ފަލަސްތީނުގެ ހުޅަނގު އައްސޭރީގައި މި ހަފުތާގައި ހިނގި ހަމަނުޖެހުންތަކުގައި ދެ މިސްކިތެއްގައި އިސްރާއީލް މީހުން ހުޅުޖަހައިފި އެވެ.

އެ ސަރަހައްދަކީ އިޒްރާއީލުގެ ބާރުގެ ދަށުގައި އޮންނަ ސަރަހައްދެކެވެ. އިޒްރާއީލްގެ ގިނަ ބަޔަކު ވަޒަންވެރި ކުރުވަމުންދާ އެ ސަރަހައްދުގައި ދޭތެރެ ދޭތެރެއިން ފަލަސްތީނު މީހުންނާއި އިޒްރާއީލް މީހުންނާ ދެމެދު ހަމަނުޖެހުން ހިނގަ އެވެ.

Advertisement

ހުޅަނގު އައްސޭރީގެ ނާބުލުސް ސިޓީގެ ދެކުނުގައި އޮންނަ ޤުޞްރާ ރަށުގެ މޭޔަރު ޢަބްދުލްޢަޒީމް ވާދީ ވިދާޅުވީ ރަށުގެ ދެކުނު ފަރާތުގައި ޢިމާރާތްކުރަމުން ދިޔަ މިސްކިތެއްގައި އިސްރާއިލް މީހުން ރޯކޮށްލި ކަމަށެވެ. ވާދީ ވިދާޅުވި ގޮތުގައި އެ ރޯކޮށްލުމުގެ ސަބަބުން މިސްކިތުގެ ދޮރުއަށި ހަލާކުވެ ބޭރު ހިލައިގެ މަސައްކަތަށް ވެސް ބޮޑެތި ގެއްލުންތަކެއް ލިބުން ކަމަށެވެ.

ހަމަލާ ދިން ބަޔަކު މިސްކިތުގެ ފާރުތަކުގައި ޢިބްރީ ބަހުން "ބަދަލުހިފުން" ފަދަ ލިޔުންތައް ލިޔެފައިވާ ކަމަށް ވެސް އޭނާ ވިދާޅުވިއެވެ. މިކަން ކޮށްފައި މިވަނީ މި ހަފްތާގައި ހިނގި ހަމަނުޖެހުންތަކުގައި ހަ މީހަކު މަރުވެފައިވަނިކޮށެވެ.

މި ހާދިސާއާ ގުޅިގެން އިޒްރޭލު ސިފައިން ބުނީ މިސްކިތެއްގައި ރޯކޮށްލި ކަމުގެ ރިޕޯޓް ލިބުމާ އެކު ޤުޞްރާ ރަށުގެ ވަށައިގެންވާ ސަރަހައްދަށް ސިފައިން ފޮނުވި ކަމަށެވެ. ސިފައިން ފޮނުވި އިރު އެމީހުން ފިލާފައިވާ ކަމަށާއި ފާރުގައި ލިޔެފައިވާ ލިޔުންތައް ފެނިފައިވާ ކަމަށެވެ.

މީގެ އިތުރުން ވަކި ހާދިސާއެއްގައި ތޫލްކަރަމް ކައިރީގައި އޮންނަ ކޫރް އަވަށުގެ މިސްކިތެއްގައި ވެސް ޔަހޫދީ ވަޒަންވެރިން ރޯކޮށްލައި ނަސްލީ ތަފާތުކުރުމުގެ ޝިޢާރުތައް ފާރުތަކުގައި ލިޔެފައިވާ ކަމަށް ފަލަސްޠީނުގެ އައުޤާފާއި ދީނީ ކަންކަމާ ބެހޭ ވުޒާރާއިން ބުނެފައިވެއެވެ.

ހުކުރު ދުވަހު ޓެލް އަވަށުގައި ޔަހޫދީ ވަޒަންވެރިންނާއި ފަލަސްޠީނު ރައްޔިތުންނާ ދެމެދު ހިނގި ވަރުގަދަ ހަމަނުޖެހުންތަކުގައި ހަތަރު ފަލަސްޠީނު މީހުންނާއި ދެ އިޒްރޭލު މީހުން މަރުވިއެވެ. އެ ހާދިސާއާ ގުޅިގެން އިޒްރޭލު ސިފައިން ނާބުލުސް ސިޓީއާއި ކައިރި ރަށްތަކަށް ވަދެ "ޓެރަރިޒަމާ ދެކޮޅު" އޮޕަރޭޝަނެއް ކަމަށް ސިފަކޮށް ފަލަސްތީނު ބަޔަކު ހައްޔަރުކޮށްފައިވެއެވެ. 

2023 ވަނަ އަހަރުގެ އޮކްޓޫބަރު ހަތެއްގައި ޙަމާސް ޖަމާޢަތުން އިޒްރޭލަށް ދިން ހަމަލާއާ ގުޅިގެން ޣައްޒާ ހަނގުރާމަ ފެށުނު ފަހުން ހުޅަނގު އައްސޭރީގައި ހަމަނުޖެހުން ވަރަށް ބޮޑަށް އިތުރުވެފައިވާ ކަމަށް ރިޕޯޓުތައް ބުނެ އެވެ.