އިންޑިއާ ސަރުކާރާއި އެގައުމުގައި މުޒާހަރާ ކުރަމުންދާ ޒުވާނުން ބޭއްވި ފުރަތަމަ މަޝްވަރާ ބައްދަލުވުން ނާކާމިޔާބުވެއްޖެ އެވެ.

ޑޮކްޓަރުކަން ކިޔެވުމަށް ފަހު ވަޒީފާއަށް ނުކުތުމުގެ ކުރިން އިންޑިއާގައި ހަދާ ގައުމީ އިމްތިހާނު (ނީޓް) ގެ ޕޭޕަރު ލީކުވުމުން އިމްތިހާނު ކެންސަލް ކުރި މައްސަލައިގަ ޔޫނިއަން އެޑިއުކޭޝަން މިނިސްޓަރު ދަރްމެންދުރަ ޕްރަދާންގެ އިސްތިއުފާއަށް ގޮވާލާ އިންޑިއާ ޒުވާނުން މުޒާހަރާ ކުރާތާ މަހަކަށްވުރެ ގިނަ ދުވަސް ވެއްޖެ އެވެ. މުޒާހަރާތަށް މިމަހުގެ 20 ވަނަ ދުވަހުން ފެށިގެން ކޮންޓްރޯލުން ނެއްޓި ޕްރެޝަރު ބޮޑުވުމުން ސަރުކާރުން ވަނީ ފުރަތަމަ ފަހަރަށް މުޒާހަރާ ކުރާ ޒުވާނުންނާއި ބައްދަލުކޮށްފައި އެވެ.

Advertisement

ރިޕޯޓުތައް ބުނާގޮތުގައި މި ބައްދަލުވުން ވަނީ ކޮޅެއްގައި ނުޖެހި ނާކާމިޔާބު ވެގެން ނިންމާލާފައި އެވެ. ނާކާމިޔާބުވާން ޖެހުނު މައިގަނޑު ސަބަބަކީ ޒުވާނުންގެ އެންމެ ބޮޑު ޑިމާންޑު ކަމަށްވާ މިނިސްޓަރު އިސްތިއުފާ ދިނުން ނުވަތަ މަގާމުން ވަކި ކުރުމާއި މެދު ސަރުކާރުން ގޮތެއް ނިންމާފައި ނުވުމެވެ.

އިންޑިއާ ސަރުކާރުގެ ފަރާތުން ޒުވާނުންނާއި ބައްދަލު ކުރެއްވީ ސީނިއާ މިނިސްޓަރު ޖޭޕީ ނައްޑާ އެވެ. އޭނާ ބައްދަލުވުމަށް ފަހު މީޑިއާގައި ވިދާޅުވީ މާދަމާ އަނެއްކާވެސް ޒުވާނުންނާއި ބައްދަލު ކުރައްވާނެ ކަމަށެވެ. އަދި ފުރަތަމަ ބައްދަލުވުމުގައި މުޒާހަރާގެ ބައިވެރިން ހުށަހެޅި ކަންތައްތަކަށް ރަސްމީކޮށް ޖަވާބުދިނުމަށް ވަގުތު ދިނުމަށް އެދިފައިވާނެ ކަމަށާއި އެކަމަށް ހޮނިހިރު ދުވަހު ޖަވާބެއް ދެއްވާނެ ކަމަށް ވިދާޅުވި އެވެ.

މުޒާހަރާގައި ބައިވެރިވާ ޒުވާނުންގެ ފަރާތުން ޑިމާންޑު ކުރި ކަންކަމުގެ ތެރެއިން މިހާތަނަށް ސަރުކާރުން އިޖާބަ ނުދެނީ މިނިސްޓަރުގެ އިސްތިއުފާގެ މައްސަލައަށް އެކަންޏެވެ.

ޑިމާންޑުތަކުގެ ތެރެއިން އިޖާބަދީފައިވަނީ އިމްތިހާނު ކެންސަލް ކުރުމުން އޭގެ އަސަރުކޮށް ނަފްސާނީގޮތުން ބަލިކަށިވެ އަމިއްލައަށް މަރުވި ކުދިންގެ އާއިލާތަކަށް ސަރުކާރުން ބަދަލު ދިނުމަށެވެ. ދެން މިމަހުގެ 20 ވަނަ ދުވަހު މަޖިލީސް ކުރާ ގޭދޮށުގައި ސަލާމަތީ ބާރުތަކާއި ޒުވާނުންގެ މެދުގައި ހިންގި ހަމަނުޖެހުންތަކާއި ގުޅިގެން އެއްވެސް އާންމުންގެ މީހަކަށް ދައުވާ ނުކުރަން އިންޑިއާ ސަރުކާރުން އެއްބަސްވެފައިވެ އެވެ.

މުޒާހަރާތައް ކޮންޓްރޯލް ނުވުމުން އިއްޔެ އިންޑިއާގެ ބޮޑުވަޒީރު ނަރެންދްރަ މޯދީވެސް ވަނީ ސޯޝަލް މީޑިއާ މެދުވެރިކޮށް ޕޯސްޓެއް ކުރައްވައި އަދި ވީޑިއޯ މެސެޖެއްވެސް ދެއްވާފައި އެވެ. އެ މެސެޖުގައި ވަނީ ޕޭޕަރު ލީކުވި މައްސަލައިގަ ޒިންމާ ނަގަން ޖެހޭ ފަރާތްތަކަށް އަދަބު ދެއްވާނެކަމަށާއި އެކަން ހަރުދަނާ ކުރައްވަން ފިޔަވަޅުތައް އަޅާނެ ކަމަށް ވިދާޅުވި އެވެ.