މާލޭ ބޮޑުތަކުރުފާނު މަގުގެ ހެންވޭރު ފެރީ ޓާމިނަލާ ހިސާބުން ފެށިގެން މޯލްޑިވްސް މަނިޓަރީ އޮތޯރިޓީ (އެމްއެމްއެމްއޭ) އާ ހަމައަށް ޒަމާނީ ފެންވަރަށް ތަރައްޤީކުރި އާންމު ދަތުރުފަތުރަށް ހުޅުވާލައިފި އެވެ.

މި މަޝްރޫއު އެއްކޮށް ނިންމާ އާންމުންނަށް ހުޅުވާލާފައިމިވަނީ އަމަލީ މަސައްކަތް ފެށިތާ ތިން މަސްދުވަހުގެ ތެރޭގައި އެވެ. އެ މަޝްރޫޢުގެ ދަށުން ރަސްމީ ފާލަމާ ހިސާބަށް ފަޅުން ބިން ހިއްކައި މަގު ހަތަރު ލޭނަށް ފުޅާކޮށް ތާރު އަޅާފައިވާކަމަށް ހައުސިން މިނިސްޓްރީން މައުލޫމާތުދެ އެވެ.

Advertisement

މި މަޝްރޫއު ކުރިޔަށް ގެންދިޔަ އެމްޓީސީސީން ހާމަކުރި ގޮތުގައި ކުދިކުދި ބައެއް މަސައްކަތް އަދިވެސް ނުނިމި އެބަ ހުއްޓެވެ. އެ ގޮތުން އެއްގަމު ތޮށީގެ ސިޑިތަކުގައި ރެއިލިން ހަރުކުރުން ފާހަގަކޮށް ސިޑިތައް ދެނެގަނެވޭ ގޮތަށް ރަތްކުލައިގެ ދަވާދު ލީ ކާބް ސްޓޯން ސިޑި ކައިރީ ބެހެއްޓިފައި ހުންނާނެ ކަމަށް ބުންޏެވެ.

ޒަމާނީ ފެންވަރަށް ތަރައްޤީކުރި ބައިގައި މަގުގެ ޕާކު ކުރުން ވަނީ މަނާކޮށްފައި އެވެ. އޭގެ ބަދަލުގައި ބޭންކް އޮފް މޯލްޑިވްސް ކުރިމައްޗަށް ވާ ގޮތަށް 500 ސައިކަލް ޖާގައިގެ ޕާކިން ޒޯނެއް ވަނީ ޤާއިމުކޮށްފައެވެ.

ސަރުކާރުގެ ފަސް މިލިއަން ގަސް އިންދުމުގެ ޕްރޮގްރާމާ ގުޅުވައިގެން އެ މަގުގައި މިހާތަނަށް 3100 އަށް ވުރެ ގިނަ ގަސް ވަނީ އިންދައިފައެވެ. ނޯތު ހާބަރުން ލޯކަލް މާރުކޭޓާ ހަމައަށް ކުރިން ގަސް އިންދުމުގެ ހަރަކާތެއް ހިންގާފައިވާ ކަމަށާއި އިއްޔެ ހަވީރު ވެސް ބައެއް ވުޒާރާތަކާއި ދައުލަތުގެ ކުންފުނިތައް ގުޅިގެން ގަސް އިންދައިފައިވާ ކަމަށް އެމްޓީސީސީން ބުންޏެވެ.

އެ ސަރަޙައްދުގައި ގިނަ ބައެއްގެ ތަޢުރީފް ލިބުނު އެއް ކަމަކީ ރައީސް އޮފީސް ކުރިމަތީ ދިވެހި ރުއް އިންދުމެވެ. ދިވެހި ރުކުގެ އިތުރުން ހޭޅިފަށުގައި ހެދޭ ޒާތުގެ ގަހާއި ބަގީޗާ މާގަހުން ވެސް އެ މަގު ޒީނަތްތެރިކޮށްފައިވާ ކަމަށް އެ ކުންފުނިން ފާހަގަކޮށްފައިވެއެވެ.

މިއީ ބޮޑުތަކުރުފާނު މަގު ޒަމާނީ ފެންވަރަށް ތަރައްގީ ކުރުމުގެ މަޝްރޫއުގެ ދަށުން ތާރު އަޅައިގެން ތަރައްގީ ކުރި ދެވަނަ ބައެވެ.