ވޯލްޑް ކަޕް ހިންގުމުގެ ހިއްސާ ބޭރުގެ އިންވެސްޓަރުންނަށް ވިއްކައިލުމަށް ހުށަހެޅި ޕްލޭނާ ދެކޮޅު ހެދުމުގެ ގޮތުން ފީފާގެ ރައީސް ޖިއާނީ އިންފަންޓީނޯގެ ސީނިއާ އެޑްވައިޒަރު ކާލޮސް ކޮރްޑެއިރޯ އިސްތިއުފާ ދީފިއެވެ.

ހުކުރު ދުވަހު ކޮރްޑެއިރޯ ނެރުނު ބަޔާނެއްގައި ބުނީ ފީފާ ފޯވާޑް އެންޓަޕްރައިޒް (އެފްއެފްއީ) ގެ ނަމުގައި އައު ވެންޗާއެއް އުފައްދައި އެ ވެންޗާގެ ތެރެއިން 20 ބިލިއަން ޑޮލަރުގެ ސަބްސިޑިއަރީއެއް ގާއިމުކޮށް ވޯލްޑް ކަޕާއި ފީފާގެ އެހެނިހެން މުބާރާތްތައް ހިންގުމަށް ރާވާފައިވާ ކަމަށެވެ. އެ ޕްލޭންގެ ދަށުން 20 އިންސައްތައާ ހަމައަށް ހިއްސާ ބޭރުގެ އިންވެސްޓަރުންނަށް ވިއްކައިލުމަށް ހުށަހަޅާފައިވާއިރު މި މަޝްރޫޢަށް ފައިސާ ހަމަޖައްސައިދޭ ފަރާތަކީ އެމެރިކާގެ ރައީސް ޑޮނަލްޑް ޓްރަމްޕްގެ ދަނބިދަރި ޖެރެޑް ކުޝްނާގެ ކޮއްކޮ ޖޮޝުއާ ކުޝްނާއެވެ.

Advertisement

ކޮރްޑެއިރޯ ބުނީ މި ހުށަހެޅުމާ އޭނާ އެއްވެސް މިންވަރަކަށް ބައިވެރިނުވާ ކަމަށާއި ޝައްކެއް ނެތް މިންވަރަށް އެ ހުށަހެޅުމާ ދެކޮޅު ކަމަށެވެ. އެއީ ފީފާގެ މެންބަރު އެސޯސިއޭޝަންތަކަށް ގެއްލުން ބޮޑު ޑީލެއްކަން ފާހަގަކޮށް ބަޔާނުގައި ބުނީ ފުޓުބޯޅައަށް ގެއްލުން ބޮޑު ޑީލެއް އަދި ކުޅިވަރުގެ ދުރު މުސްތަގުބަލަށް އެ ޕްލޭންގެ ސަބަބުން ގެއްލުންވާނެ ކަމަށެވެ.

ފީފާ އަތުގައި ބިލިއަނެއްހާ ޑޮލަރުގެ ރިޒާވް ހުރި ކަމަށާއި މެންބަރު އެސޯސިއޭޝަންތަކަށް އިތުރު އެހީ ފޯރުކޮށްދިނުމުގެ މާލީ ގާބިލުކަން ފީފާގައި މިހާރު ވެސް ހުރި ކަމަށް ކޮރްޑެއިރޯ ބުންޏެވެ. މި ހާލަތުގައި ފުޓުބޯޅައިގެ އެންމެ އަގުބޮޑު ރައުސުލްމާލުން ދާއިމީ ހިއްސާއެއް ވިއްކައިގެން 4.2 ބިލިއަން ޑޮލަރު ހޯދުމުގައި އެއްވެސް ބުއްދިއެއް ނެތް ކަމަށެވެ.

ކުރިން ގޯލްޑްމަން ސެކްސްގެ ވައިސް ޗެއާމަންކަމާއި ހާވާޑް ބިޒްނަސް ސްކޫލުން އެމްބީއޭ ހާސިލުކޮށްފައިވާ ކޮރްޑެއިރޯ އަކީ ޔޫރަޕާއި މެދުއިރުމައްޗާއި އެފްރިކާ އަދި އޭޝިޔާގެ ސަރުކާރުތަކަށާއި ބައިނަލްއަޤުވާމީ ބޮޑެތި ކުންފުނިތަކަށް ލަފާދީފައިވާ ތަޖުރިބާކާރެކެވެ. ކުރީގެ ޔޫއެސް ސޮކާ ފެޑެރޭޝަންގެ ނައިބު ރައީސްގެ ހައިސިއްޔަތުން މަސައްކަތްކޮށްފައިވާ ކޮރްޑެއިރޯ 2021 ވަނަ އަހަރު އިންފަންޓީނޯ ޚާއްޞަކޮށް އިޚްތިޔާރުކުރީ ދުނިޔޭގެ ފުޓުބޯޅަ ކުރިއެރުވުމަށް ލަފާ ދިނުމަށެވެ.

ވޯލްޑް ކަޕް ހިންގުމުގެ ހިއްސާ ބޭރުގެ އިންވެސްޓަރުންނަށް ވިއްކައިލުމަށް ހުށަހެޅި ޕްލޭނާ ދެކޮޅު އަޑުތައް ގަދަވަމުން ދިޔަ ނަމަވެސް ސެޕްޓެމްބަރު 19 ގެ ކުރިން ގޮތެއް ނިންމަން 211 މެންބަރު އެސޯސިއޭޝަނަށް ބާރު އެޅެމުންދާ ކަމަށް ރިޕޯޓުތައް ބުނެއެވެ. ސްވިޒަލެންޑުގައި ހުންނަ ފީފާ އިން ބުނީ މީޑިއާގެ ނުބައި ރިޕޯޓުތަކުން މަޝްވަރާ ޕްރޮސެސް ބުރޫ އެރި ނަމަވެސް ކޮންމެ މެންބަރު އެސޯސިއޭޝަނަކަށް ވެސް ހަގީގަތުގެ މައްޗަށް ބިނާކޮށް ވޯޓު ދިނުމުގެ ފުރުސަތު ހޯދައިދޭނެ ކަމަށެވެ.