މިހާރު ކުރަމުންދާ ވިއްސާރަ އާއި ގުޅިގެން ހުޅުމާލޭގައި ދިރިއުޅޭ ރައްޔިތުން އެހީތެރިކަމެއް ބޭނުންވާނަމަ އެންގުމަށް ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) އިން އެދެފި އެވެ.

މިހާރު ކުރަމުންދާ ވިއްސާރައިގަ މިދިޔަ 24 ގަޑިއިރު އެންމެ ގިނައިން ވާރޭ ވެހުނީ ހުޅުމާލެއާއި ބ. ދަރަވަންދޫ އަށެވެ. މާބޮޑަށް ފެންބޮޑު ނުވި ނަމަވެސް ހުޅުމާލޭ ގޭގެއާއި އެޕާޓްމެންޓުތަކަށް ފެން ވަންނަ މައްސަލަ އާންމުން ދަނީ ސަމާލު ކަމަށް ގެންނަމުންނެވެ.

Advertisement

އެޗްޑީސީން ސޯޝަލް މީޑިއާގައި ބުނީ ހުޅުމާލޭގައި މޫސުން ގޯސްވުމުގެ ސަބަބުން އެއްވެސް އެހީތެރިކަމެއް ނުވަތަ ކުއްލި ހާލަތެއްގައި އެހީއެއް ބޭނުންވާނަމަ އެޗްޑިސީއަށް ގުޅައިގެން ކުރިޔަށް ދިއުމަށް އެދޭ ކަމަށެވެ. ގުޅަން ޖެހޭނީ އެ ކުންފުނީގެ ކޯލް ސެންޓަރު 1516 އަށެވެ.

ރައްކާތެރިކަމުގެ ފިޔަވަޅުތައް އެޅުއްވުމަށާއި، ކަމާބެހޭ އިދާރާތަކުން ދޭ އިރުޝާދުތަކަށް ސަމާލުވުމަށާއި، އެކަކު އަނެކަކަށް އެހީތެރިވެ އަޅާލުމުގައި ދެމިތިއްބެވުމަށް އެ ކުންފުނިން ވަނީ އިލްތިމާސް ކޮށްފައި އެވެ.

މެޓުން ބުނީ މިއަދާއި މާދަމާވެސް ރާއްޖޭގެ ބޮޑު ބަޔަކަށް ބޯކޮށް ވާރޭވެހި ގުގުރާނެ ކަމަށް ލަފާ ކުރެވޭ ކަމަށެވެ. އަދި ވައިގަދަވެ ވިލާގަނޑުގައި 50 މޭލު ބާރު މިނުގައި ވައި ޖެހޭ ކަމަށް ބުނެ އެވެ.