ގާތްގަނޑަކަށް 45 އަހަރު ކުރިން ހުވަދޫ ކަނޑުގައި ހިނގި ހާދިސާއެއްގައި ގެއްލުނު ގއ. ދިޔަދޫ މީހެއްގެ މަރު ސާބިތުކުރުމަށްޓަކައި އެ މީހާ ދުނިޔޭގައި ހުރިތޯ ބެލުމަށް ގއ. ގެމަނަފުށީ މެޖިސްޓްރޭޓް ކޯޓުން އިއުލާންކޮށްފިއެވެ.

މަރު ސާބިތުކުރުމުގެ މި މައްސަލައިގައި ހޯދަމުން ގެންދަނީ މިހާރު ފަޅު ރަށެއްގެ ގޮތުގައި އޮތް ދިޔަދޫ ތަނޑިރަންމާގެ ހަސަން މުހައްމަދެވެ. އެ ކޯޓުގެ އިއުލާނުގައި އެދިފައި ވަނީ ހަސަން މުހައްމަދު ދުނިޔޭގައި ހުރިކަން ނުވަތަ ނެތްކަން އެނގޭ މީހަކު ހުރިނަމަ އަންނަ ހޮނިހިރު ދުވަހުގެ ކުރިން އެ ކޯޓަށް އެންގުމަށެވެ.

Advertisement

އެމީހާ ގެއްލުނު ކަމަށްވަނީ 1983 ނުވަތަ 1984 ވަނަ އަހަރު ދިޔަދޫގައި ބަނދެ ނިންމި އުޅަނދެއްގައި އިންޖީނު އެޅުމަށް މާލެއަށް ކުރި ދަތުރެއްގައެވެ. އެ އުޅަނދު ގެންދިޔައީ އިންޖީނުލީ އެހެން އުޅަނދަކާ ކަފު ޖަހައިގެން ކަމަށާއި ވިއްސާރަ ގަދަ ރެޔެއްގައި ހުވަދޫ ކަނޑު ހުރަސްކުރަނިކޮށް ގެއްލުނީ ކަމަށްވެ އެވެ.

އެ ހާދިސާގައި އެމީހާގެ އިތުރުން ވިއްސަކަށް މީހުން ގެއްލުނު ކަމަށްވެ އެވެ.

މި މައްސަލަ މިހާރު ކޯޓުގައި ކުރިޔަށް ދަނީ ހަސަން މުހައްމަދު އެމްޓީސީސީން ގަނެފައި ހުރި ހިއްސާތަކެއް އޭނާގެ ވާރިސުންގެ ނަމަށް ބަދަލުކުރުމުގެ މަރުހަލާއިންނެވެ. އެކަން ކުރެވެން އޮތީ ހަސަން މުހައްމަދުގެ މަރު ކޯޓުން ސާބިތު ކުރެވުމުންނެވެ.

ދިޔަދުއަކީ އޭރު ވެސް ކުޑަ އާބާދީއެއް އޮތް ރަށެކެވެ. ކުރީގެ ރައީސް މައުމޫން ޢަބްދުލްޤައްޔޫމުގެ ވެރިކަމުގައި ސުނާމީ ކާރިސާއަށް ފަހު އެ ރަށުގެ ރައްޔިތުން ގެމަނަފުއްޓާއި ގއ. ކޮނޑޭ އަދި ލ. ގަމަށް ބަދަލުކޮށް ދިޔަދޫ ވަނީ ފަޅު ރަށެއްގެ ގޮތުގައި ކަނޑައަޅައިފައެވެ.