ސީރިއާއިން ހައްދު ފަހަނަ އަޅާފައިވާ އިޒްރޭލާ ގުޅުން ގާއިމް ކުރުމުގެ މަސައްކަތް ފަށައިފި އެވެ.

މިކަން އިއުލާނު ކުރެއްވީ ސީރިއާގެ ވަގުތީ ރައީސް އަޙުމަދު އައްޝަރަޢު އަލްޖަޒީރާއަށް ދެއްވި އިންޓަވިއެއްގައި އެވެ. މި މަސައްކަތުގެ ދަށުން ސީރިއާއިން ބޭނުންވަނީ ގުޅިފައިވާ ސެކިއުރިޓީ އެއްބަސްވުމެއް ގާއިމް ކުރުމެވެ.

Advertisement

އައްޝަރައު ވިދާޅުވީ މިކަމުގައި ސީރިއާއިން ދަނީ މެދުވެރީންގެ އެހީތެރިކަން ހޯދަމުން ކަމަށެވެ. އޭނާ ވިދާލުވީ އިޒްރޭލާ ދެކޮޅަށް އަސްކަރީ ކުރިމަތިލުމަކަށް ދިއުމަކީ ސީރިއާއިން ބޭނުންވާ ކަމެއް ނޫން ކަމަށެވެ.

ހުށަހެޅިފައިވާ އެއްބަސްވުމުގެ ސަބަބުން ދެ ފަރާތުގެ ދެމެދުގައި ޞުލްޙައާއި ސަލާމަތް ޤާއިމުވެގެންދާނެ ކަމަށް އުންމީދުކުރާ ކަމަށެވެ. އެހެންކަމުން މި މަސައްކަތް ކާމިޔާބު ވާނެ ކަމަށް އުންމީދު ކުރައްވާ ކަމަށް ވިދާޅުވި އެވެ.

މީގެ އިތުރުން އައްޝަރަޢު ވިދާޅުވީ މިފަދަ ސެކިއުރިޓީ އެއްބަސްވުމެއްގައި ސޮއިކުރުމުން ގޯލާން ހައިޓްސް ގެ މައްޗަށް ސީރިއާއިން ޒަމާނުއްސުރެ ކުރަމުން އަންނަ ދައުވާއަށް އެއްވެސް އަސަރެއް ނުކުރާނެ ކަމަށެވެ.

1967 ވަނަ އަހަރުގެ ހަ ދުވަހުގެ ހަނގުރާމައިން ފެށިގެން ގޯލާން ހައިޓްސް އޮތީ އިޒްރޭލުގެ ބާރުގެ ދަށުގައެވެ.

ސީރިއާއާއި އިޒްރޭލާ ދެމެދު ދިގުލައިގެން ގޮސްފައިވާ ދެބަސްވުމުގެ މައިގަނޑު މައްސަލައެއް ކަމުގައި ވާ މި ސަރަޙައްދަށް ދިމިޝްޤުން ކުރާ ދައުވާ ބަދަލެއް ނެތި ދެމެހެއްޓުމުގެ ސިޔާސަތުގައި ސީރިއާ އިން ސާބިތުކަމާއި އެކު އޮތް ކަމަށް ވިދާޅުވި އެވެ.