޭނެ ކަމަށް ވެސް ވަޒީރު ވިދާޅުވިއެވެ.