ތިލަފުށީގައި ހިނގި އަލިފާނުގެ ހާދިސާއާ ގުޅިގެން މެދުކެނޑިފައި އޮތް ޚިދުމަތްތައް ކުރީގެ ހާލަތަށް ބަދަލުކޮށް މާދަމާއިން ފެށިގެން ކުނި ނެގުމުގެ މަސައްކަތް އެއްކޮށް ފަށާނެ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.

ވެމްކޯ އިން ރޭ ނެރުނު އިއުލާނުގައި ބުނެފައިވާ ގޮތުން މާލެ,  ހުޅުމާލެ އަދި ވިލިމާލޭގެ ޓްރާންސްފާ ސްޓޭޝަންތައް މެދުވެރިކޮށް ދެމުން ގެންދިޔަ ހުރިހާ ޚިދުމަތެއް ހުއްޓުމެއް ނެތި މާދަމާއިން ފެށިގެން ކުރިއަށް ގެންދާނެއެވެ. އޭގެ ތެރޭގައި ގޭބީސީތަކުން ކުނި ނެގުމާއި ބޮޑެތި ކުނި އުކައިލަދިނުމުގެ ޚިދުމަތް ކަމުގައިވާ "ކެޕްސް" ހިމެނެއެވެ.

Advertisement

އެ އިއުލާނުގައި އިތުރަށް ފާހަގަކޮށްފައިވާ ގޮތުގައި ޓްރާންސްފާ ސްޓޭޝަންތަކަށް ގެންދާ ކުނި ހުންނަންވާނީ ކުނި އުފުލުމުގެ މިންގަނޑުތަކާ އެއްގޮތަށެވެ. ގާކުނި (ސީއެންޑީ) ދެ ބަޔަކަށް ވަކިކޮށްފައި ހުރުމަކީ ލާޒިމު ކަމެކެވެ.

އެ ނޫންގޮތަކަށް ގެންދާ ކުނި ބަލައި ނުގަންނާނެ ކަމަށް ބުނެފައިވެ އެވެ. އަދި އިތުރު މައުލޫމާތު ހޯދުމަށް ހޮޓްލައިން ނަމްބަރު 1666 ގުޅުމަށް އެދިފައިވެ އެވެ.

މި ޚިދުމަތްތައް މެދުކެނޑެން ޖެހުނީ ވޭތުވެ ދިޔަ ހަފުތާގައި ތިލަފުށީ ރީޖަނަލް ވޭސްޓް މެނޭޖްމަންޓް ފެސިލިޓީގައި ރޯވި އަލިފާނާ ގުޅިގެންނެވެ. އެ ހާދިސާއާ ހެދި ސައިޓުގެ ބައެއް ސަރަހައްދު ބަންދުކުރަން ޖެހި ކުނި ބަލައިގަންނަ މިންވަރު ދަށްކޮށް ބޮޑެތި ކުނި ބަލައިގަތުން ވެސް ވަގުތީ ގޮތުން ހުއްޓައިލީއެވެ.

ހުޅުމާލޭގައި ކުނި ބެލެހެއްޓުމުގައި ދިމާވެފައިވާ ދަތިތައް ހައްލުކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވެމްކޯ އަށް ވަގުތީ ބިމެއް ހަމަޖައްސައިދީފައިވާ ކަމަށް ވެސް މުޖުތަބާ ވިދާޅުވެފައިވެއެވެ. މި ބަދަލުތަކާ އެކު މާދަމާއިން ފެށިގެން ވެމްކޯގެ ހުރިހާ އޮޕަރޭޝަނެއް ކުރީގެ ހާލަތަށް ރުޖޫޢަވާނެއެވެ.