ކޮންމެ ފަރުދަކު ވެސް އެ މީހެއްގެ ބެލެހެއްޓުމުގެ ދަށުގައި ހުރި ކަންކަން އިހުމާލެއް ނެތި ފުރިހަމަކުރި ގޮތާ މެދު ޤިޔާމަތް ދުވަހުން ޖަވާބުދާރީވާން ޖެހޭނެކަމަށް ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގެ މައުޝޫއަކީ މަސްއޫލިއްޔަތު އަދާ ކުރުމާއި ޒިންމާދާރުވުމެވެ.

Advertisement

ޚުތުބާގައި ފާހަގަކުރި ގޮތުގައި ޤައުމުގެ އެއްބައިވަންތަކަމާއި ވަޙުދަތު ޙިމާޔަތް ކުރުމަކީ ދީނީ ގޮތުންނާއި ޤައުމީ ގޮތުން ކޮންމެ ރައްޔިތެއްގެ ކޮނޑުގައި އެޅިފައި އޮތް ވާޖިބެކެވެ. މުޖުތަމަޢުގެ ހަމަޖެހުމަށް ބުރޫ އެރުވެދާނެ ފަދަ ކޮންމެ ކަމަކުން ދުރުހެލިވެ ތިބުމަކީ އެންމެހައި ފަރާތްތަކުގެ ޒިންމާއެއް ކަމަށް ވެސް ޚުތުބާގައި ބަޔާންކޮށްފައިވެއެވެ.

ޚާއްޞަކޮށް ދައުލަތުގެ އެކި ދާއިރާތަކުގެ މަސްއޫލިއްޔަތާ ޙަވާލުވެ ތިބި ފަރާތްތައް އެ ފަރާތްތަކުގެ ވަޒީފާ އާއި ޢަހުދުތައް ފުއްދި ގޮތާ މެދު ވަކިވަކީން ސުވާލު ކުރެވޭނެ ކަމަށް ޚުތުބާގައި ބުނެފައިވެއެވެ. އެ ދުވަހަކީ މުދަލާއި ދަރީންގެ ކިބައިން އެއްވެސް ފައިދާއެއް ކުރާނެ ދުވަހެއް ނޫން ކަމުގެ ހުތުބާގައި ހަނދާން ކޮށްދިނެވެ.

ހަމައެއާ އެކު ޤިޔާމަތް ދުވަހުން ޢުމުރާއި ޢިލްމާއި މުދާ ހޯދައި ހޭދަކުރި ގޮތާއި ހަށިގަނޑުގެ ހަކަތަ ބޭނުންކުރި ގޮތާ މެދު ސުވާލު ކުރެވޭނެކަން ރަސޫލާ ﷺ ގެ ޙަދީޘުން ސާބިތުވާ ކަމަށް ވެސް ބަޔާންކޮށްފައިވެއެވެ.

ޢަދުލުއިންޞާފުގެ މައްޗަށް ވެސް ޚުތުބާގައި އަލިއަޅުވާލާފައިވެއެވެ. ޢަދުލުގެ ކުރިމައްޗެހީގައި އެންމެންނަކީ ހަމަހަމަ ބައެއް ކަމަށާއި ކުށެއް ކޮށްފި ކޮންމެ މީހަކަށް ވެސް ޙައްޤު އަދަބު ލިބެން ޖެހޭ ކަމަށް ޚުތުބާގައި ބުނެ ރަސޫލު ﷲ ﷺ ގެ ދަރިކަނބަލުން ފާޠިމަތުގެފާނު ވައްކަމެއް ކުރެއްވި ކަމުގައި ވީ ނަމަވެސް އަތްޕުޅު ކަނޑުއްވާނެ ކަމަށް ޙަދީޘް ކުރެއްވި ވާހަކަ ނަމޫނާއެއްގެ ގޮތުގައި ގެނެސްފައިވެއެވެ.

ޚުތުބާ ނިންމާލީ ވަޒީފާ އަކީ އަމާނާތެއް ކަމުގައި ބަލައިގަނެ ތެދުވެރިކަމާއި އިޚުލާޞްތެރިކަމާ އެކު މަސައްކަތް ކުރުމަށް ގޮވައިލަމުންނެވެ.

އަމިއްލަ މަޞްލަޙަތަށް ވުރެ މުޖުތަމަޢުގެ ލާބައަށް އިސްކަން ދިނުމަކީ ފުރިހަމަ މުއުމިނެއްގެ ސިފައެއް ކަމަށާއި ﷲ ސުބުޙާނަހޫ ވަތަޢާލާ އާއި ރަސޫލާ ﷺ އަށް ކިޔަމަންވެ އަމާނާތްތަކަށް ޚިޔާނާތްތެރި ނުވުމަށް ވެސް ޚުތުބާގައި ހުރިހައި ރައްޔިތުންނަށް އިލްތިމާސް ކޮށްފައިވެއެވެ.