މޮރޮކޯއާ އިންވެގެން އޮންނަ ސްޕެއިނުގެ ސެއުޓާ ސަރަހައްދަށް އެއް ދުވަހުގެ ތެރޭގައި ގާތްގަނޑަކަށް 60,000 ރެފިއުޖީން ވަދެ ބޯޑަރު ހުރަސްކޮށްފި އެވެ.

އެ ސަރަހައްދުގެ ރީޖަނަލް ރައީސް ޚުއާން ހެސޫސް ވީވާސް މީޑިއާގައި ވިދާޅުވީ ހުރު ދުވަހު ބޯޑރަު ހުރަސްކޮށް ސްޕެއިނަށް އެތެރެ މީހުންގެ ތެރެއިން 34 މީހުން މަރުވި ކަމަށެވެ. އެމީހުން މަރުވީ ބޯޑަރުގައި ޖަހާފައިވާ ފެންސުގައި ޖެހި ފިތިބާރުވެ، ތާށިވެގެން ލިބުނު އަނިޔާތަކުގަ އާއި ކަނޑުމަގުން އެތެރެވާން އުޅުމުގެ ތެރޭގައި ގެނބިގެން ނެވެ.

Advertisement

ރިޕޯޓުތައް ބުނާގޮތުގައި ހިޖުރަވެރިންގެ ތެރޭގައި ގިނައީ ޒުވާން ފިރިހެނުންނެވެ. އަދި 7،000 ކުޑަކުދިންގެ އިތުރުން ބައެއް ޢާއިލާތަކާއި އަންހެނުން ވެސް ހިމެނެއެވެ. މިހާ ގިނަ މީހުން އެއްފަހަރާ ހުރަސް ކުރުމުން އެ ސަރަހައްދަށް ވަނީ އިންސާނީ އަދި ސިޔާސީ ބޮޑު ކާރިސާއަކާ ކުރިމަތިލާން ޖެހިފަ އެވެ.

ސެއުޓާގެ ބޯޑަރު ދޮރާށިތައް ކައިރީ މޮރޮކޯ ފުލުހުން ފެން ޖަހާ ވެހިކަލް ބޭނުންކޮށް މީހުން ފަހަތަށް ފޮނުވާލި ނަމަވެސް ބައެއް ހަމަނުޖެހުންތަކުގައި ބަހަކާއި ހަތް ކާރެއް އެނދި މަންޒަރު ފެނިފައިވެއެވެ.

ސްޕެއިނުގެ ބޮޑުވަޒީރު ޕެޑްރޯ ސަންޗެޒް ހުކުރު ދުވަހު ސެއުޓާއަށް ވަޑައިގެން ވިދާޅުވީ ހުރިހާ ވަސީލަތެއް ބޭނުންކޮށްގެން ޙާލަތާ ކުރިމަތިލާނެ ކަމަށެވެ. ބޯޑަރު ހުރަސްކުރުންތައް ސިފަކުރައްވައި އެ މަނިކުފާނު ވިދާޅުވީ އެއީ ސްޕެއިނުގެ ސިޔާދަތީ ސަރަހައްދު "ވައެލޭޓް" ކުރުމެއް ކަމަށެވެ. ސަންޗެޒް ވިދާޅުވި ގޮތުގައި ހިޖުރަވެރިން ގިނަ ޢަދަދަކަށް ދިއުމުގެ އަސްލަކީ ސްޕެއިނުގެ ސުޕްރީމް ކޯޓުގެ ޙުކުމެއް ބޭނުންކޮށް ވަގުފާރީގެ ނެޓްވޯކްތަކުން ފެތުރި ދޮގު ވާހަކަތަކެވެ.

ރެފިއުޖީން ގޮތުގައި އެތެރެވުން ކުއްލިއަކަށް އިތުރުވީ މިދިޔަ ހަފްތާއެއްހާ ދުވަހުގެ ތެރޭގައި އެވެ. ސްޕެއިނުގެ ދާޚިލީ ވުޒާރާއިން ބުނީ ހުކުރު ދުވަހުގެ ނިޔަލަށް ގާތްގަނޑަކަށް 25,000 ހިޖުރަވެރިން މޮރޮކޯއަށް އަނބުރާ ފޮނުވައިލެވިފައިވާ ކަމަށެ

ސެއުޓާއާއި މެލީއާ އަކީ އެފްރިކާ ބައްރުގައި އޮންނަ ސްޕެއިނުގެ ދެ ސިޓީ ކަމަށް ވާއިރު މިއީ ޔޫރަޕިއަން ޔޫނިއަނުގެ އެފްރިކާއާ ގުޅޭ ހަމައެކަނި އެއްގަމު ބޯޑަރެވެ.