އިންޑިއާގެ މޫސުމީ ބަދަލުތަކާ ގުޅޭ އެކްޓިވިސްޓް ސޯނަމް ވަންޗުކް ސަރުކާރުގެ ލިޔުމުން ދިން ޔަގީންކަމާ ގުޅިގެން 26 ދުވަސް ވަންދެން ކުރިއަށް ގެންދިޔަ ބަނޑުހައިހޫނުކަމުގެ ހަޅުތާލު ހުއްޓާލައިފި އެވެ.

ޢުމުރުން 59 އަހަރުގެ ވަންޗުކް މި ހަޅުތާލު ފެށީ މިދިޔަ ޖޫން 28 ވަނަ ދުވަހުއެވެ. ނީޓް އިމްތިޙާނުގެ ކަރުދާސް ލީކުވި މައްސަލައިގައި ޒިންމާ ނެގުމަށާއި އިންޑިއާގެ އިމްތިޙާނީ ނިޒާމު އިޞްލާޙުކުރުމަށް ގޮވައިލައި ކުރި މި ހަޅުތާލަށް އިދިކޮޅު ލީޑަރުންނާއި ދަރިވަރުންގެ ޖަމާޢަތްތަކާއި މަދަނީ ޖަމިއްޔާތަކުގެ ތާއީދު ލިބުނެވެ.

Advertisement

ހަޅުތާލު ނިންމައިލުމަށް ފަހު މެޑެންޓާ ހޮސްޕިޓަލުން ރެކޯޑުކުރި ވީޑިއޯއެއްގައި ވަންޗުކް ބުނީ ޔޫނިއަން މިނިސްޓަރުން ކަމުގައިވާ ޖޭ.ޕީ ނައްޑާ އާއި ޖިތެންދުރަ ސިންގް ލަދާޚް އެޕެކްސް ބޮޑީގެ އިސް ވެރީންނާ އެކު ރޭ ދަން ގަޑީގައި އައިސް ސަރުކާރުގެ ޔަގީންކަން ފޯރުކޮށްދިން ކަމަށެވެ.

ވަންޗުކް ބުނީ ސަރުކާރުން ލިޔުމުން ދިން ބަޔާނުގައި ދިއްލީގެ ޖަންތަރު މަންތަރުގައި ސުލްޙަވެރިކަމާ އެކު އިޙުތިޖާޖުކުރި ފަރާތްތަކާއި ޖުލައި 20 ގައި ޕާލަމެންޓަށް ހިނގައި "ޗަލޯ ސަންސަދު" ހިނގާލުމުގައި ބައިވެރިވި ފަރާތްތައް ދައުވާނުކޮށް ދޫކޮށްލުމަށް ސަރުކާރުން ނިންމާފައިވާ ކަމަށެވެ. އޭގެ އިތުރުން ކަރުދާސް ލީކުވި މައްސަލައާއި އިމްތިޙާނީ ނިޒާމުގެ އިޞްލާޙީ ބަދަލުތައް ޕާލަމެންޓުގައި ފުޅާ ދާއިރާއެއްގައި މަޝްވަރާކުރާނެ ކަމަށެވެ.

އަދި ޓެސްޓު ޕޭޕަަރު ލީކުވި މައްސަލައިގަ އަމިއްލައަށް ފުރާނަ ދުއްވައިލި ދަރިވަރުންގެ ޢާއިލާތަކަށް އެކަށީގެންވާ ބަދަލެއް ދޭނެ ކަމުގެ ޔަގީންކަން ސަރުކާރުން ދީފައިވާ ކަމަށެވެ. ރިޕޯޓުތައް ބުނާގޮތުގައި 20 އަށްވުރެ ގިނަ ކުދިން އެ މައްސަލައިގަ އަމިއްލައަށް މަރުވެފައިވެ އެވެ.

ވަންޗުކް ބުނީ ދެ ފަރާތުން އެއްބަސްވުމަކަށް އައީ ދެ ދުވަސް ވަންދެން ކުރި މަޝްވަރާތަކަށް ފަހު ކަމަށެވެ.

ހަޅުތާލު ނިންމައިލިކަން އިޢުލާންކުރަމުން ވަންޗުކް އެކްސްގައި ލިޔެފައިވަނީ "ބަނޑުހައިހޫނުކަމުގެ ނިމުން... ޒިންމާ ނެގުމުގެ ފެށުން!" ކަމަށެވެ. އިންޑިއާގެ ޕާލަމެންޓުގެ ހިނގަމުންދާ މޫސުމީ ސެޝަންގައި މި މައްސަލައިގެ ބަހުސް ކުރިއަށް ގެންދާނެ ކަމަށް ސަރުކާރުން ޔަގީންކަން ދިންކަމަށް އޭނާ ބުންޏެވެ.