ސްރީލަންކާގެ ވެރިރަށް ކޮލަމްބޯ ކައިރީގައި އޮންނަ މަހާރާ ޖަލުގައި ހޮނިހިރު ދުވަހު ޤައިދީން ހަމަނުޖެހުން ހިންގައި އެކަކު މަރުވެއްޖެ އެވެ. 

މަރުވެފައިވަނީ ހަމަނުޖެހުން ހިންގައިގެން ޖަލުން ބޭރަށް ނެރުނު މީހުންގެ ތެރެއިން އެއް ގައިދީއެކެވެ. އިތުރު ހަ ގައިދީއަކުވެސް ފަރުވާދޭން ނެރުނެވެ.

Advertisement

މި ހާދިސާ އާއި ގުޅިގެން ޖަލުގެ ސަލާމަތީ ކަންކަން ވަރުގަދަކުރުމަށް އިތުރު ފުލުހުންގެ ޔުނިޓެއް ފޮނުވައި ސިފައިންގެ ދެ ލޮރީގެ ސިފައިންވެސް އެ ސަރަހައްދުގައި ވަނީ ހަރަކާތްތެރިވާން ފަށައިފައެވެ.

ލަންކާ ފުލުހުން ބުނީ ޖަލު ތެރޭގައި ހިންގަމުންދާ އެއްވެސް އޮޕަރޭޝަނެއްގައި ފުލުހުން ބައިވެރިވަމުން ނުދާ ކަމަށެވެ.

މަހާރާ ޖަލުގައި 2020 ވަނަ އަހަރުގެ ޑިސެމްބަރު މަހު ކޮވިޑް 19ގެ ބަލިމަޑުކަމުގެ ތެރޭގައިވެސް ހަމަނުޖެހުން ހިނގައި 11 ޤައިދީން މަރުވެ 117 މީހަކަށް އަނިޔާވެފައިވެއެވެ. އެ ފަހަރު ސަރުކާރުން ވަނީ ތޮއްޖެހިފައިވާ ޖަލުތަކުން އެތައް ސަތޭކަ ޤައިދީންނެއް ދޫކޮށްލައިފައެވެ.

މީގެ ގާތްގަނޑަކަށް މަހެއް ކުރިން ކޮލަންބޫ އާއި ދުރުނޫން ހިސާބެއްގައި ހުންނަ ނެގޮމްބޯ ޖަލުގައިވެސް ވަނީ ބޮޑު ހަމަނުޖެހުމެއް ހިނގައި 10 ގާޑުންނާއި 21 ޤައިދީން މަރުވެފައެވެ. އެއީ ފަހުގެ ތާރީޚުގައި ސްރީލަންކާގެ ޖަލެއްގައި ހިނގި އެންމެ ގެއްލުން ބޮޑު ހާދިސާއެވެ.

ނެގޮމްބޯ ޖަލުގެ ހާދިސާއަށް ފަހު ސަރުކާރުގެ ބޭނުންނުކޮށް ހުރި ޢިމާރާތްތައް ޖަލުތަކަށް ބަދަލުކުރުމުގެ ޕްލޭނެއް ކަމާ ބެހޭ ފަރާތްތަކުން ވަނީ އިޢުލާނުކޮށްފައެވެ. ލަންކާ ސަރުކާރުގެ ތަފާސް ހިސާބުތައް ދައްކާ ގޮތުން ސްރީލަންކާގެ ޖަލުތައް ހިންގަމުން ދަނީ ޖާގައިގެ ގާތްގަނޑަކަށް ހަތަރު ގުނައަށް ތޮއްޖައްސައިގެންނެވެ.