ހުޅުމާލޭގައި ކުނި ނެގުމާއި ކުނި ބެލެހެއްޓުމުގައި ދިމާވެފައިވާ މައްސަލަ ހައްލު ކުރަން އެހީވުމުގެ ގޮތުން ވޭސްޓް މެނޭޖްމެންޓު ކޯޕަރޭޝަން (ވެމްކޯ) ހުޅުމާލެއިން ބިމެއް ހަމަޖައްސައިދީފި އެވެ.

ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) އިން އެ ބިން ހަމަޖައްސައިދިންކަން ހާމަ ކުރެއްވީ ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލެވެ. އެ ބިން ހަމަޖައްސައިދިނީ ވަގުތީ ގޮތުންނެވެ.

Advertisement

މުޖުތަބާ އެކްސްގައި ކުރެއްވި ޕޯސްޓެއްގައި ވިދާޅުވީ އެޗްޑީސީގެ މެނޭޖިން ޑައިރެކްޓަރު އިސްނަންގަވައިގެން ހަމަޖައްސައިދެއްވި އެ ބިމުގެ ސަބަބުން ކުންފުންޏަށް ވަރަށް ރަނގަޅު ހައްލެއް ލިބިފައިވާ ކަމަށެވެ.

މި ދަތިކަން ކުރިމަތިވީ ތިލަފުށީގައި ހުންނަ ރީޖަނަލް ވޭސްޓް މެނޭޖްމަންޓް ފެސިލިޓީގައި ހިނގި އަލިފާނުގެ ހާދިސާއާ ގުޅިގެން އެ ތަނުގެ ބައެއް ސަރަހައްދުތައް ބަންދުކުރަން ޖެހުމުންނެވެ. އެކަމާ ގުޅިގެން ވެމްކޯއިން ވަނީ މާލެއާއި ހުޅުމާލެއާއި ވިލިމާލޭގެ ޓްރާންސްފާ ފެސިލިޓީތަކުގެ މަސައްކަތަށް ބުރޫ އަރައި ކުނި ބަލައިގަންނަ މިންވަރު މަދުކުރޮށްފައި އެވެ.

ތިލަފުށީގައި ހިނގި އަލިފާނުގެ ހާދިސާގެ އަސަރު މާލެ ސަރަހައްދުގެ ކުނި ނެގުމުގެ ޚިދުމަތަށް ކޮށްފައިވާއިރު އެޗްޑީސީން ހަމަޖައްސައިދިން ވަގުތީ ބިމާ އެކު މި ހާލަތު ރަނގަޅުވާނެ ކަމަށް ބެލެވެއެވެ.