ފާމަސީ ދާއިރާއިން ތަޢުލީމު ލިބިފައި ތިބި ދިވެހިންގެ އަދަދު މަދުކަން ފާހަގަވުމާ ގުޅިގެން ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް (ސްޓޭޓްފާމާ) އިން ދިވެހި ފާމަސިސްޓުން ބިނާކުރުމާ ގުޅޭ ގޮތުން މޯލްޑިވިސް ނޭޝަނަލް ޔުނިވަސިޓީ (އެމްއެންޔޫ) އާ އެކު މިއަދު މަޝްވަރާކޮށްފިއެވެ.

ސްޓޭޓްފާމާއިން މިދިޔަ މަހު 30 އަށް ވުރެ ގިނަ ފާމަސިސްޓުން ހޯދުމަށް އިޢުލާނު ކުރިއިރު އެ މަޤާމުތަކަށް ކުރިމަތިލާނެ ތަމްރީނު ލިބިފައި ތިބި ދިވެހިން ނެތްކަން ވަނީ ހާމަވެފައެވެ.

Advertisement

އެހެންވެ އެ ކުންފުނީގެ އިސް ބޭފުޅުން ވަނީ އެމްއެންޔޫގެ ފެކަލްޓީ އޮފް ހެލްތު އެންޑް ސައިންސާ ބައްދަލުކޮށް ފާމަސީ ދާއިރާއިން ކިޔަވާ ދަރިވަރުންގެ ޢަދަދު އިތުރުކުރެވޭނެ ގޮތްތަކާ ބެހޭ ގޮތުން ޚިޔާލު ބަދަލުކޮށްފައެވެ.

މި ބައްދަލުވުމަށް ފަހު ސްޓޭޓްފާމާއިން ހާމަކުރި ގޮތުގައި މިހާރު ވެސް ދާއިރާގައި ޙަރަކާތްތެރިވާ ފާމަސިސްޓުންނަށް ރިފްރެޝާ ކޯސް ހިންގުމަށް ވެސް އެ ކުންފުނިން ނިންމާފައިވެއެވެ.

ކުރިން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ދަށުން ހިންގަމުން ގެންދިޔަ ފާމަސީތައް މި މަހުގެ ފުރަތަމަ ދުވަހުން ފެށިގެން ބަދަލުވެފައި ވަނީ ސްޓޭޓްފާމާގެ ބެލެނިވެރިކަމުގެ ދަށަށެވެ.

ރާއްޖެއަށް ބޭހާއި މެޑިކަލް ސާމާނު ފޯރުކޮށްދިނުމުގެ މަސައްކަތް ކުރީން ކުރީ އެސްޓީއޯއިން ނަމަވެސް ބޭސް ލިބުމުގައި ދިމާވެފައިވާ ދަތިތައް ޙައްލުކޮށް މިހާރަށް ވުރެ ހަރުދަނާ ނިޒާމެއް ޤާއިމުކުރުމުގެ މަޤުޞަދުގައި ސްޓޭޓްފާމާ ވަނީ އެ ބޭނުމަށް ވަކި ކުންފުންޏެއްގެ ގޮތުގައި އުފައްދައިފައެވެ.