2026 ވަނަ އަހަރުގެ ފީފާ ވޯލްޑް ކަޕް ފައިނަލުގައި ސްޕެއިން އަތުން އާޖެންޓީނާ ބަލިވުމާ ގުޅިގެން އެ މެޗު އަލުން ކުޅެދިނުމަށް އެދި ހުށަހެޅި އޮންލައިން ޕެޓިޝަނެއްގައި 82,000 އަށްވުރެ ގިނަ މީހުން ސޮއިކޮށްފިއެވެ.

އާދީއްތަ ދުވަހު ނިއު ޖާޒީގެ މެޓްލައިފް ސްޓޭޑިއަމްގައި ކުޅުނު ފައިނަލް ސްޕެއިނުން ކާމިޔާބުކުރީ އިތުރު ވަގުތުގައި ފެރާން ޓޮރޭސް ޖެހި ގޯލުންނެވެ. މެޗު ނިމުނު ފަހުން ދުވަސްތަކެއް ފާއިތުވީ ނަމަވެސް މުޒާހަރާތަކާއި އިހުތިޖާޖުގެ ރާޅު އަދިވެސް ހުއްޓިފައެއް ނުވެއެވެ.

ޗޭންޖް.އޯގް މެދުވެރިކޮށް ޕެޓިޝަން ފެށީ ސަޕޯޓަރެއް ކަމުގައިވާ ގީސެލާ ސާންޗެޒެވެ. އެ ޕެޓިޝަނުގައި ސްލޮވީނިއާގެ ރެފްރީ ސްލެވްކޯ ވިންޗިޗް އިންސާފުކޮށްދިން ގޮތް "މައްސަލަ ބޮޑު އަދި ކޮރަޕްޓް" ކަމަށް ސިފަކޮށް ފީފާއިން ނިންމުންތައް އަލުން ބެލުމަށް ގޮވައިލައިފައިވެއެވެ. އެހެން ނަމަވެސް އެ ތުހުމަތުތައް ސާބިތުކޮށްދިނުމަށް ވެރިފައި ކުރެވޭ ހެއްކެއް ހުށަހެޅިފައެއް ނުވެއެވެ.

ހެކީގެ ގޮތުގައި ބޭނުންކޮށްފައިވަނީ ސޯޝަލް މީޑިއާގައި ދައުރުވާ ވީޑިއޯތައް އެކަންޏެވެ.

ފީފާގެ ޤަވާއިދު ބުނާ ގޮތުން މެޗެއް އަލުން ކުޅެވޭނީ ހަމައެކަނި ޚާއްޞަ ހާލަތްތަކެއްގައެވެ. އެއީ މުބާރާތުގެ ޤަވާއިދާ ސީރިއަސް ގޮތެއްގައި ޚިލާފުވެއްޖެ ނަމަ ނުވަތަ ކަމާ ބެހޭ ފަރާތުން ނަތީޖާ ރަސްމީކޮށް ކަށަވަރުކުރުމުގެ ކުރިން ނިންމާ ނިންމުމެއްގެ މައްޗަށެވެ. ޗޭންޖް.އޯގް ޕެޓިޝަނަކުން ކިތަންމެ ގިނަ ސޮއެއް ލިބުނަސް ޤާނޫނީ ގޮތުން ނުވަތަ ކުޅިވަރުގެ ގޮތުން ނަތީޖާއަށް އެއްވެސް ބަދަލެއް ގެނެވޭކަށް ނޯވެއެވެ.

މީގެ ކުރިންވެސް ބޮޑެތި ފައިނަލްތަކަށްފަހު މިފަދަ ހަރަކާތްތައް ފެނިގެން ގޮސްފައިވެއެވެ. 2022 ގައި ޤަތަރުގައި އާޖެންޓީނާ ތަށި ހޯދުމުން ޕޮލެންޑުގެ ރެފްރީ ޝީމޮން މާޗީނިއާކް އާ މެދު ކަންބޮޑުވުން ފާޅުކޮށް ފްރާންސުގެ 20,0000 އަށްވުރެ ގިނަ ސަޕޯޓަރުން ޕެޓިޝަނެއްގައި ސޮއިކުރިއެވެ. އެ ފަހަރު އާޖެންޓީނާގެ ރައްދަކީ "ރުއިން ހުއްޓައިލާ" ށެވެ.

ޕެޓިޝަނެއްގައި ސޮއި ކުރަމުންދާއިރު ފައިނަލް މެޗާިއ ގުޅުން ހުރި ވަކި ޑިސިޕްލިނަރީ ތަހުގީގެއް ފީފާއިން ވަނީ ފަށައިފައެވެ. ނަމަވެސް އެ ތަހުގީގު ހިންގަނީ ރެފްރީންގެ ނިންމުންތަކާ ގުޅޭ ގޮތަކުން ނޫނެވެ.

ބަލަމުން ދަނީ ފައިނަލް ނިމުމަށްފަހު ދެ ޓީމުގެ ކުޅުންތެރިންގެ ދެމެދުގައި ހިނގި ހަމަނުޖެހުންތަކެވެ. މި މައްސަލަ ބެލުމަށް ފީފާއިން ވަނީ ޑިސިޕްލިނަރީ އެންޑް އެތިކްސް ޕްރޮސެކިއުޓަރެއް ޢައްޔަނުކޮށްފައެވެ.

ބަލަމުންދާ މައްސަލަތަކުގެ ތެރޭގައި އާޖެންޓީނާގެ މިޑްފީލްޑަރު ލެއަންޑްރޯ ޕެރެޑެސް ސްޕެއިންގެ އެރިކް ގާސިއާގެ ކަރުގައި ހިފައި ގަވީ ކޮއްޕާލި މައްސަލަ ހިމެނެ އެވެ. އަދި ޓްރޮފީ ހަވާލުކުރުމުގެ ރަސްމިއްޔާތުގައި އާޖެންޓީނާ ކުޅުންތެރިން ސްޕެއިނަށް ފުރަގަސްދެއްކި މައްސަލައާއި ސެމީ ފައިނަލުގައި އިންގެލެންޑް ކަޓުވައިލުމަށްފަހު ފޯކްލެންޑް ޖަޒީރާތަކުގެ ސިޔާދަތީ ދައުވާގެ ބެނާއެއް ދެއްކި މައްސަލަވެސް ހިމެނެއެވެ.

ބެނާ މައްސަލައިގައި އާޖެންޓީނާ ފުޓުބޯޅަ ފެޑެރޭޝަން (އޭއެފްއޭ) ޖޫރިމަނާކޮށްފައިވެއެވެ. ފީފާއިން ބުނީ މި މައްސަލަތަކުގެ ތަހުގީގު ކުރިއަށް ގެންދަން ނިންމައި ރިޕޯޓު ފުރިހަމަވުމުން ތަފްސީލް ހާމަކުރާނެ ކަމަށް ބުނެފައެވެ.