މި މަހު 20 އިންޑިއާގެ ނިއުދިއްލީގެ މަޖިލީސް އިދާރާ ކައިރީގައި ޒުވާނުން ކުރި މުޒާހަރާގައި ބައިވެރިވި ގާތްގަނޑަކަށް 1,000 މީހުންނަކީ ކުށުގެ ރެކޯޑު އޮތް މީހުން ކަމަށް ފުލުހުން ބުނެފި އެވެ.

އެދުވަހުގެ މުޒާހަރާގައި ބައިވެރިވި މީހުން ދެނެގަތުމަށް ދިއްލީ ފުލުހުން ވަނީ ފޭޝަލް ރެކޮގްނިޝަން ޓެކްނޮލިޖީއާ ސީސީޓީވީ ފުޓޭޖުގެ އިތުރުން އާންމުންނާއި ނޫސްވެރިން ނެގި ވިޑިއޯތައް ބަލައި ދިރާސާ ކޮށްފައި އެވެ. ދިއްލީ ފުލުހުން ބުނީ މިހާތަނަށް 2,873 މީހުންނަކީ ކޮންބައެއްކަން ދެނެގަނެފައިވާ ކަމަށެވެ.

Advertisement

އޭގެ ތެރެއިން 989 މީހުންނަކީ ކުރިން ކުށުގެ ރެކޯޑު އޮތް މީހުން ކަމަށެވެ. އޭގެ ތެރޭގައި މީހުން މެރުމުގެ ކުށުގައި ކުރިން ތުހުމަތުކުރެވިފައިވާ 101 މީހުންނާއި ވައްކަމާއި ފޭރުމުގެ މައްސަލަތަކުގައި ހައްޔަރުކޮށްފައިވާ 284 މީހުން ހިމެނެއެވެ.

މީހުން މެރުމަށް މަސައްކަތްކުރުމުގެ ކުށުގައި ތުހުމަތު ކުރެވިފައިވާ 62 މީހުންނާއި ހަތިޔާރާ ބެހޭ ޤާނޫނުގެ ދަށުން ކުށެއްގެ މައްސަލައިގަ ހިމެނޭ 229 މީހުން ދެނެގަނެވިފައިވެ އެވެ. ޖިންސީ ގޯނާގެ މައްސަލަތަކުގައި ތުހުމަތު ކޮށްފައިވާ 61 މީހުން ހިމެނެ އެވެ.

އަދި ކުޑަކުދިންނަށް ޖިންސީ ގޯނާކުރުމުގެ ޤާނޫނުގެ ދަށުން އެފަދަ މައްސަލަތަކުގައި ތުހުމަތުކޮށް ސުވާލުކޮށްފައިވާ ހަ މީހުން ހިމެނޭ ކަމަށް ފުލުހުން މީޑިއާގައި ބުނެފައިވެ އެވެ.

މި ރެކޯޑުތައް ހާމަ ކުރި ނަމަވެސް ޒުވާނުންގެ މުޒާހަރާތައް ހުއްޓާލުމުގެ މައިގަނޑު އެއް ޝަރުތުގެ ގޮތުގައި މަޖިލީސް ގޭ ގައިރީ ކުރި މުޒާހަރާއާއި ގުޅިގެން އެއްވެސް މީހަކަށް ދައުވާ ނުކުރުން ހިމެނެ އެވެ. އެކަމަށް ޝަރުކާރުން ވަނީ އެއްބަސްވެސް ވެފަ އެވެ.

ނަމަވެސް މުޒާހަރާތަކުގައި ހިނގި ހަމަނުޖެހުމާ ގުޅޭ ގޮތުން އިންޑިއާގެ މައި ސަރުކާރުން ސުޕްރީމް ކޯޓަށް ހުށަހެޅީ ދަރިވަރުން ސީދާ ހަމަނުޖެހުމުގައި ބައިވެރިވެފައިވާ ކަމަށް ޤަބޫލުނުކުރާ ކަމަށެވެ. ރިޕޯޓުތައް ބުނާގޮތުގައި ސަރުކާރުން ބުނެފައި ވަނީ "ޖަމާޢަތަށް ނުރައްކާ ކުރިމަތިކުރާ ބައެއް" މުޒާހަރާތަކުގެ ތެރެއަށް ވަދެގެންފައި ހުރެދާނެ ކަމަށެވެ.

ސުޕްރީމް ކޯޓުން ވަނީ 18 އަހަރު ނުފުރޭ ކުށުގެ ރެކޯޑެއް ނެތް މުޒާހިރީން ދޫކޮށްލުމަށް އަމުރުކޮށްފައެވެ. އެ އަމުރުން އިސްތިސްނާ ވަނީ ކުށުގެ ރެކޯޑު ހުރި މީހުންނާއި "ޖަމާޢަތަށް ނުރައްކާ ކުރިމަތިކުރާ ބައެއް" ގެ ގޮތުގައި ފާހަގަވެފައިވާ ފަރާތްތަކެވެ.

އޭގެ އިތުރުން ކޯޓުން ވަނީ މުޒާހަރާގައި ހިނގި ހަމަނުޖެހުމާއި ފުލުހުން ހައްދުފަހަނައެޅި ކަމަށް ކުރެވޭ ތުހުމަތުތައް މިނިވަން ތަޙުޤީޤަކުން ބެލުމަށް އަންގައިފައެވެ. ތަޙުޤީޤުގެ ބައެއްގެ ގޮތުން ސީސީޓީވީ ފުޓޭޖާއި ޑްރޯން ރެކޯޑިންތަކާއި ބޮޑީ ކެމެރާ ފުޓޭޖް ރައްކާތެރިކޮށް ބެލެހެއްޓުމަށް ވެސް ކޯޓުން ވަނީ ކަމާ ބެހޭ ފަރާތްތަކަށް އަންގައިފައެވެ.