ރަޝިޔާ-ޔޫކްރެއިން ހަނގުރާމައިގައި ބައިވެރިކުރުމަށް ނޯތް ކޮރެއާގެ އިތުރު 30،000 ސިފައިން ގެންދިއުމުގެ މަސައްކަތް ރަޝިޔާއިން ފަށާފައިވާ ކަމަށް ޔޫކްރެއިނުގެ ރައީސް ވޮލޮޑިމީރް ޒެލެންސްކީ ތުހުމަތު ކުރައްވައިފި އެވެ.

ޒެލެންސްކީ ހޮނިހިރު ދުވަހު ދެއްވާ ރޭގަނޑުގެ ވީޑިއޯ ޚިޠާބުގައި ވިދާޅުވީ ރަޝިޔާގެ ވޮރޮނެޒް ސަރަޙައްދުގައި ޖޫން މަހުން ފެށިގެން އެ ސިފައިންނަށް މެހެމާންދާރީ އަދާކުރުމުގެ ތައްޔާރީތައް ވަމުންދާ ކަމަށެވެ. ހަމައެއާއެކު ބެލިސްޓިކް މިސައިލް ލޯންޗަރުތައް ރަޝިޔާއަށް ފޯރުކޮށްދިނުމުގެ މަސައްކަތްވެސް އުތުރު ކޮރެއާއިން ކުރަމުންދާ ކަމަށް އޭނާ ފާހަގަ ކުރެއްވި އެވެ.

Advertisement

އޭނާ ވިދާޅުވީ އިތުރު ސިފައިން ނޯތް ކޮރެއާއިން ގޮސް ހަނގުރާމަ އާއި ގުޅުވުމަކީ ހަމައެކަނި ޔޫކްރެއިނަށް އޮތް ނުރައްކަލެއް ނޫން ކަމަށެވެ. ޒެލެންސްކީ ވިދާޅުވީ އުތުރު ކޮރެއާގެ މިސައިލްތައް ފޯރާ ހިސާބުގައި އޮތް އޭޝިޔާގެ ކޮންމެ ޤައުމަކަށްވެސް މިކަމުގެ ނުރައްކާ ކުރިމަތިވާނެ ކަމަށެވެ.

އަދި މި ނުރައްކަލާ ދެކޮޅަށް ޔޫކްރެއިނުން ރައްދު ދޭނެ ކަމުގެ ޔަޤީންކަން ޒެލެންސްކީ ދީފައިވެއެވެ.

ހަނގުރާމަ ކުރާނެ ގޮތާއި ހަތިޔާރު ތަރައްޤީކުރާނެ ގޮތާއި ހަތިޔާރު ބޭނުންކޮށްގެން ޙަޤީޤީ ހަނގުރާމައިގެ ތަޖުރިބާ ހޯދުމުގައި ރަޝިޔާއިން ދަނީ އުތުރު ކޮރެއާއަށް އެހީތެރިވަމުން ކަމަށްވެސް ވިދާޅުވި އެވެ.

ދެ ޤައުމުގެ ދެމެދުގައި ހެދިފައިވާ ދިފާޢީ އެއްބަސްވުމެއްގެ ދަށުން 2024 ވަނަ އަހަރު ގާތްގަނޑަކަށް 14000 އުތުރު ކޮރެއާ ސިފައިން ރަޝިޔާގެ ކުރުސްކް ސަރަޙައްދަށް ފޮނުވާފައިވާ ކަމަށް ރިޕޯޓުތައް ބުނެއެވެ.

އެ ސިފައިން ފޮނުވީ ޔޫކްރެއިނުން އެ ސަރަޙައްދަށް ދިން ބޮޑު ހަމަލާ ފަހަތަށް ޖެއްސުމުގައި ރަޝިޔާއަށް އެހީވުމަށެވެ.