ފަލަ ބައްޔަށް ނުވަތަ ބަރުދަން އިތުރުވެފައިވާ ބޮޑެތި މީހުންނަށް ޚާއްޞަ ކޮންމެ ދުވަހަކު އެއް ފަހަރު ކާ ގޮތަށް ތައްޔާރުކޮށްފައިވާ ބޭހެއް ކަމުގައިވާ "ފައުންޑައިއޯ" ސައުދީ ޢަރަބިއްޔާގެ ކާބޯތަކެއްޗާއި ބޭހާ ބެހޭ އިދާރާ (އެސްއެފްޑީއޭ) އިން ރަޖިސްޓަރީކޮށްފިއެވެ.

މި ބޭހުގައި ހިމެނޭ މައިގަނޑު މާއްދާއަކީ "އޯފޯގްލިޕްރޮން" އެވެ. ބަރުދަން ދިގު މުއްދަތަކަށް ލުއިކޮށް ދެމެހެއްޓުމަށް އެހީތެރިވެދޭ މި ބޭސް ބޭނުންކުރާނީ ޞިއްޙަތަށް ފައިދާ ހުރި ކެއުމާއި ގަވާއިދުން ކަސްރަތު ކުރުމާ އެކުގައެވެ.

ބަރުދަން އިތުރުވުމާ ގުޅިގެން ހަށިގަނޑަށް ދިމާވާ އެއް ޞިއްޙީ މައްސަލައެއް ހުންނަ ފަރާތްތަކަށް ވެސް މި ބޭސް ބޭނުންކުރެވޭނެއެވެ.

ސައުދީގެ އެސްއެފްޑީއޭ އިން ބުނީ މި ބޭސް މަސައްކަތް ކުރަނީ ގްލޫކެގޮން ލައިކް ޕެޕްޓައިޑް 1 (ޖީއެލްޕީ 1) ރިސެޕްޓާތައް އެކްޓިވޭޓް ކޮށްގެން ކާހިތްވުން ކޮންޓްރޯލް ކުރުމާއި ލޭގައި ހަކުރު ހުންނަ މިންވަރު ހަމައަކަށް އެޅުވުމުގެ ޒަރީއާއިން ކެއުން މަދުކޮށް ބަރުދަން ލުއި ކޮށްދީގެން ކަމަށެވެ. ޖީއެލްޕީ 1 ތެރަޕީތަކުގެ ގިނަ ބޭސްތަކާ ޚިލާފަށް މި ބޭހަކީ ދުވާލަކު އެއް ފަހަރު ކާ ގޮތަށް ބޭނުންކުރާ ބޭހެކެވެ.

މި ބޭސް ރަޖިސްޓަރީ ކުރީ އޭގެ ރައްކާތެރިކަމާއި ފެންވަރާއި ނަތީޖާ ފުރިހަމައަށް ބެލުމަށް ފަހުގައި ކަމަށް އެ އިދާރާ އިން ހާމަކުރިއެވެ. މި ނިންމުމަށް ބާރު ލިބުނީ 72 ހަފުތާގެ މުއްދަތަށް ކުރިއަށް ގެންދިޔަ ފޭސް 3 ގެ ދެ ކްލިނިކަލް ޓްރަޔަލްއަކުން ލިބުނު ހެކީގެ މައްޗަށް ކަމަށް ބުންޏެވެ.

އެގޮތުން ފުރަތަމަ ޓްރަޔަލްގައި ހަކުރު ބަލި ނެތް ފަލަ ބައްޔަށް ފަރުވާ ހޯދި 3,127 މީހުން ބައިވެރިވިއެވެ. އެންމެ މަތީ ޑޯޒް ކަމުގައިވާ 36 މިލިގްރާމް ބޭނުންކުރި މީހުންގެ ބަރުދަން އެވެރެޖްކޮށް 11.2 ޕަސެންޓު ލުއިވިއިރު ޕްލެސީބޯ ގުރޫޕުގެ ނަތީޖާ ހުރީ 2.1 ޕަަސެންޓުގައި އެވެ.

ދެވަނަ ޓްރަޔަލްގައި ފަލަ ބައްޔާ އެކު ޓައިޕް 2 ހަކުރު ބަލި ހުންނަ 1,613 މީހުން ބައިވެރިވިއެވެ. 36 މިލިގްރާމް ދިން މީހުންގެ ބަރުދަން އެވެރެޖްކޮށް 9.6 ޕަސެންޓު ލުއިވިއިރު ޕްލެސީބޯ ގުރޫޕުގެ ބަރުދަން ލުއިވީ 2.5 ޕަސެންޓު ކަމަށް ސައުދީގެ އެސްއެފްޑީއޭ ބުންޏެވެ.

ކްލިނިކަލް ޓްރަޔަލްތަކުން ފާހަގަކުރެވުނު އެންމެ ޢާންމު ސައިޑް އިފެކްޓްތަކުގެ ތެރޭގައި މޭ ނުބައި ކުރުމާއި ބަނޑު ހަރުވުމާއި ބޭރަށް ހިންގުމާއި ހޮޑުލެވުމާއި ހަޖަމުގެ މައްސަލަތަކާއި ބަނޑުގައި ރިއްސުން ހިމެނެއެވެ. އޭގެ އިތުރުން ބަނޑު ފުއްޕުމާއި އިސްތަށި ފޭބުމާއި ވަރުބަލިވުން ވެސް ރިޕޯޓު ކުރެވިފައިވެއެވެ.

ހަޖަމުގެ ނިޒާމާ ގުޅޭ ގިނަ އަލާމާތްތައް ފެނިފައި ވަނީ ލުއި ނުވަތަ މެދުމިނުގެ ދަރަޖައެއްގައި ކަމަށާއި ޑޯޒް އިތުރުކުރާ މަރުހަލާގައި ފެނި ފަހުން މަޑުމަޑުން ރަނގަޅުވެފައިވާ ކަމަށް އެ އިދާރާ އިން ބުނެފައިވެއެވެ.

ވަކި ބާވަތެއްގެ ތައިރޮއިޑް ކެންސަރު ޖެހިފައި ހުރި ނުވަތަ ޢާއިލީ ގޮތުން އެ ބައްޔާ ގުޅުން ހުރި ވާރުތަވާ ސިންޑްރޯމް ހުންނަ ފަރާތްތައް މި ބޭސް ބޭނުންކޮށްގެން ނުވާނެ ކަމަށް ވެސް ސައުދީގެ އެސްއެފްޑީއޭ އިން ވަނީ އިންޒާރު ދީފައެވެ. މި ބޭސް ބޭނުންކުރެވޭނީ ޑޮކްޓަރެއްގެ ބެލުމުގެ ދަށުން ގަވާއިދުން ފޮލޯއަޕް ހަދައިގެންނެވެ.