އުރީދޫ މޯލްޑިވްސްގެ 21 ވަނަ އަހަރީ ދުވަސް ފާހަގަކުރުމުގެ ގޮތުން ޚާއްޞަ ޑޭޓާ އޮފާތަކަކާއި އައު ޑިޖިޓަލް ޚިދުމަތްތަކެއް އެ ކުންފުނިން ތަޢާރަފުކޮށްފިއެވެ.

އެ ކުންފުނީގެ އަހަރީ ދުވަހަކީ އޮގަސްޓު އެއް ވަނަ ދުވަހެވެ.

އުރީދޫއިން ބުނީ އެ ދުވަހު ޕްރީޕެއިޑް އަދި ޕޯސްޓްޕެއިޑް ހުރިހާ ކަސްޓަމަރުންނަށް ވެސް އުރީދޫ ސުޕާ އެޕުގެ "ސުޕާ ޑީލްސް" މެދުވެރިކޮށް 21 ޖީބީގެ ޑޭޓާ ޕެކެއް ހިލޭ ލިބޭނެ ކަމަށެވެ. މި ޕެކޭޖު ބޭނުންކުރެވޭނީ އެންމެ ދުވަހަކަށް ކަމަށާއި ޕެކޭޖު ނެގޭނީ ހަމައެކަނި އޮގަސްޓް އެއް ވަނަ ދުވަހު ކަމަށް ބުންޏެވެ.

އަހަރީ ދުވަހާ ގުޅިގެން ގެނެސްދީފައިވާ އެންމެ ފާހަގަކޮށްލެވޭ ޚިދުމަތަކީ ޓްރޫކޯލާ ޕްރީމިއަމް ސީދާ އުރީދޫ އެކައުންޓަށް ބިލްކޮށްގެން ނެގޭ ގޮތަށް ހަމަޖެއްސުމެވެ. ވަކި ފައިސާ ދައްކާ ވަސީލަތެއް ބޭނުންނުކޮށް ސަބްސްކްރައިބް ކުރެވޭ މި ޚިދުމަތުގައި ސްޕޭމް ކޯލް ބްލޮކް ކުރުމާއި ޕްރޮފައިލް ބެލި މީހުންގެ މަޢުލޫމާތު ފެނުމާއި އިންކޮގްނިޓޯ މޯޑާއި އިޝްތިހާރު ނުފެންނަ ގޮތް ހެދުމާއި ޕްރީމިއަމް ވެރިފިކޭޝަން ބެޖު ފަދަ ފީޗާތައް ހިމެނެއެވެ. ޚާއްޞަކޮށް އޮޅުވައިލައިގެން ކުރާ ފޯނު ކޯލްތަކުން ރައްކާތެރިވުމަށް މި ޚިދުމަތް ބޭނުންތެރިވާނެ ކަމަށް އެ ކުންފުނިން ފާހަގަކޮށްފައިވެއެވެ.

މީގެ އިތުރުން ފައިވްޖީ އެއާފައިބާ ޝަރުތުހަމަވާ ކަސްޓަމަރުންނަށް "ޗައިލްޑްސޭފް" ގެ ނަމުގައި ޕޭރެންޓަލް ކޮންޓްރޯލް ޚިދުމަތެއް ވެސް ވަނީ ތަޢާރަފުކޮށްފައެވެ. މި ޚިދުމަތުން ކުޑަކުދިންގެ އިންޓަނެޓް ބޭނުންކުރެވޭ މިންވަރު ކޮންޓްރޯލްކޮށް ގޭގެ ބްރޯޑްބޭންޑް ވަސީލަތްތަކުގެ ޕޭރެންޓަލް ކޮންޓްރޯލް ފީޗާތައް ފުރިހަމައަށް ބޭނުންކުރެވޭނެ ކަމަށް އުރީދޫން ބުނެފައިވެއެވެ.

އެ ކުންފުނިން ވަނީ ގުރުއަތުން ހޮވައިގެން ބޮޑެތި އިނާމުތައް ދިނުމަށް ވެސް ހަމަޖައްސައިފައެވެ. ސުޕާ އެޕް މެދުވެރިކޮށް މާސްޓާކާޑު ބޭނުންކޮށްގެން 400 ރުފިޔާއަށް ވުރެ މަތިން ވިޔަފާރިކުރާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް ދެ މީހުންނަށް މެލޭޝިއާ ދެކޮޅު ޓިކެޓް ލިބޭނެއެވެ. ހަމައެއާ އެކު 400 ރުފިޔާއަށް ވުރެ މަތިން ރީޗާޖް ކުރާ ޕްރީޕެއިޑް ކަސްޓަމަރުންގެ ތެރެއިން ކޮންމެ 10 ދުވަހަކުން ނަސީބުވެރިއަކު ހޮވައި މޯލްޑިވިއަނުން ސްޕޮންސާ ކޮށްފައިވާ ބަންގްލަދޭޝްގެ ޑާކާއަށް ދެކޮޅު ޓިކެޓް ދިނުމަށް ވެސް ރޭވިފައިވެއެވެ.

ޕޯސްޓްޕެއިޑް އަދި ބްރޯޑްބޭންޑް ކަސްޓަމަރުންނަށް ވެސް ޚާއްޞަ ފުރުޞަތުތައް ހުޅުވައިލައިފައިވެއެވެ. 1000 ރުފިޔާއިން ފެށިގެން މަތީގެ ކްލަބް ޕްރިމިއާ ޕްލޭނަކަށް ބަދަލުވާ ފުރަތަމަ 100 ކަސްޓަމަރަކަށް ޑިސެމްބަރު 31 ގެ ނިޔަލަށް ބޭނުންކުރެވޭ 100 ރުފިޔާގެ "ހުއޯޕަން" އެޕް ޑިސްކައުންޓް ވައުޗަރެއް ލިބޭނެއެވެ. ސުޕާނެޓް އަންލިމިޓެޑް ކަސްޓަމަރުން އިތުރު ޕްލޭނަކަށް އަޕްގްރޭޑް ކުރާ ނަމަ ފުރަތަމަ ތިން މަހު މިހާރު ދައްކާ މަހުފީގައި މަތީ ސްޕީޑް ލިބޭ އިރު އެންމެ 21 ރުފިޔާއަށް 21 އެމްބީޕީއެސް ސްޕީޑުގައި ހަތް ދުވަހަށް 21 ޖީބީ ލިބޭ ޚާއްޞަ އެޑް-އޮން ޕެކެއް ވެސް ލިބެން ހުންނާނެ ކަމަށް އެ ކުންފުނިން ބުނެފައިވެއެވެ.

އެ ކުންފުނީގެ އަހަރީ ދުވަހުގެ ހަރަކާތްތަކުގެ ތެރޭގައި ރާއްޖޭގެ އެންމެ ބޮޑު އެއް އިޖުތިމާޢީ ހަރަކާތް ކަމުގައިވާ "އުރީދޫ ފަން ރަން" އަންނަ ޑިސެމްބަރު 11 ވަނަ ދުވަހު ހުޅުމާލޭގައި ބޭއްވުމަށް ވެސް ވަނީ ނިންމައިފައެވެ.

އޮގަސްޓް އެއް ވަނަ ދުވަހު 21 ވަނަ އަހަރީ ދުވަސް ފާހަގަކުރާ އެ ކުންފުނީގެ އަމާޒަކީ ޑިޖިޓަލް ގޮތުން ގުޅުވައިލެވިފައިވާ ބާރުވެރި މުޖުތަމަޢެއް ބިނާކުރުން ކަމަށް އުރީދޫން ބުނެފައިވެއެވެ.