އިންޑިއާގެ ސްޓޭޓެއް ކަމަށްވާ ކަރްނާޓަކާގައި އުމުރުން 18 އަހަރާއި 25 އަހަރާ ދެމެދުގެ އުމުރުފުރާގެ މީހުންގެ މެދުގައި ހަލުވި ކަމާއި އެކު އެއިޑްސް ބަލި ފެތުރެމުންދާތީ ކޮލެޖު، ޔުނިވާސިޓީތަކުގެ ސަމާލުކަމަށް އެކަން ގެނެސް ފިޔަވަޅުތަކެއް އަޅަން އަންގައިފި އެވެ.

ރިޕޯޓުތައް ބުނާގޮތުގައި މި ފަހުން ހެދި ޓެސްޓުތަކަކުން 7,000 އަށް ވުރެ ގިނަ ޒުވާނުން އެޗްއައިވީ އަށް ޕޮޒިޓިވް ވެފައިވެ އެވެ. އެހެންވެ ސަރުކާރުން އެ ސްޓޭޓްގެ ސިޓީތަކުގެ ހުރިހާ ކޮލެޖެއްގައި ޓެސްޓިން އަދި ކައުންސެލިން ކޭމްޕުތައް ބޭއްވުން ލާޒިމުކޮށްފައިވެ އެވެ.

Advertisement

ކަރްނާޓަކާ ސްޓޭޓް އެއިޑްސް ޕްރިވެންޝަން ސޮސައިޓީ (ކެސެޕްސް) ގެ އެންގެވުމާ އެއްގޮތަށް ސަރުކާރު ކޮލެޖުތަކާއި އެހީ ލިބޭ ކޮލެޖުތަކާއި ޕްރައިވެޓް ކޮލެޖުތައް ހިމެނޭ ގޮތަށް މި ކޭމްޕުތައް ހިންގުމަށް ސްޓޭޓް ސަރުކާރުން ވަނީ ނިންމައިފައެވެ. ޤައުމީ އެއިޑްސް ކޮންޓްރޯލް ޖަމިއްޔާ (ނެކޯ) ގެ ތަފާސްހިސާބުތައް ދައްކާ ގޮތުން އިންޑިއާގައި އެޗްއައިވީ ޖެހިފައިވާ މީހުންގެ ޢަދަދު އެންމެ ގިނަ ސްޓޭޓްތަކުގެ ތެރެއިން ކަރްނާޓަކާ އޮތީ ތިންވަނައިގައެވެ.

އެ ސްޓޭޓުގައި ގާތްގަނޑަކަށް 260,000 މީހުން ވައިރަހާ އެކު ދިރިއުޅެމުންދެ އެވެ. އޭގެ ތެރެއިން ގާތްގަނޑަކަށް 205,000 މީހުން އެންޓިރެޓްރޯވައިރަލް ތެރަޕީ (އޭއާރުޓީ) ހޯދަމުންދާ ކަމަށް އެ ތަފާސްހިސާބުތަކުން ހާމަވެއެވެ.

ރިޕޯޓުތައް ބުނާ ގޮތުގައި ކަރްނާޓަކާގައި 56,406 މީހުންނަކީ އެމީހުންގެ ހަށިގަނޑުގައި އެޗްއައިވީ ހުރިކަން ނޭނގި ދިރިއުޅެމުންދާ މީހުންނެވެ. އެހެންކަމުން އަވަހަށް ޓެސްޓުކޮށް ބަލި ދެނެގަތުމަކީ ޢާންމު ޞިއްޙީ ނިޒާމުގައި އެންމެ އިސްކަންދޭ އެއް ކަމެއް ކަމުގައި ވެފައިވެއެވެ.

ތަފާސްހިސާބުތައް ދައްކާ ގޮތުން 18 އަހަރާއި 35 އަހަރާ ދެމެދުގެ އުމުރުފުރައިގައި ވައިރަސް ޖެހިފައިވާ މީހުންގެ ޢަދަދު 2023-24 ގައި 44,500 ގައި ހުރެފައި 2025-26 ގައި 66,600 އަށް އިތުރުވެފައިވެއެވެ. ރައްކާތެރިކަމެއް ނެތި ޖިންސީ ގުޅުން ހިންގުމުގެ ނުރައްކާތެރިކަން ޒުވާނުންގެ ބޮޑު ބަޔަކަށް ނޭނގޭ ކަމަށާއި ލަދުވެތިކަމާއި ތަފާތުކުރެވިދާނެ ކަމުގެ ބިރު ހީވުމުގެ ސަބަބުން އަމިއްލައަށް ޓެސްޓު ހެދުމުގެ ނިސްބަތް ދަށް ކަމަށް އޮފިޝަލުންނާއި ހަވާލާދީ ރިޕޯޓުތައް ބުނެ އެވެ.

މި މައްސަލައާ ކުރިމަތިލުމަށް ސްޓޭޓު ސަރުކާރުން އެޅި ފިޔަވަޅުތަކުގެ ތެރޭގައި އިންޖިނިއަރިން ކޮލެޖުތަކާއި ޑިގްރީ ކޮލެޖުތަކުގައި ޓެސްޓިން ސްކްރީނިން އަދި ކައުންސެލިން ހިމެނޭ ޞިއްޙީ ކޭމްޕުތައް ރާވައި ހިންގުން ހިމެނެއެވެ. ހަމައެހެންމެ ކޮލެޖުތަކުގައި ހުރި ރެޑް ރިބަން ކްލަބުތައް މެދުވެރިކޮށް ހޭލުންތެރިކުރުމުގެ ބަހުސްތަކާއި ހަރަކާތްތައް ހިންގަމުންދާ ކަމަށް ވެ އެވެ.