އުރީދޫގެ 20 ވަނަ އަހަރީ ދުވަހާއި ގުޅިގެން ކުރިޔަށް ގެންދިޔަ "ލިވް އަންލިމިޓެޑް" ކެމްޕެއިނުގެ ތެރެއިން ހައްޖު ދަތުރު ލިބުނު ފަރާތާއި އިނާމު ހަވާލުކޮށްފި އެވެ.

ގުރުއަތުން ހޮވުނު ފަރާތާއި ރަމްޒީކޮށް އިނާމު ހަވާލު ކުރީ އިއްޔެ ބޭއްވި އެ ކުންފުނީގެ 21 ވަނަ އަހަރީ ދުވަހާއި ގުޅޭ ހާއްސަ ނޫސްވެރިންގެ ބައްދަލުވުމުގައި އެވެ.

Advertisement

އުރީދޫއިން ބުނީ އެ ކުންފުނީގެ ކަސްޓަމަރުންނަށް އަމާޒުކޮށްގެން ކުރިޔަށް ގެންދިޔަ މި ކެމްޕެއިންގައި ބައިވެރިވި މީހުންގެ ތެރެއިން ގުރުއަތުން ހޮވިގެން ހައްޖު ދަތުރު ލިބުނީ މިސްރިއްޔާ އަލީއަށް ކަމަށެވެ. އިއްޔެގެ ރަސްމިއްޔާތުގައި މިސްރިއްޔާވެސް ބައިވެރިވެފައިވެ އެވެ.

ގުރުއަތުން ހޮވުނު ފަރާތަށް އުރީދޫއިން ދެނީ ދެމީހަކަށް ހައްޖު ދަތުރެކެވެ. މިއީ ކެމްޕެއިންގެ ބޮޑު އިނާމެވެ.

އެ ކެމްޕެއިންގެ ދަށުން 19 އުމްރާ ދަތުރު ދީފައިވެ އެވެ. އުމްރާ ދަތުރުވެސް ދީފައިވަނީ ގުރުއަތުން ހޮވުނު ފަރާތަށް ދެމީހަކަށް އުމްރާވުމުގެ ފުރުސަތެވެ.

މާދަމާ ފާހަގަ ކުރާ އުރީދޫގެ 21 ވަނަ އަހަރީ ދުވަހާއި ގުޅިގެން އެ ކުންފުނިން ވަނީ ހާއްސަ އޮފާތަކަކާއި އެކު އާ އީޖާދުތަކެއް ތައާރަފު ކުރަން ނިންމާފަ އެވެ.