މާލެއިން ސްރީލަންކާއަށް މުދާ ހިފައިގެން ދަތުރުކުރި މޯލްޑިވްސް ސްޓޭޓް ޝިޕިން (އެމްއެސްއެސް) ގެ ބޯޓަކުން 17 ކޮންޓެއިނަރު ކަނޑަށް ވެއްޓިއްޖެ އެވެ.

ލަންކާގެ ނޫހެއް ކަމަށްވާ ޑެއިލީ މިރާގައި ރިޕޯޓުކޮށްފައިވާ ގޮތުގައި އެ ކޮންޓެރިނަރުތައް ވެއްޓުނީ ކޮޅުނބު ބަނދަރާއި ގާތްގަނޑަކަށް 17 ނޯޓިކަލް މޭލު ހުޅަނގުން ކަމަށެވެ. އެއީ ހުސް ކޮންޓެއިނަރުތަކެއް ކަމަށް ބުނެފައިވެ އެވެ.

Advertisement

ކޮޅުނބު އިންފޮމޭޝަން ފިއުޝަން ސެންޓަރު (އައިއެފްސީ) އަށް ލިބުނު ރިޕޯޓުތަކާއި ހަވާލާދީ އެ ނޫހުން ބުނެފައިވަނީ މި ކޮންޓެއިނަރުތައް ކަނޑަށް ވެއްޓުނީ މޫސުން ގޯސްވެ ކަނޑުގަދަވުމުން ކަމަށް ބެލެވޭ ކަމަށެވެ. 

އެމްވީ އެމްއެސްއެސް ގްރެފީން ނަމަކަށް ކިޔާ ބޯޓު މާލެއިން ކޮޅުނބު ބަނދަރަށް ފުރީ މިދިޔަ މަހުގެ 28 ވަނަ ދުވަހު އެވެ.

މި ހާދިސާއާ ގުޅިގެން ސްރީލަންކާގެ މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވަނީ ކުއްލި އިންޒާރެއް ނެރެފައެވެ. ކަނޑުގެ އޮއިވަރު ހުރި ގޮތުން ވެއްޓުނު ކޮންޓެއިނަރުތައް ބެރުވާލާއާއި ނެގޮމްބޯއާ ދެމެދުގެ އައްސޭރިފަށާ ދިމާއަށް ދަތުރުކުރުމުގެ ބޮޑު ފުރުޞަތެއް އޮތް ކަމަށް ކަމާ ބެހޭ އިދާރާތަކުން ބުނެފައިވެއެވެ.

ސްރީލަންކާ ކަނޑުގެ ސިފައިން ވަނީ އެ ސަރަޙައްދު ބެލެހެއްޓުމަށް އުޅަނދުތައް ފޮނުވައިފައެވެ. ހަމައެއާ އެކު ކޮޅުނބު މެރިޓައިމް ރެސްކިއު ކޯޑިނޭޝަން ސެންޓަރު (އެމްއާރުސީސީ) އިން ވަނީ އެ ސަރަޙައްދުގައި ދަތުރުކުރާ ހުރިހާ އުޅަނދުފަހަރަށް ނެވިގޭޝަނަލް އިންޒާރެއް ނެރެފައެވެ.

ކަނޑުމަތީން ދައުރުވާ ކޮންޓެއިނަރެއް ފެންނަ މަސްވެރިންނާއި ކައްޕިތާނުން އެ ވުޒާރާގެ ރޭޑިއޯ ކޮމިއުނިކޭޝަން ސެންޓަރަށް ނުވަތަ އެންމެ ކައިރީގައި އޮތް މަސް ބަނދަރެއްގެ ކަމާ ބެހޭ ފަރާތްތަކަށް ވީ އެންމެ އަވަހަކަށް ރިޕޯޓުކުރުމަށް ވަނީ އިލްތިމާސްކޮށްފައެވެ.