އިންޑިއާގެ ޔޫނިއަން އެޑިއުކޭޝަން މިނިސްޓަރު ދަރްމެންދްރަ ޕްރަދާން އިސްތިއުފާދެއްވައިފި އެވެ.

އޭނާ އިސްތިއުފާގެ ސިޓީ މިއަދު ބޮޑުވަޒީރު ނަރެންދްރަ މޯދީއަށް ހުށަހަޅާފައި މިވަނީ ޕްރަދާންގެ އިސްތިއުފާއަށް ގޮވާލާ އެ ގައުމުގެ ޒުވާނުން ކުރަމުންދާ މުޒާހަރާތައް ހުއްޓާނުލައި އިތުރަށް ހޫނުވުމުން އިތުރު ގޮތެއް ނެތިގެންނެވެ. އޭނާގެ އިސްތިއުފާއަށް ގޮވަން ފެށީ ޑޮކްޓަރުން ކިޔެވުމަށް ފަހު ވަޒީފާއަށް ވަނުމުގެ ކުރިން ހަދާ ގައުމީ އިމްތިހާން "ނީޓް" ގެ ޕޭޕަރު ލީކުވި މައްސަލައިގަ އިމްތިހާނު ކެންސަލް ކުރުމުންނެވެ.

Advertisement

ޕްރަދާން އިސްތިއުފާއަށް ފަހު ނެރުއްވި ސިޓީގައި ބުނެފައި ވަނީ ޤައުމުގެ އެއްބައިވަންތަކަމާއި ދަރިވަރުންގެ ކުރިމަގު ޤާނޫނީ އޮޅުންބޮޅުންތަކުގެ ތެރެއަށް ވެއްޓިގެން ދިޔަ ނުދިނުމަށްޓަކައި ބޮޑުވަޒީރަށް އިސްތިއުފާ ފޮނުއްވާފައިވާ ކަމަށެވެ. ހަތަރު އަހަރަށް ވުރެ ގިނަ ދުވަހު ތަޢުލީމީ ދާއިރާގައި ޚިދުމަތް ކުރެއްވި ކަމަށާއި ދަރިވަރުންގެ ހުވަފެންތައް ޙަޤީޤަތަކަށް ހެދުމަކީ ހަނދާން ނައްތާ ނުލެވޭނެ ވަޢުދެއް ކަމަށް އެ ސިޓީގައި ވެއެވެ.

މިނިސްޓަރު އިސްތިއުފާ ދެއްވުމުން ޒުވާނުން ގުޅިގެން އުފައްދާފައިވާ ސީޖޭޕީ ޖަމާޢަތުން ބުނީ އަދިވެސް ދެ ޝަރުތެއް ސަރުކާރުން ފުރިހަމަ ނުކުރާ ކަމަށެވެ. ނަމަވެސް ޕްރަދާން އިސްތިއުފާ ދެއްވުމަކީ އިންޑިއާގެ ޑިމޮކްރަސީއަށް ލިބުނު ކުރިއެރުމެއް ކަމަށް ބުނެފައިވެ އެވެ.

މިނިސްޓަރުގެ އިސްތިއުފާގެ އިތުރުން ސީޖޭޕީން ޝަރުތު ކުރި ކަންކަމުގެ ތެރޭގައި އިމްތިހާނު ކެންސަލް ކުރުމުން އެކަމުގެ އަސަރު ކޮށްގެން އަމިއްލަ މަރުވި ދަރިވަރުންގެ އާއިލާތަކަށް ބަދަލު ދިނުން ހިމެނެ އެވެ. އެކަމަށް ސަރުކާރުން ވަނީ އެއްބަސްވެފައި އެވެ.