ސަފާރީ އުޅަނދުފަހަރު ގަނެ ބަނުމާއި މަރާމާތުކުރުމަށް ބޭނުންވާ ފަރާތްތަކަށް އަމާޒުކޮށް ބޭންކް އޮފް މޯލްޑިވްސް (ބީއެމްއެލް) އިން "ލިވަބޯޑް ފައިނޭންސް" ގެ ނަމުގައި މާލީ ޚިދުމަތެއް ތަޢާރަފުކޮށްފިއެވެ.

އެ ބޭންކުން ހާމަކުރި ގޮތުގައި މި ފެސިލިޓީ މެދުވެރިކޮށް ލިވަބޯޑް އުޅަނދެއް ގަތުމާއި ބެނުމާއި އިންޖީނު އެޅުމުގެ އިތުރުން ބޭނުންވާ ސާމާނާއި ވަސީލަތްތައް ހޯދުމަށް ވެސް ފައިނޭންސް ލިބޭނެއެވެ. މި ލޯނުގެ ރަހުނަކަށް ބޭނުންވާނީ ފައިނޭންސްކުރާ އުޅަނދު އެކަންޏެވެ. ވަކި އިތުރު ރަހުނެއް ހުށަހެޅުމެއް ނެތި މި ޚިދުމަތް ލިބޭނެ ކަމަށް ބީއެމްއެލުން ބުނެފައިވެއެވެ.

Advertisement

ރާއްޖޭގައި މިވަގުތު އުޅަނދުފަހަރަށް ދޫކުރާ އެންމެ ކުޑަ އިންޓެރެސްޓް ރޭޓު ކަމަށްވާ އަހަރަކު 9.5 އިންސައްތައިގައި ދޫކުރާ މި ފެސިލިޓީ އަނބުރާ ދެއްކުމަށް ހަތް އަހަރާ ހަމައަށް މުއްދަތު ލިބެއެވެ. ފައިސާ ދެއްކުމުގެ ތާވަލު ރޭވިފައި ވަނީ ޕީކް ސީޒަނާއި އޮފް-ޕީކް ސީޒަނަށް ބިނާކޮށް އުޅަނދު އޮޕަރޭޓްކޮށްގެން ލިބޭ އާމްދަނީއާ ފައިދާއާ ގުޅޭ ގޮތުން ފައިސާ ދެއްކޭނެ އިންތިޒާމަކުންނެވެ. ފައިނޭންސް އަނބުރާ ދެއްކުމަށް ހަމަޖެހިފައި ވަނީ ޑޮލަރުންނެވެ.

ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ ލިވަބޯޑް ދާއިރާއަކީ ރާއްޖޭގެ ފަތުރުވެރިކަމުގެ ސިނާޢަތުގައި އެންމެ ފާހަގަކޮށްލެވޭ އެއް ދާއިރާ ކަމަށާއި އެ ދާއިރާގައި ޙަރަކާތްތެރިވާ ފަރާތްތަކަށް ވިޔަފާރި ފުޅާކުރުމަށް މާލީ އެހީތެރިކަން ބޭނުންވާ ކަމަށެވެ.

"ލިވަބޯޑް ފައިނޭންސްގެ ނަމުގައި އަޅުގަނޑުމެން މި ތައާރަފުކުރި މާލީ ހިދުމަތަކީ މި ދާއިރާއަށް އާމްދަނީ ލިބޭ ގޮތާއި ހަރަދުތައް ހިނގާ ގޮތަށް ބަލައި ހާއްސަކޮށް ފަރުމާކޮށްފައިވާ ހިދުމަތެއް. މީގެ ސަބަބުން އޮޕަރޭޓަރުންނަށް އެ ބޭފުޅުންގެ ވިޔަފާރި ކުރިއެރުވުމަށް އިންވެސްޓް ކުރުމުގެ ފުރުސަތާއި އިތުބާރު ލިބިގެންދާނެ. މިއީ ދިވެހި އިގްތިސާދުގެ މުހިންމު ދާއިރާތަކަށް އެހީތެރިކަން ފޯރުކޮށްދިނުމަށް އަޅުގަނޑުމެން ކުރަމުންދާ މަސައްކަތުގެ ދަށުން ކުރެވޭ މަސައްކަތެއް" އޭނާ ވިދާޅުވިއެވެ.

މި ފައިނޭންސިންގެ ޒަރީޢާއިން މިހާރު އެ ދާއިރާގައި ޙަރަކާތްތެރިވާ އޮޕަރޭޓަރުންނަށް ފްލީޓް ފުޅާކޮށް ޒަމާނީ ކުރުމުގެ ފުރުޞަތު ފަހިވާއިރު އަލަށް ލިވަބޯޑް ވިޔަފާރިއަށް ވަންނަން ބޭނުންވާ ފަރާތްތަކަށް ވެސް ބޭނުންވާ ރައުސުމާލު ހޯދުމަށް ފަސޭހަވެގެންދާނެ ކަމަށް ބީއެމްއެލުން ބުނެފައިވެއެވެ.