އަމީނީމަގު މަރާމާތުކުރުމުގެ ފުރަތަމަ ބައިގެ މަސައްކަތަށް ތައްޔާރުވުމުގެ ގޮތުން އިއްޒުއްދީން މަގާ ހިސާބުން ދަރުމަވަންތަ ހޮސްޕިޓަލު ކައިރީ ޕާކާ ހަމައަށް އެ މަގު މިރޭ ދަންވަރު 12:00 އިން ފެށިގެން ބަންދުކުރާނެ ކަމަށް ފުލުހުން ބުނެފިއެވެ.

މި ބަދަލާ ގުޅިގެން އިއްޒުއްދީން މަގުން އަމީނީމަގަށް ނުކުތުން މުޅިން ހުއްޓުމަކަށް އަންނާނެއެވެ. ފުލުހުން ހާމަކޮށްފައިވާ ގޮތުގައި މަގު ހެދުމުގެ ޢަމަލީ މަސައްކަތް ފެށޭނީ މާދަމާއެވެ.

Advertisement

މި މަހުގެ 28 ވަނަ ދުވަހާ ހަމައަށް އެ ސަރަހައްދު ބަންދުވެފައި އޮންނާނެ ކަމަށް ފުލުހުން ބުނެފައިވެއެވެ. ހަތަރުފުރޮޅުލީ އުޅަނދުތަކަށް ބަންދު ސަރަހައްދުތަކާއި އެ ނޫން އުޅަނދުތަކަށް ބަންދު ސަރަހައްދުތައް ވަކިން ފާހަގަކޮށް ފުލުހުން ވަނީ ޗާޓެއް ނެރެފައެވެ.

ބަންދުކުރާ ސަރަހައްދުގައި ޕާކުކޮށްފައި ހުރި އުޅަނދުތައް މިރޭ ދަންވަރު 12:00 ގެ ކުރިން ނެގުމަށް ފުލުހުން ވަނީ އަންގައިފައެވެ. 

ތާރު އަޅައިގެން ހަދާފައި އޮތް އަމީނީމަގުގެ އެކި ހިސާބުތަކުން ތާރުގަނޑު އުފުލި ބޮޑެތި އަޑިގުޑަންތައް ހެދިފައިވާތީ އެ މަގު މަރާމާތުކުރުން އުމްރާނީ ތަރައްޤީއާ ބެހޭ ވުޒާރާއިން ޖޫން 15 ގައި އެމްޓީސީސީއާ ހަވާލުކުރީއެވެ. މަރާމާތުގެ ކުރިން ހަދަންޖެހޭ ސާވޭ އެ ކުންފުނިން ވަނީ މިދިޔަ ހަފުތާގައި ނިންމައިފައެވެ.

ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން އާރްޑީސީއާ ހަވާލުކޮށްގެން ޖުލައި 2022 ގައި ޒަމާނީ ފެންވަރަށް ހެދުމުގެ މަސައްކަތް ފެށި މި މަގު އެއްކޮށް ހުޅުވުނީ 2024 ވަނަ އަހަރުގެ ކުރީކޮޅުގައެވެ.