މިރޭވެސް މޫސުން ގޯސްވާނެ ކަމަށް ލަފާކޮށް ރީނދޫ އެލާޓުގެ ވަގުތު ދަންމާލައިފި އެވެ.

މޫސުމާއި ބެހޭ ގައުމީ އިދާރާ (މެޓ) އިން ބުނީ މިހާރު ނެރެފައިވާ ރީނދޫ ސަމާލުގެ ވަގުތު މިރޭ 7:30 ހާއި ހަމައަށް އިތުރު ކޮށްފައިވާ ކަމަށެވެ. އެލާޓު ނެރެފައިވަނީ ހއ. އަތޮޅުން ތ. އަތޮޅާއި ހަމައަށެވެ.

Advertisement

އެ ސަރަހައްދަށް ބޯކޮށް ވަރޭވެހި ގުގުރާނެ ކަމަށް ލަފާ ކުރެ އެވެ. އާންމުކޮށް ވައި ޖެހޭނީ 25 މޭލާއި 30 މޭލު ބާރު މިނުގައި އެވެ.

އަދި ވިލާގަނޑުގައި 50 މޭލަށް ވައި ގަދަވާނެ ކަމަށް ލަފާ ކުރެ އެވެ.

މޫސުން ގޯސްވެފައިވާތީ މެޓުން ނާއި ކަމާ ބެހޭ އިދާރާތަކުން ވަނީ މޫސުމަށް ބަލައިގެން ކަނޑުދަތުރު ކުރުމަށް އިލްތިމާސްކޮށްފައި އެވެ. މިއަދުގެ މިހާތަނަށް ކަނޑުމަތީގެ ދެ ހާދިސާއެއް ހިނގާފައިވާ ކަމަށް ރިޕޯޓުކޮށްފައިވެ އެވެ.

އެގޮތުން ތިލަފުށިން ފުރައިގެން ދަތުރު ކުރި ކޮޅުވެއްޓިއެއް އަޑިއަށް ގޮސް ދެ މީހަކު ވަނީ ގެއްލިފައި އެވެ. ފުލުހުން ބުނީ 10 މީހުން ދަތުރު ކުރި އެ ކޮޅިވެއްޓިން ގެއްލުނީ ދެ ބިދޭސީން ކަމަށާއި އެމީހުން ހޯދުމުގެ މަސައްކަތް ކުރަމުންދާ ކަމަށެވެ.

މީގެ އިތިރުން މިއަދު ވަނި މާފުށީ ބޭރުގަ އަޅާފައި އޮތް ސަފާރީއެއްގެ ނަގިލި ކަނޑައިގެން ގޮސް ފަރަށް އުރި އެއްކޮށް ފުނޑުފުނޑު ވެފައި އެވެ.