ގދ. ފަރެސްމާތޮޑާ ކައިރީ އޮންނަ ފަޅުރަށަކުން ވެލި ނަގަނިކޮށް ހުއްޓުވައި، ވެލި ބަސްތާތަށް ހުސްކުރުވައިފި އެވެ.

ފަރެސްމާތޮޑާ ކައުންސިލުން ފޭސްބުކުގައި އާންމުކުރި ވީޑިއޯއިން ފެންނަ ގޮތުގައި ދޯންޏެއްގައި ބަރުކޮށްފައި ހުރި ވެލި ބަސްތާތައް ގޮނޑުދޮށަށް ބާލައި ހުސްކުރާ މަންޒަރު ފެނެ އެވެ. އެ މަސައްކަތުގައި ދޯނީގައި ތިން މީހަކު ހަރަކާތްތެރިވެ އެވެ.

Advertisement

ކައުންސިލުން ބުނެފައިވާ ގޮތުގައި ގަވާއިދާ ޚިލާފަށް ވެލި ނެގި ފަރާތް ހުއްޓުވައި ނެގި ހުރިހާ ވެއްޔެއް އެ ރަށަށް ބޭލުވީ ކައުންސިލުން ހިންގާ މޮނިޓަރިން މަސައްކަތުގެ ތެރެއިންނެވެ. އެ ދޯނި ނިސްބަތްވަނީވެސް ފަރެސްމާތޮޑާއަށެވެ.

ފަރެސްމާތޮޑާ ކައުންސިލްގެ ރައީސް މުހައްމަދު ސޮބާހު ވިދާޅުވީ ވެލި ނެގުމުގެ ހުއްދަ ލިބިފައިވާ ބައެއް ސަރަޙައްދުތައް ހުރި ނަމަވެސް ގާނޫނާ ޚިލާފު ގޮތުގައި ވެލި ނެގުން ހުއްޓައިލުމަށް ކުރިން ވެސް އެކި ފަހަރު މަތިން އަންގާފައިވާނެ ކަމަށް ސަބާޙު ވިދާޅުވިއެވެ. އޭނާ ވިދާޅުވެފައިވާ ގޮތުގައި މިއީ މުސްތަގުބަލަށްޓައި އަޅާ ފިޔަވަޅެއް ކަމަށެވެ.

މީގެ ކުރިން އެ ރަށް ކައިރީ ތިން ފަޅުރަށް އޮތް ނަމަވެސް އާންމުން އެކި ބޭނުންތަކަށް ވެލި ނެގުމުގެ ސަބަބުން އެއް ރަށް ވަނީ ނެތި ގޮސްފައިކަން ސޮބާހު ފާހަގަ ކުރެއްވި އެވެ.

ރާއްޖޭގެ ފަޅު ރަށްރަށާ ބެހޭ ގާނޫނުގެ ދަށުން ހަދާފައިވާ ގަވާއިދުގައި ޚާއްޞަ ހުއްދައެއް ނެތި ފަޅު ރަށްރަށުގެ ގޮނޑުދޮށުން ވެލި ނެގުން ވަނީ މަނާކޮށްފައެވެ.

އެހެންނަމަވެސް ތަފާތު ބޭނުންތަކަށް ގޮނޑުދޮށުން ވެލި ނެގުމަކީ ޒަމާނުއްސުރެ ރާއްޖޭގައި ވަރަށް ޢާންމު ކަމެކެވެ.