އިންޑިއާގެ ޔޫނިއަން ހޯމް މިނިސްޓަރު އަމިތު ޝާހުވެސް މަގާމުން އިސްތިއުފާ ދޭން ޖެހޭ ކަމަށް ބުނެ އިންޑިއާގެ ޒުވާނުން ޑީމާންޑް ކުރަން ފަށައިފި އެވެ.

މިދިޔަ ޖޫން މަހުން ފެށިގެން މިދިޔަ މަހުގެ 25 ވަނަ ދުވަހާއި ހަމައަށް އިންޑިއާ ޒުވާނުން މުޒާހަރާ ކުރީ ޔޫނިއަން އެޑިއުކޭޝަން މިނިސްޓަރު ދަރްމެންދްރަ ޕްރަދާންގެ އިސްތިއުފާއަށް ގޮވާލަ އެވެ. އޭނާ އެ ދުވަހު އިސްތިއުފާ ދެއްވުމާއި އެކު މުޒާހަރާތައް ހުއްޓާލި އެވެ.

Advertisement

ނަމަވެސް އޭނާގެ އިސްތިއުފާ ދިގުލައި ދާތީ ޖުލައި 21 ވަނަ ދުވަހު ޒުވާނުން އިސްވެ އުފައްދާފައިވާ ޕްރެޝާ ގްރޫޕެއް ކަމަށްވާ ކޮކޮރަޗް ޖަންތާ ޕާޓީ (ސީޖޭޕީ) ވަނީ ވެރިރަށް ނިއުދިއްލީގެ މަޖިލީސް ކުރާ ގޭ ކައިރީ ވަރުގަދަ އެއްވުމެއް ބާއްވައި ފުލުހުންނާއި ބޮޑު ކުރިމަތިލުންތަކެއް ހިންގާފައި އެވެ. އެ ދުވަހު ފުލުހުންގެ އިތުރުން މުޒާހަރާ ކުރި އެތައް ސަތޭކަ ޒުވާނުންނަށް އަނިޔާވި އެވެ.

އެ މައްސަލައިގަ އިންޑިއާގެ އިދިކޮޅު ލީޑަރު ރާހުލް ގާންދީ ވަނީ ފުލުހުން އެ މުޒާހަރާގައި ޒުވާނުންނަށް އަނިޔާ ކުރީ ހޯމް މިނިސްޓަރުގެ އަމުރަށް ކަމަށް ވިދާޅުވެފައި އެވެ. އެހެން ކަމުން ހޯމް މިނިސްޓަރު ޝާހުވެސް އިސްތިއުފާ ދޭން ޖެހޭ ކަމަށް ވިދާޅުވި އެވެ.

އެކަމަށް ބާރުދީ ސީޖޭޕީގެ ބާނީ އަބީޖީތް ދިޕްކޭ މިހާރު ދަނީ ވާހަކަ ދައްކަމުންނެވެ. އޭނާ ބުނީ މުޒާހަރާގެ ބައިވެރިންނާއި ދެކޮޅަށް ނުހައްގު ބާރުގެ ބޭނުން ފުލުހުން ކުރި ކަމަށެވެ. އެފަދަ ގޮތަށް ބައިވެރިންނަށް ފުލުހުން ހަމަލާ ދޭން ޖެހުމުގެ ފުރިހަމަ ޒިންމާ ހޯމް މިނިސްޓަރު ނަގަން ޖެހޭނެ ކަމަށާއި އެހެން ކަމުން ޝާހު އިސްތިއުފާ ދެއްވަން ޖެހޭ ކަމަށެވެ. 

ޒުވާނުންގެ މުޒާހަރާތަށް އިތުރަށް ވަރުގަދަވެ ގޮތް ހުސްވެގެން، ބޮޑުވަޒީރު ނަރެންދްރަ މޯދީގެ އެޑިއުކޭޝަން މިނިސްޓަރު އިސްތިއުފާ ދެއްވުމުގެ އިތުރުން އެމީހުން ކުރި ހުރިހާ ޑީމާންޑަކަށް އެއްބަސްވި އެވެ. އެގޮތުން ޖުލައި 21 ގެ މުޒާހަރާގައި ފުލުހުންނަށް ހަމަލާދިން ޒުވާނުންނާއި މުޒާހަރާގެ އެއްވެސް ބައިވެރިއަކާއި ދެކޮޅަށް ދައުވާ ނުކުރަން އިންޑިއާ ސަރުކާރުން އެއްބަސްވި އެވެ.

ނަމަވެސް އެ މުޒާހަރާގައި ޒުވާނުންގެ ހަމަލާތަކުގައި ޒަހަމްވި ފުލުހުންގެ އާއިލާތަކުން ވަނީ އިންޑިއާގެ ސުޕްރީމް ކޯޓަށް ޕެޓިޝަނެއް ހުށަހަޅާފައި އެވެ. އެމީހުން އެދިފައިވަނީ ޒަހަމްވި ފުލުސް އޮފިސަރުންގެ ހައްގުތައް ހޯދައިދީ އިންސާފު ހޯދައި ދިނުމަށެވެ.

އިންޑިއާގެ މިދިޔަ ދޮޅު މަހެއްހާ ދުވަހު ޒުވާނުން އެޑިއުކޭޝަން މިނިސްޓަރުގެ މުޒާހަރާއަށް ގޮވާލާ މުޒާހަރާ ކުރީ ނީޓް ޕޭޕަރު ލީކުވުމުން އެޑިއުކޭޝަން މިނިސްޓްރީން އިމްތިހާން ކެންސަލް ކުރުމުންނެވެ.