ކ. މާފުށީ ބޭރުގައި ފްލޯޓިން ބާއެއްގެ ގޮތުގައި ބޭނުންކުރަމުން އައި ޕްރިންސެސް ލާލަ ސަފާރީ މިއަދު ހެނދުނު ނަގިލި ކަހާލައިގެން ގޮސް އެ ރަށުގެ ފަރުމައްޗަށް އެރުމާ އެކު އެއްކޮށް ފުނޑުފުނޑުވެއްޖެއެވެ.

ހެނދުނު އައި ގަދަ ކޮޅިގަނޑެއްގެ ތެރޭގައި ހިނގި މި ހާދިސާގައި ސަފާރީ ގޮސް ޖެހުނީ މާފުށީ ބަނދަރުގެ ބޭރު ތޮށިގަނޑާ ދިމާ ފަރުމައްޗަށެވެ. ފަރަށް ލައްވި ހިސާބުން ގާތްގަނޑަކަށް ދިހަ މިނެޓެއްހާ ކުޑަ ވަގުތުކޮޅެއްގެ ތެރޭގައި މުޅި އުޅަނދު ވަނީ ބޭނުން ނުކުރެވޭ ވަރަށް ހަލާކުވެފައެވެ.

Advertisement

މި ހާދިސާގައި އެއްވެސް މީހަކަށް އަނިޔާވި ކަމެއް އަދި ރިޕޯޓުކޮށްފައެއް ނުވެއެވެ. އެހެން ނަމަވެސް ސޯޝަލް މީޑިއާގައި ދައުރުވަމުންދާ ވީޑިއޯތަކަށް ބަލާއިރު ސަފާރީ ފަރަށް ބީހެމުން ދިޔަ ވަގުތު އޭގައި ތިބި ބައެއް މީހުން މޫދަށް ފުންމާލި މަންޒަރު ފެނެ އެވެ.

މި ހާދިސާއާ ގުޅޭ މައުލޫމާތު އަދި ކަމާ ބެހޭ އިދާރާތަކުން ހާމައެއް ނުކުރެ އެވެ. 

ޕްރިންސެސް ލާލަ އަކީ މާފުއްޓަށް ޒިޔާރަތްކުރާ ފަތުރުވެރިންނަށް ޚާއްޞަކޮށްގެން އެ ރަށް ކައިރީ ދާއިމީ ގޮތެއްގައި ބާއްވައިގެން ޚިދުމަތް ދެމުން އައި ސަފާރީއެކެވެ.

މޫސުން ގޯސްވެ މިއަދު ހެނދުނުން ފެށިގެން ރާއްޖޭގެ ބޮޑު ބަޔަކަށް އޮތީ ރީނދޫ ސަމާލު ނެރެފައި އެވެ. ރީނދޫ ސަމާލު ނެރެފައިވާ ސަރަހައްދުގެ ތެރޭގައި މާފުށި ހިމެނޭއިރު މި ސަރަހައްދަށް ވިލާގަނޑުގައި 50 މޭލަށް ވައި ޖެހެމުންދާ ކަމަށް މެޓު އޮފީހުން ބުނެފައިވެ އެވެ.