ޕާކިސްތާނުގެ ހުޅަނގު އުތުރުގައި އޮންނަ ޚައިބަރު ޕަޚްތޫންޚްވާ ޕްރޮވިންސްގެ ކަބާލް ޓައުނުގައި މިއަދު ބޭއްވި ސުލްހަވެރި އެއްވުމެއް ކުރިއަށް ދަނިކޮށް މީހަކު ޖާނުން ފިދާވެގެން ދިން ބޮމުގެ ހަމަލާއެއްގައި 14 މީހަކު މަރުވެ އެތައް ބަޔަކު ޒަޚަމްވެއްޖެއެވެ.

މި އެއްވުމަކީ އެ ސަރަހައްދުގެ ރައްކާތެރިކަން ގެއްލެމުންދާތީ ގިނަ ބަޔަކު ގުޅިގެން ބޭއްވި ހަރަކާތެކެވެ. އެއީ އަފްގާނިސްތާނާއި ބޯޑަރު ގުޅޭ ސަރަހައްދުގައި އޮންނަ ޕްރޮވިންސެކެވެ.

Advertisement

ސްވާތުގެ ޑެޕިއުޓީ އިންސްޕެކްޓާ ޖެނެރަލް އޮފް ޕޮލިސް ފިދާ ޙުސައިން އޭއެފްޕީ އަށް ދެއްވި ބަޔާނެއްގައި ބުނީ ހަމަލާ ދިން މީހާ އޭނާގެ ގައިގައި ހަރުކޮށްފައި ހުރި ގޮވާ ވެސްޓު ގޮއްވައިލީ ކަމަށެވެ. އަދި ޖާނުން ފިދާވެގެން ހަމަލާ ދިން މީހާ ހަތަރު އަނގޮޅީގައި ހުރި ޕޮލިސް ސްޓޭޝަނަށް ވަންނަން މަސައްކަތް ކުރި ނަމަވެސް މައި ގޭޓް ކައިރީ އޭނާ ހުއްޓުވުމުން އެއްވުމުގެ ބައިވެރިންނާއި ކައިރިއަށް ޖެހުމަށް ފަހު ގޮއްވާލީ ކަމަށެވެ.

މި ހާދިސާގައި ޒަޚަމްވި މީހުން ކައިރީގައި ހުރި ހޮސްޕިޓަލްތަކަށް ބަދަލުކޮށް ފުލުހުންނާއި އެހެނިހެން ސެކިއުރިޓީ ފޯސްތަކުން ހަމަލާ ދިން ސަރަހައްދު ބަންދުކޮށްފައިވެއެވެ. 

ބޯޑަރު ސަރަހައްދުގެ ޕްރޮވިންސްތަކުގައި ހިންގާ މިފަދަ ހަމަލާތަކުގެ ޒިންމާ ޕާކިސްތާނުން ކުރީންވެސް އަޅުވަމުން ދިޔައީ އަފްޣާނިސްތާނުން އުފެދޭ ހަނގުރާމަވެރި ޖަމާޢަތްތަކުގެ ބޮލުގައެވެ. ނަމަވެސް ކާބުލްގައި އޮތް ޠާލިބާން ސަރުކާރުން ދަނީ އެ ތުހުމަތުތައް ދޮގުކުރަމުންނެވެ.

މި ޚިޔާލު ތަފާތުވުންތަކުގެ ސަބަބުން ދެ ޤައުމުގެ ދެމެދުގައި ބޮޑެތި ނުތަނަވަސްކަންތައް އުފެދި ޕާކިސްތާނުން ވަނީ އަފްޣާނިސްތާނުގެ ބިމުގައި ތިބި ހަނގުރާމަވެރީންނަށް އަމާޒުކޮށް ވައިގެ ހަމަލާތައް ދީފައެވެ. ޖޫން މަހު އިރުމަތީ އަފްޣާނިސްތާނަށް ޕާކިސްތާނުން ދިން ވައިގެ ހަމަލާތަކުގައި އެތައް ޢާންމު ރައްޔިތުންނެއް މަރުވި ކަމަށް ޠާލިބާން ސަރުކާރާއި އދ. އިން ބުނެފައިވެއެވެ.

ޕާކިސްތާނުގެ އަސްކަރިއްޔާގެ ތަރުޖަމާނު ހުކުރު ދުވަހު ބުނެފައިވާ ގޮތުގައި މި އަހަރު ހަނގުރާމަވެރީންގެ ހަމަލާތަކާއި އެ ހަމަލާތަކާ ގުޅިގެން ހިންގި އޮޕަރޭޝަންތަކުގައި ސެކިއުރިޓީ ފޯސްތަކާއި ޢާންމު ރައްޔިތުންގެ ތެރެއިން 819 މީހަކު މަރުވެފައިވެއެވެ.