އަންނަ މަހު ބާއްވާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ މަތީ މަޖިލީހުގައި އަތް އުފުލައިގެން ވޯޓުލުމަކީ އެ ޕާޓީގެ އަސާސީ ގަވާއިދުގައި ކުރިއްސުރެ ލިޔެފައި އޮތް އުސޫލެއް ކަމަށާއި ކޮންގްރެސްއާ ގުޅިގެން ވަކި ޚާއްޞަ އުސޫލެއް ނުހަދާ ކަމަށް އެ ޕާޓީން ބުނެފި އެވެ.

ޕީއެންސީން ރޭ ނެރުނު ބަޔާނެއްގައި ބުނެފައިވާ ގޮތުގައި މަތީ މަޖިލީހުގެ ވޯޓުލުމާ ގުޅޭ ތަފުސީލީ އުސޫލުތައް އަސާސީ ގަވާއިދުގެ ހަތް ވަނަ ޗެޕްޓަރުގައި ބަޔާންކޮށްފައިވެއެވެ. އެގޮތުން ގަވާއިދުގެ 69 ވަނަ މާއްދާގެ (ހ) ގައި މަތީ މަޖިލީހުގެ ނިންމުންތައް ފާސްކުރާނީ ހާމަވޯޓުން ކަމަށް ސާފުކޮށް ލިޔެފައިވާ ކަމަށް ޕީއެންސީން ބުނެފައިވެއެވެ.

Advertisement

ޕާޓީގެ އަސާސީ ގަވާއިދުގެ 69 ވަނަ މާއްދާގެ (ހ) ގައި ބުނެފައިވަނީ ޕާޓީގެ މަތީ މަޖިލީހުގައި ކަންކަން ފާސްކުރުމަށް ވޯޓުދޭނީ އަތް އުފުލައިގެން ކަމަށް ބުނެފައިވާ ކަމަށެވެ. އަދި އެ މާއްދާގެ (ށ) ގައި ބަޔާންކޮށްފައި ވަނީ ޕާޓީގެ މަތީ މަޖިލީހުގައި ޕާޓީގެ މެމްބަރުންގެ މަޖިލީހަށް މެމްބަރުން އިންތިހާބު ކުރުމަށް ނެގޭނީ ހާމަވޯޓެއް ކަމަށް ޕީއެންސީގެ ބަޔާނުގައި ވެއެވެ.

ކޮންގްރެސް ވިލަރެސްކުރާ ކޮމިޓީއަކުން ހާމަވޯޓުގެ ނިންމުން ނިންމީ ކަމަށް ބުނެ ދެކެވޭ ވާހަކަތައް ޕީއެންސީން ދޮގުކޮށް އެއީ ހަގީގަތާ ޚިލާފު ވާހަކަތަކެއް ކަމަށް ބުނެފައިވެ އެވެ. އެ ޕާޓީން ބުނީ މަތީ މަޖިލީހުގެ ކުރީގެ ބައްދަލުވުންތަކުގައި ވެސް އަބަދުވެސް ޢަމަލުކުރަމުން އައީ ހަމަ އެ އުސޫލާ އެއްގޮތަށް ކަމަށެވެ. 

އަންނަ މަހުގެ 15 އިން 18 އަށް ބާއްވާ މި ކޮންގްރެސްގައި ޕާޓީގެ ހަ ނައިބު ރައީސުން އިންތިޚާބުކުރާނެއެވެ. އެ މަގާމަށް ވާދަކުރައްވާ ހަތް ބޭފުޅުންގެ ތެރޭގައި އިކޮނޮމިކް މިނިސްޓަރު މުޙައްމަދު ސައީދާއި ފިޝަރީޒް މިނިސްޓަރު އަޙްމަދު ޝިޔާމާއި ސްޕޯޓްސް މިނިސްޓަރު ޢަބްދުﷲ ރާފިޢުއާއި ބާރަށު ދާއިރާގެ މެންބަރު އިބްރާހީމް ޝުޖާޢުއާއި ރައީސް އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ހިމެނެ އެވެ. އަދި މާފަންނު މެދުދާއިރާގެ މެންބަރު އަސްމާ ރަޝީދާއި ނިލަންދޫ ދާއިރާގެ މެންބަރު ފާޠިމަތު ސައުދާ އެ މަގާމަށް ވާދަ ކުރައްވަ އެވެ.

ޕީއެންސީގެ އަސާސީ ގަވާއިދު ބުނާ ގޮތުން ޕާޓީ ވެރިކަމުގައި އޮންނަ ދުވަސްވަރެއް ނަމަ ޤައުމުގެ ނައިބު ރައީސާއި ޕާލަމެންޓްރީ ގްރޫޕުގެ ލީޑަރު ވެސް އޮޓަމެޓިކުން ޕާޓީގެ ނައިބު ރައީސުންގެ ތެރޭގައި ހިމެނިވަޑައިގަންނަވާނެއެވެ.