ހެނދުނުގެ ފެށުމާ އެކު ގިނަ ބަޔަކު ގްރީން ޓީ ނުވަތަ ބްލެކް ކޮފީ ބޮމުން އައި ނަމަވެސް ބަރުދަން ލުއިކުރުމަށް މި ދެ ބުއިމުން ހަށިގަނޑުގެ ގުނަވަންތަކަށް އެހީވަނީ ތަފާތު ދެ ގޮތަކަށް ކަމަށް ދިރާސާތަކުން ދައްކައިފިއެވެ.

ގްރީން ޓީ އާއި ބްލެކް ކޮފީ އަކީ ވެސް ކެލޮރީ މަދު ޞިއްޙީ ގޮތުން ފައިދާ ހުރި ބުއިންތައް ކަމަށް ޢާންމުކޮށް ޤަބޫލުކުރެވެއެވެ. ނަމަވެސް މި ދެ ބުއިން ހަށިގަނޑުގެ ތެރޭގައި މަސައްކަތްކުރާ ގޮތް ވަރަށް ތަފާތެވެ.

Advertisement

ގްރީން ޓީގައި ހިމެނޭ ކެޓެޗިން ނަމަކަށް ކިޔާ ޤުދުރަތީ އެންޓިއޮކްސިޑެންޓުތައް ޚާއްޞަކޮށް އީޖީސީޖީ ހަށިގަނޑުގައި ރައްކާކޮށްފައި ހުންނަ ފެޓް ވިރުވައިލުމަށް އެހީތެރިވެދެއެވެ. އޮބީސިޓީ ރިވިއުޒް ޖާނަލްގައި ޝާއިޢުކޮށްފައިވާ ދިރާސާތައް ދައްކާ ގޮތުން މި ފެޓް ވިރުވުމުގެ މަސައްކަތް ކުރިއަށް ދަނީ މަޑުމަޑުން ކަމަށް ވާއިރު ދާއިމީ ގޮތެއްގައި ބޯ ނަމަ ނަތީޖާ ރަނގަޅުވެއެވެ.

އޭގެ އިތުރުން ގްރީން ޓީން ލިބެނީ މަޑުމައިތިރި ކެފެއިން ބޫސްޓެކެވެ. އެހެންކަމުން ހަކަތަ ކުއްލިއަކަށް އެރުމެއް ނެތި ހަމަހިމޭން ގޮތެއްގައި ހޭލާ ހުރެވެއެވެ. ލޭގައި ހަކުރު ހުންނަ މިންވަރު ހަމައަކަށް އެޅުވުމަށް ވެސް ގްރީން ޓީ އެހީވެދެއެވެ. ހަކުރުގެ މިންވަރު ހަމައެއްގައި ހިފެހެއްޓުމަކީ ކާހިތްވުން ކޮންޓްރޯލްކޮށް ކެއުމުގެ ރަނގަޅު އާދަތައް ހިފެހެއްޓުމަށް މުހިންމު ކަމެކެވެ. 

ބްލެކް ކޮފީ އަށް ބަލާއިރު އޭގައި ގިނަ ޢަދަދަކަށް ކެފެއިން ހިމެނެއެވެ. މި ކެފެއިންގެ ސަބަބުން ހަށިގަނޑުގައި ތާމޯޖެނެސިސް ނުވަތަ ހޫނު އުފައްދައިގެން ކެލޮރީ އެންދުމުގެ މަސައްކަތް ހިންގައެވެ. ދި އެމެރިކަން ޖާނަލް އޮފް ކްލިނިކަލް ނިއުޓްރިޝަންގައި ޝާއިޢުކޮށްފައިވާ ދިރާސާ ދައްކާ ގޮތުން ކެފެއިންގެ ސަބަބުން ވަގުތީ ގޮތުން މެޓަބޮލިކް ރޭޓު އިތުރުވެ ފެޓް ވިރުވައެވެ.

ކެފެއިނުން އެޑްރެނެލިން ދޫކޮށް ކަސްރަތުކުރާ ވަގުތު ހިތްވަރާއި ކެލޮރީ އެންދުން އިތުރުކޮށްދެއެވެ. ކާހިތްވުން ވެސް ކޮންމެވެސް ވަރަކަށް ވަގުތީ ގޮތެއްގައި ދައްކޮށްދޭ ކަމަށް ދިރާސާތައް ބުނެއެވެ.

ހަކުރާއި ކިރާއި ސިރަޕް ނާޅައި ބޯ ނަމަ ގާތްގަނޑަކަށް އެއްވެސް ކެލޮރީއެއް ނުހިމެނެއެވެ. ނަމަވެސް ގިނައިން ބޭނުންކުރާ ނަމަ ކެފެއިންގެ ސަބަބުން ކޯޓިސޯލް މައްޗަށް ގޮސް ނިދުމަށް ދަތިވެ ބަރުދަން އިތުރުވުމާއި ހޯމޯން ގެ މައްސަލަތައް ކުރިމަތިވެދާނެ ކަމަށް ޑައެޓީޝަނުން ބުނެއެވެ.

މި ދެ ބުއިން ވެސް ރަނގަޅު ގޮތުގައި ބޭނުންކުރެވޭނެ ބައެއް ޢަމަލީ ނަސޭހަތް ވެސް ތަޖުރިބާކާރުން ދެއެވެ. ގްރީން ޓީ ތައްޔާރުކުރާއިރު ކެކިކެކި ހުންނަ ފެން ނޫން ހޫނު ފެނުގައި ދެ މިނެޓާއި ތިން މިނެޓާ ދެމެދު ބެހެއްޓުން ރަނގަޅެވެ. ބްލެކް ކޮފީ ބޯ އިރު ހަކުރާއި ސިރަޕާއި ކްރީމް ނާޅައި ތާޒާ ކޮފީ ބޯންވީއެވެ.

ގްރީން ޓީ ބޯ އެންމެ ރަނގަޅު ވަގުތަކީ ހެނދުނު ހެނދުނާ ނުވަތަ މެންދުރުފަހުގެ ކުރީކޮޅެވެ. ބްލެކް ކޮފީ ބޯންވީ ދުވަހުގެ ކުރީ ކޮޅުގައި ނުވަތަ ކަސްރަތުގެ ކުރިންނެވެ. ނިދުމަށް ބުރޫ ނާރާ ގޮތަށް ވަގުތު ހަމަޖައްސައިގެން ބެލެންސްކޮށް ބޭނުންކުރާ ނަމަ މި ދެ ބުއިން ވެސް ބަރުދަން ލުއިކުރުމުގެ މަގުގައި ބޭނުންތެރި އެހީއަކަށް ވެދެއެވެ.